بالدارجي الفاضح.. فوضى الجبايات والمعابر..إدفع لتعبر ولو كنت شايل (بنقو).. ولو كنت شايل شتلة ليمون برضو حاتدفع..!!
إدفع لتعبر ولو كنت شايل (بنقو).. ولو كنت شايل شتلة ليمون برضو حاتدفع..!!
أبوعاقله أماسا
* إذا ربنا كتب ليك (تتمغص) وتشعر بي حد القرف، تشحن اليومين ديل أي سلعة من الجزيرة للخرطوم، أو من شندي لي مدني أو العكس، حا تشعر إنو البلد دي محتلة وتحس بالمغص واحتمال تتشق، لأنو فيها قوة بتستعبد الناس، أو شغالة ضد تقدم البلد، وشغالة خرمجة لمصالحها الخاصة.
– أول حاجة بتطمم بطنك كمية من نقاط الجبايات والتعامل الفظ مع المنتجين والتجار، قاعدين فيها ناس ألله أعلم يكونوا عارفين البلد دي فيها قانون والا مافيها، المهم عندهم قانون حقهم، ومعاملتهم زي معاملة الدعامة لعنة الله تلاحقهم أينما كانوا، فهم مثال للبشر غير الأسوياء..!
– أي محطة يوقفوك فيها لازم تفهم إنو موقفنك عشان تدخل يدك في جيبك وتدفع، لو انت فاهم الشفرة دي من شندي لي سنار والقضارف بتمشي وتجي في ساعات، ولو عملت فيها أبكم حايقولوا ليك التصديق الفلاني ماعندك وما بتمر..!!
– لو متابعين كمان في مبادرة إسمها (بيتنا أخضر) تقريباً، أطلقها مجموعة من الزراعيين عشان يشجعوا الناس علي زراعة الأشجار المثمرة في البيوت، يعني مبادرة قمة في الإيجابية، وعندهم شغل ممتاز فيهو إبتكارات في الهندسة الزراعية وتحسين للأشجار المثمرة وأسلوب زراعتها ورعايتها، وطبعاً جاتهم طلبات لأشجار ليمون ومانجو وبرتقال وقريب فروت بأشعار تشجيعية، ومن المفترض إننا في بلد بتشجع المبادرات دي وأي مبادرة بتشجع على الإنتاج.
– المهم المهندسين ديل شحنوا الطلبات عشان تتوزع علي الراغبين، يقوموا الجماعة الفي الشارع يوقفوهم.. قالوا عايزين تصديق من الغابات وإلا ما بتمروا.. السؤال: منو القال إنك لما تشيل ليك شتلة من الخرطوم للجزيرة محتاج تصديق؟.. إذا كان حطب الغابات من القضارف بتمشي مصر بدون تصديق، البخليني أفتش تصديق لي شتول شنو؟ .. ويعني ناس الغابات ديل نايمين علي قفاهم وما عارفين إنو الدعم السريع اتسبب في موت ٥٠٪ من الأشجار المثمرة في الجزيرة وسنجه؟ ونحن محتاجين نزرع خمس سنوات عشان نسد الفجوة؟.. الفهم شنو يعني من الإجراء؟
– في تقديري الزول الوقفهم عايز قروش… عايز رشوة بالدوغري كده، ولو أديتو الفين أو خمسه بتمشي ولو شايل شحنة بتاعة بنقو بتمشي، وأنا بتذكر كتبت هنا قبل دخول الدعم السريع إنك لو ماشي مدني ودفعت في الطريق كويس بتوصل ولو كنت شايل حميدتي ذاتو.. القصة واضحة أصلاً، البلد مليانة مخدرات وبتدخل بالطريق عديل، يجي واحد يقول ليك تجيب لي تصديق من الغابات عشان تشيل ليك شتل ليمون من نهر النيل أو الخرطوم للجزيرة..!
– حتى ناس الجبايات البنعتبرها شرعية زي ناس الزكاة.. ديل كمان عندهم تصرفات عجيبة تحسسك إنو القصة دي قلع وحقارة ما شرع منزل في كتاب الله.. وأول مرة أشوف لي زكاة بسكوا ليها لوري شايل دقيق ذرة بالبوليس من رفاعة لحد سوق أبوعشر… لو مهرب زئبق ما بيبذلوا فيهو مجهود زي ده، بتاع الدقيق ده لو قعد بس علي الدقيق البوزعوا علي المحتاجين في السوق مجاناً بكون برأ ذمتو مع الخلقو..لكن شغلكم ده ما شغل دين، البلد ذاتها في ناس ما لاقيين حق الوجبة لو جوكم في ديوانكم ما بطلعوا بي حاجة لكن بتاع اللوري بديهم حق كم وجبة..!
– لا يعقل يا دولة الظلم يتحرك لوري شاحن طماطم من قرى المناقل مثلاً وقاصد الخرطوم وفي الطريق يدفع مايقارب سعر الطماطم، ولما يصل الأسواق يبيعها للمواطن بي ضعف سعرها المفروض يشتري بيها، يعني كيلو الطماطم لو سعره مفروض يكون بي (٢٠٠٠) بيشتريها بي عشرة آلاف بسبب الدفعيات من موقع الإنتاج لحد ما يصل السوق، الكلام ده بيحصل في ياتو دولة في العالم؟.. أي زول في الطريق عايز حقو، خلوهم ناس الزكاة والضرائب ورسوم المحليات وغيرها.. في ناس (ساااي) واقفين في الشارع برضو عايزين… يعني فوضى من أمها وأبوها..!
– أصلاً البلد دي فيها فساد وشغل عصابات لو ما انتهى بتتحول لي جحيم أكتر من الحاصل ده..!!
