تحية يا اجمل جزيرة

في السلك

بابكر سلك

تحية يا اجمل جزيرة

*توتي الجميلة الانيقة الرشيقة

*صعدت للممتاز بجدارة

*وفي صمت الا من دقات القلوب التي اعياها العمل الجاد والمسير نحو هدف محدد

*فكان الصعود

*وازدات توتي الانيقة بهاءا واضحت اكتر ادهاشا

*صمت رهيب الا من ايقاعات اللستر وتلاطم المياه عند شاطئها

*ودوزنة عمال الكمائن ودندنة المغني

*عجبوني الليلة جوا

*جوا الي حيث موقعهم الطبيعي والطليعي ضمن اندية الممتاز

*وكان الانجاز

*كان الانجاز لان التواته اتحدوا

*لم يشتتوا قواهم بين كيمان ادارية وتحزب للافراد

*فقط كان الكيان

*لذا كان للكيان ما كان اول امس

*مبروك شباب توتي

*وعجبوني الليلة جوا

*المهم

*لو ذهب من المريخ كل اللاعبين الذين نطالعهم بالميديا

*لتبقي في كشف المريخ نمر ومحمد المصطفي

*ولو سجل المريخ جميع الاسامي التي طالعناها بالميديا

*لاحتاج للجنة عضوية تحصر له لاعبيه

*ولو تفتح عمل الشيطان

*والكورة قالوا بتحب الكيشة

*قدرما يجليها بتجي قدامو

*فيا سودا لو كنت حريف دقل وورينا

*ولو كنت كيشة الكورة ماخاتياك

*سيك سيك معلق فيك

*وهاهي امامك بعد جليتها مرات ومرات

*مرة جليتها لما المفوضية عملت حركات الشفع ديك وامانة الشباب تآمرت كعادتها علي المريخ والانقاذ خلت شغلها كلو وبقت متفرغة لعدم اعلانك رئيس رغم فوزك بالتزكية منفردا دون منازل

*وقتها قلنا ليك اغدق علي النادي لتنصب نفسك زعيما شعبيا يجبر الحيكومة لاعلانك رئيسا رسميا

*ولكنك لم تفعل

*ومرة جليتها لما اخفقت في ملف الاجانب عدا سومانا

*ملف الاجانب ده جليتها واقفه عديل كدة

*وتاني جليتها لما اخترت شركة فشلت في اعادة الحياة للنجيل

*برغم جهود مدير الاستاد المقدرة

*والغريبة الشركة شالت الفنيين القدروا يضعوا بصمتهم علي النجيل واستبدلتهم بآخرين كان قوموها يقوم راسي ده

*وحتي نجاح تبديل السور القديم الغير قانوني

*ينسب لمدير الاستاد للادارة التنفيذية التي وفرت تمنه الغالي من ايرادات الكيان التي كانت نسيا منسيا

*وكان النجاح في المصرف الذي جاب لينا الكلام افريقيا وعربيا

*جليتها واقفه كتير ياسودا

*المرة دي كان جليتها بتنشطب

*ليق تاني مابتلعب

*جاتك براها مدردقة والانتخابات علي الابواب

*اعادة قيد المفكوكين

*اعادة قيد القربوا يتفكوا

*تأهيل النجيل

*ترميم التيم

*الاعداد لمعسكر اعدادي محترم

*ديل عبارة عن دعاية انتخابية جاتك مدردقة

*كان جليتها

*املص الفنيلة واجري

*لو كان الجري بحلك

*ولو ماجليتها انعم بطول حياة يامربع

*ايها الناس

*قلناها الف مرة

*نحنا مامع زول اطلاقا

*مع قيمة سامية اسمها الديمقراطية

*وهدف عظيم اسمه صالح الكيان

*وبعد كدة لايهمنا من يقود الدفه

*طالما القانون يحكمنا

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت يا والينا

*المولد قرب يجينا

*مع ازمة الرغيف دي يا اخينا

*الفتة حاتتعمل بالآندومي يا والينا

سلك كهربا

ننساك كيف والكلب قال الآندومي ذاتها بقت باربعين…فتتكم دي الا تتموها خيال..الموية ذاتها قاطعة

والي لقاء

سلك