تلوث نووي
في السلك
بابكر سلك
تلوث نووي
* سمعت لي تسجيل صوتي للكوتش شوقي عبد العزيز
*استنكر فيهو بشدة خطوة مجلس الهلال المنتخب بإعادة قيد رباعي الهلال هيثم والمعز ومهند
*طبعا إعادة القيد ما عشان يلعبوا
*ولكنها لمنحهم فرصة أن يختموا حياتهم الرياضية بالهلال تمهيدا لتكريمهم
*ده رأي العليقي والسوباط الدخلو الوسط الرياضي (بوكو) ورخصوا ودردقو في الشارع مع كل الوسط الرياضي
*وبالتأكيد الفكرة ما حقت السوباط ولا العليقي
*ولكنها فكرة قديمة وسنة في الوسط الرياضي من السنن الجميلة
*كابتن شوقي ما دخيل علي الوسط الرياضي ولا بوكو تم تقنينه في المنطقة الحرة (قري)
*زول أصيل وقديم ومواكب
*عشان كده رفضو للفكرة ما كان متناسب مع تاريخو
*وتعصب الكوتش شوقي للهلال لهذه الدرجة
*هو في حقيقته من قبيل التعصب السالب البقوم على تحطيم الند دون التفكير في تقدم النادي الذي ينتمي له
*وكوتش شوقي حر في اعتناق شكل التعصب الذي يريد
*لكنه ما حر في كيل السباب للغير
*قال شوقي مستنكرا إعادة قيد هيثم
*ما ممكن يمشي يتلوث في المريخ ويجينا راجع
*لاحظ يتلوث
*ما داير أضغط على الرجل
*ولكنها كلمة لا تليق بالمريخ ولا تشبهه
*فشوقي بعرف المريخ من زمن كمال عبدالوهاب بحاورو بطريقة أغنية الحقيبة أنا والتمني
*أمشي وأجيهو راجع….راجع..
*وكنا بنلقى يا كوتش الفرق شاسع
*ولكن لم نسيئ للزول الحاوروهو ولسه واقع
*لأن الفرق شاسع
*إنك تعرف المريخ وتعرف الله واحد من كمال يستلم الكورة وكلكم تترتروا
*منكم بدأت الترترة في السودان
*وتتعازموا
*خش إنت لا خش إنت
*والبخش والما بخش كلكم بتتحاوروا زي السلام عليكم
*وما كنا بنضحك
*لأن الفرق شاسع
*عشان كده ما ظنيت كابتن شوقي قصد كلمة (يتلوث) دي
*وكان قصدها
*يكون مفتكر المريخ ده مفاعل نووي
*بفرتك الناس ويشتتهم
*لأنو شاف بعينو واتفرتك مع الناس
*كلو من كمال عبدالوهاب
*ناس فاطيما أفريقيا الوسطى قالوا لينا الزول ده ما معاكم
*وناس إثيوبيا قالوا ده جن عديل كده (هدف التأهل لميونخ)
*وأهم ناس الهلال قالوا مفاعل نووي
*كلو من كمال عبدالوهاب
*وقريبا كلو منك ياتشتش
*سؤال بمنتهى الروح الرياضية
*قبل مباراتكم ضد المريخ كنتوا بتقدروا تنوموا؟
*عليك الله كم يوم قبل الكورة بتتكلموا عن كمال عبد الوهاب؟
*ويسألك الله كم مرة ناس دفاعكم بضحكوا في واحد فيكم لما كمال يحاورو؟؟؟
*سؤال أخير
*محاورة حاورك ليها كمال عبدالوهاب وعجبتك أحكيها لينا
*يا كوتش شوقي
*الدحيش برضو إتلوث؟؟؟؟
*حموده وعلاء جوكم ملوثين؟؟؟
*طيب أسي ما فضل ليكم إلا تفاوضوا حازم وود الجزيرة
*مالكم دايرين الملوثين؟؟؟
*معقولة زول يجي من نادي صفري لنادي بطولاتو الجوية تملأ طيارة شحن يكون اتلوث
*أمال البجي من نادي جوي لنادي أرضى بكون شنو؟؟؟
*اتلبش؟؟؟؟
*ياخ هيثم لعب في الهلال سبعطاشر سنة
*قابل كاني ماني التنزاني
*والبفرا اليوغندي
*وسكو سكو التشادي
*وحايتو الإريتري
*لعب في المريخ شهر قابل بايرن ميونخ
*تقول لي اتلوث!!!!
*قلت ليك المريخ ده مفاعل نووي يا كوتش
*أها
*نجي لي شمارات والي الخرتوم
*كان شفت يا والينا
*الثورة الفرنسية مية سنة مدورة فينا
*الفورة مية وما مستعجلين يا أخينا
سلك كهربا
ننساك كيف والكلب قال والله تاني جداد يكاكي ما دايرنوا
وإلى لقاء
في السلك – أردم الوهم
البراميل الفارغة تحدث ضجيجا اكثر ياعم تنقو. كلامك وكان الهلال عقيم وليس به لاعب بهدل دفاعات الوصيف. هل سمعت بقصة كسلا عدما جمع وطرح وبرش دفاعات المرخرخ ثم جدع الكرة في الشبك واراد احسن دفاعاتكم في ذلك الوقت بعد ان فاق من دروخة المحاورة اللحاق بالكرة فتعلق بالشبكة وسمي السمكة😹😹😹وتم تحرير السمكة بعد تقطيع الشبكة.
أحد بائعي الوهم والتخدير المريخي، مرة واحدة واحدة فقط اكتب كلام محترم وفيه تحليل مفيد للقارئ لا والي الخرتوم ونجي لشمار والي الخرتوووم والمريخ لا يقارن بالهلال والله انا هلالي وافتخر جدآ لكني لا استهزئ بالقطب الثاني للكرة السودانية بل اتمني ان اراه في اعالي المنصات محققآ انجازآ سودانيآ نرفع به رؤوسنا المطأطأة من خزيانكم يا مشجعي هلال مريخ..
عد لواليك بتاع الخرطوم وكتاباتك الفطيرة..