ثلاثة لا يغفرها السُّودانيون.. الانقلابات العسكريّة والخيانة وأخطاء المُدافعين..!!
صَابِنّهَا
محمد عبد الماجد
ثلاثة لا يغفرها السُّودانيون.. الانقلابات العسكريّة والخيانة وأخطاء المُدافعين..!!
• شاهدت مباراة مانشستر سيتي والأرسنال في قمة الدوري الإنجليزي التي فاز فيها مانشستر سيتي على متصدر الدوري الإنجليزي 3 / 1.. ووجدت أن الأخطاء التي وقع فيها مدافعو متصدر الدوري الإنجليزي في (ميدان عقرب) ما بتحصل!!
• قِدّام البيت ما بتحصل.
• لا تقول لي شمس.
• لا تقول لي الصرف صحي.
• وشاهدت أمس الأول المباراة الرائعة في البطولة الأوروبية بين ليفربول وريال مدريد في ملعب (انفيلد) الملعب الخاص للفريق الإنجليزي.. المباراة كانت متل (القصة القصيرة).. تقدّم فريق ليفربول بهدفين في أول ربع ساعة من عُمر المباراة.
• المُعلِّق.
• والمُدرِّب.
• وجمهور ليفربول.
• ونحن القاعدين في التلفزيون.
• كلنا سخرنا من ريال مدريد.
• ضحكنا في دفاع ريال مدريد.. وقلنا دفاع ريال مدريد دا زي (الغُربال) ما بمسك الموية.
• وحارس ريال مدريد في الدرجة الثانية أم درمان ما بيلعب.
• نحن كدا.. انطباعيين.. بنطلِّع انطباعنا مع أول حدث.
• فجأة كدا.. ريال مدريد ظهر.
• والله لغاية الآن التي اكتب لكم فيها.. ما عارف الحصل شنو؟
• لا أقول ليكم شمس.
• لا أقول ليكم طبيب الفريق.
• لا أقول ليكم موية الصرف الصحي.
• المهم ريال مدريد سجّل ليه (5) أهداف في شباك ليفربول.
• نفس الأخطاء.
• وهدية الحارس.
• كل هذه الأشياء ريال مدريد جعل ليفربول يقع فيها.
• استرد ريال مدريد كل شيء من ليفربول.. بما في ذلك (الأخطاء) التي كان قد وقع فيها ريال مدريد.
• عشان تاني ما في (مُعلِّق) يضحك على الريال.
• المباراة انتهت 5 / 2 لصالح الريال.
• فرحة محمد صلاح راحت ساكت.
• ويا ريت لو بقت على الفرحة.
• الهدف برضو أصبح بدون قيمة.
• قلت ليكم مباراة زي (القصة القصيرة).. قعدتوا تغالطوا فيني.
• بعد الخماسية.. قلت يا ربي ناس ليفربول ح يقولوا شنو؟ وهم خسروا بالخمسة على ملعبهم.. زي ما خسر الهلال من مازيمبي.
• قلت يمكن محمد صلاح أثّر عليهم.
• يمكن يقولوا الشمس.
• قلت شمس شنو المباراة كانت في المساء؟.. بعد غياب الشمس.
• ناس الأهلي لو المباراة كانت ليلاً.. برضو كان قالوا الشمس.
• شمس العصر أثّرت عليهم.
• قلت يمكن موية الصرف الصحي!!
• قلت موية شنو؟ المباراة في ملعب ليفربول.
• انتظرت السفير الإنجليزي في إسبانيا يقول حاجة.
• يقدِّموا شكوى.
• ما معقول هزيمة بالشكل دا وتمر ساكت.
• لازم تكون في شمّاعات.
• لازم تكون في مبرّرات.
• عاوز اطلع بيكم على فاصل وأرجع تاني.
• والله حاجة ما قادر أمسكها.
• قالوا ناس الأهلي المصري أشادوا بالمريخ.. وتغزّلوا في سلوكيات نادي المريخ.
• وقالوا جريدة “الصدى” صدّقت وعملت نسخة مصرية.
• والأهلي والمريخ الاثنين اتفقوا على أنّ أسلوب الهلال قَذِرٌ!!
• اتخيّلوا؟
• الأهلي السنة الماضية اتفق مع المريخ واشترى مباريات المريخ لتُلعب في القاهرة عشان يطلِّعوا الهلال من المجموعات!!
• المريخ قبض الثمن!!
• والأهلي لم يلتزم بالاتفاق!!
• اختلف الأهلي والمريخ.. وظهرت الحقيقة!!
• تواطؤ رسمي جمع بين الأهلي والمريخ ضد الهلال وصن داونز.. والأهلي والمريخ السنة دي أيِّ فريق في مجموعة.. وطلعوا الاتنين يتكلّموا عن الأسلوب القذر!!
• التواطؤ عادي عندهم!!
• المُشكلة في الشمس!!
• في موية الصرف الصحي!!
• الحكم ينقض هدفاً صحيحاً للهلال سجّله الغربال في شِبَاك الأهلي زي هدف وليد طاشين سنة 1987.. ما مشكلة!!
• المشكلة في الشمس!!
• يقولوا ليكم الكلام مية مرة.
• يشتروا الاتحاد.
• يشتروا المريخ!!
• يشتروا الحكم!!
• عَادِي.
• لكن طبيب الهلال يدخل للملعب عشان يعالج لاعب الهلال المصاب مُشكلة!!
• غايتو الجماعة ديل فهمهم للأسلوب القذر.. في حد ذاتو قذر!!
• الله يسهِّل.
• كنا فاكرين البكاء في القاهرة بس!!
• البكاء طلع في “الصدى”!!
• البكاء في العرضة جنوب وقناة الأهلي المصري!!
• الخيانة ما شرط تكون في شوال سكر.
• او في شوال تبن.
• خيانة المواقف اسوأ.
• مرة واحدة اعملوا ليكم موقف مع الناس.
• ديل أنا خايف في (حلايب) يكونوا واقفين مع المصريين.
• ما عاوز اتكلم في الحتة دي كتير – عشان ما غريبة عليهم.
• لكن لو كتروا بنرجع ليهم – ونتحاسب بالورقة والقلم.
• نرجع لموضوعنا.. عليكم الله ما تحاولوا تطلِّعوني من الموضوع.
• أخطاء الدفاع وأخطاء الحُرّاس.. عند الفريق المهزوم والفريق المُنتصر في النماذج السابقة واضحة.
• لا شمس.
• ولا صرف صحي.
• دفاع ليفربول.. قطر بفوت فيه.
• زمان كانوا بقولوا لينا (الباك) دا لو فكوا ليه (عنقريب) أو (طاولة عيش) ما بمسكها.
• ما عارف علاقة (الباكات) بالعناقريب وطاولة العيش شنو؟!
• يمكن شمس!!
• المُهم يا جماعة وعلى مُستوى الدوريات الكُبرى في أوروبا وعلى مُستوى البطولات القارية في أوروبا.. بنشاهد أخطاء للدفاع ولحرّاس المرمى.. نحن في ميدان عقرب بنخجل منها!!
• فضائح.
• كوارث.
• والموضوع بمر عَادِي.
• ما في أيِّ مُشكلة.
• ولا في انتقاد.
• ولا هُجوم من الجماهير.
• في السُّودان الخطأ الذي يقع فيه المدافع أو حارس المرمى لمن يبقى مدرب ما بنسوه ليه.
• بنصبوا (مشانق) على الاخطاء دي.
• مرة قابلت كابتن الهلال السّابق الأسد مبارك سليمان.. قلت ليه تذكر الهدف العكسي الذي سجّلته في مرمى الهلال عندما كان الهلال يلعب أمام المريخ في قمة درع الإنقاذ؟!
• مبارك سليمان قال لي أنا عملت ألف حاجة حلوة.. وسجّلت للهلال.. وما بتذكروا لي إلّا الهدف العكسي الذي سجّلته في مرمى الهلال !!.. الهدف كان في مباراة ودية انتهت بالتعادل.
• الناس نست هدف الريح كاريكا الذي سجّله في هذه المباراة للهلال ومتذكرة هدف مبارك سليمان في الهلال!!
• نحن كدا.
• ننسى أيِّ شيء.
• إلّا أخطاء المُدافعين والحرّاس.
• السُّودانيون مُمكن يسامحوا في أيِّ حاجة.. ثلاث حاجات فقط لا بنسوها ولا بغفروها.
• الانقلابات العسكرية.
• والخيانة… والانكسار للأجنبي.
• وأخطاء المُدافعين.
• تاني ما عندهم أيِّ مُشكلة.
• ممكن يسامحوا في أيِّ شيء.. إلّا في هذه الأشياء الثلاثة.
• لهذا أقول يجب أن ننظر بشيءٍ من الرحمة للأخطاء التي يُمكن أن يقع فيها المُدافعون.
• المُهاجم بضيِّع في المباراة أكثر من هدف مضمون.. ما في زول بقول شيء.
• أول غلطة للمدافع أو حارس المرمى بمسكوها ليه بالسنين.
• الواحد ممكن يفقد ذاكرتو.. لكن ما بنسى غلطة حارس المرمى.
• ما تقولوا لي غلطة الحارس بهدف.. ممكن الغلطة تبدأ من المُهاجم ومُمكن تفقد مُباراة أو بطولة بسبب مُهاجم أو لاعب وسط.
• أرحموا المُدافعين شوية.
• فكوا الحُرّاس.
• وادعموهم.
• الشناوي قالوا أحسن حارس في مصر.
• الشناوي أفضل لاعب في أفريقيا في الموسم الماضي.
• الشناوي سجّل فيه ليليبو هدفاً.. لو المرمى كان فاضي يمكن ما كانت الكورة تدخل.
• احتمال كانت تدق في العارضة لو ما شلاقة الشناوي.
• الغريبة بعد هذا الهدف.. ناس الأهلي قالوا (الشمس) وقالوا (موية الصرف الصحي)!!
• أنا أول مرة اشوف لي موية صرف صحي بتشنق الحارس كدا!!
• الشيء العجيب.. الأيّامات دي بشوف الكورة تضرب في القائم وتصطدم بالحارس وترجع تدخل قوون.
• متل الختم.
• تضربو في المحبرة.. ثم تضربو في المستند.
• طبعاً أنا ما بحب المُدافع أو لاعب الوسط يرجِّع الكورة للحارس.
• نسبة الأهداف التي تسجل من إعادة الكورة لحارس المرمى يُمكن أن تصل لـ30%.. مع ذلك المُدافعون يصروا يرجِّعوا الكورة للحارس.
• عليكم الله يا ناس الهلال.. الحركة دي خلوها.
• والله نحن ما عندنا أعصاب لإعادة الكورة للحارس.
• ولا بنستحمل.
• نحن إعادة الهدف في التلفزيون ما بنستحملها.. وبنخاف الكورة تطلع أو تدق في القائم.
• الهلال سوف يلعب أمام صن داونز في الخرطوم وسوف يلعب أمام الأهلي في القاهرة.. ما عاوزين نشوف هذه الظاهرة.
• وبالمرة كدا ما عاوزين نشوفها برضو أمام القطن.. لا في الكاميرون ولا في السُّودان.
• أحسن الأمور تبقى واضحة.
• وظاهرة.
• طبعاً ما عاوز اتكلّم عن الانقلابات العسكرية.
• ولا عاوز اتكلّم عن الخيانة… الموضوع واضح .. وما فاضين للصغائر دي.
• وأظن كدا الرِّسالة وصلت!!
• لكن عادي ممكن نرجع.
• ……………..
متاريس
• مُباراة الغد أمام القطن الكاميروني.. أهم مُباراة للهلال في المجموعات.
• نسأل الله التوفيق.
• ما تفرِّطوا في السّاهل.. وتجيبوا الصعب.
• التعادل بكرة كعب مع الهلال.
• لكن في كل الأحوال.. لا بُدّ أن نتقبّل النتيجة.
• اتعاملوا مع أي نتيجة بعقلانية.
• أصلو ما بنخسر حاجة.
• الطريق طويلٌ.
• والكورة فيها الحلوة والمُرّة.
• وبكرة إن شاء الله برضو حلوة.
• الله يديم الأفراح.
• في رجب انتصر الهلال.
• وفي شعبان كذلك إن شاء الله.
• وفي رمضان ح نكمل بالأهلي.
• يا ناس الأهلي جهِّزوا من هسع (شمسكم).
• الهُدوء والتّركيز والثقة.. هذه العوامل هي عوامل الانتصار في أيِّ مباراة.
• فلوران ح يلعب كيف أمام القطن؟
• الزول دا كل مرة بنتفاجأ منو بي حاجة.
• بالتوفيق للهلال.
• المريخ ركّز مع الأهلي أكتر من بلوزداد!!
• لذلك مباراة المريخ غداً أمام الفريق الجزائري ح تكون مُشكلة للمريخ.
• اسمعوا كلامي.
• وما تتغالطوا كتير.
• الكهرباء في إستاد المريخ قالوا مقطوعة.
• وين حميدتي؟
• …………
• ترس أخير: بكرة فرحة تانية إن شاء الله.
بارك الله فيك يا ود عبد الماجد، كفيت ووفيت كلامك درر، وكان على موضوع الخونة فده كلام موضوعه مقضي الشغلانة جارية في الدم، وطالما أخونا السمسار داااك سايق الحلامبشة من إضنينهم وموديهم يمين وشمال، فعادي ممكن الحلامبشة بكرة يطالبوا بتسليم حلايب للحلبة الشغلانة فيها برضو علاقة قرابة قديمة من زمن أجدادهم. 😂😂😂
أضرب يا ود عبد الماجد يا هاريهم وكايدهم، أضرب العبوب ضربهم الجن…!!