جابوا ليهم (نقطة) من سنار وبتكلموا عن (المنطق)

• يوم الهلال يكون عندو (مباراة)، بنقعد نحسب فيها، ونضع كل الاحتمالات.
• يمكن.
• واذا مرت نص ساعة وما جاء قون.
• العمل شنو؟.
• واذا احتسبوا ضد الهلال ضربة جزاء.
• كيف العمل؟.
• احتمال.
• تحسبها بالسيسي.
• وما تخلي شيء.
• تنزل بالواحد.
• وتطلع بالاصانصير.
• تحضر كل (الظروف) وتجيب كل الاحتمالات.
• وبرضو تطلع ما فاهم شيء.
• وقت الهلال يكون عندو مباراة.
• نقفل باب الشارع.
• بيجيك احساس لو انك خليت باب الشارع فاتح – الهلال ممكن يتغلب.
• ترش الحوش.
• احساس برضو.
• او عدم موضوع.
• او محاولة للالهاء.
• لتبديد الوقت.
• تذكر يوم داك، وقت رشيت الحوش الهلال غلب خمسة.
• تجرب أي شيء.
• تطمبجها.
• وتسترجع التاريخ كله.
• تقيف تحت الشجرة.
• حالة من (القلق) الحميد.
• الوقوف تحت الشجرة ، بشيل (التوتر).
• لو عملت لي نظرية زي دي – ببقى ما بسأل في فرويد.
• فرويد شنو كمان؟.
• فرويد ما عندو أي شيء.
• فاكيها في نفسو ساكت.
• نحن ذاتو ما ساهلين.
• زمان وقفت تحت الشجرة الهلال غلب اربعة.
• وقت الهلال يكون عندو مباراة.
• بينتابك (شعور) فوضوي كدا ، يحوم فيك بدون استئذان ، تحس بيه في (شفع الحلة) ، وفي (جنيات) المدارس.
• في حصة الرياضيات.
• واللغة العربية.
• وفي فسحة الفطور.
• في الفول.
• والخدرة.
• النسيم ذاتو اليوم داك بكون عندو طعم براهو.
• زي بارد ، وما بارد.
• بتراوح ليك ..بين بين.
• تفتح الشباك.
• تقفل المروحة.
• ترجع تفتحها تاني.
• تحس انك لو خليتها (مقفولة)، الهلال يمكن يتغلب.
• ما في طريقة.
• ما بتخلي حاجة للظروف.
• بتسد كل الثغرات.
• كل الاحتمالات الغريبة.
• المنطق شنو؟.
• لو عندك مليون جنيه عاوزها تبقى 10 مليون جنيه اتبرع بيها.
• قدمها صدقة.
• الصدقة بعشرة أمثالها.
• ولو عاوزها تروح ساكت، أكلها (باسطة).
• قون بشة في اكوا يوناتيد زي (الصدقة).
• قون بي عشرة.
• صعد بينا للمجموعات.
• وعاد للهلال بحافز يصل لـ 275 الف دولار بعد التأهل.
• غير الحاجات التانية.
• وقت الهلال يكون عندو (مباراة) ، بتحرس (الساعة).
• تعاين ليها بي استغراب ، زي الشيء الغريب.
• راجي ليك شيء مهم.
• تلبس نعالك.
• ترجع تطلعها.
• حتى لو كان الهلال سوف يلعب أمام مريخ كوستي او حي الوادي نيالا.. بتكون ما اعتيادي.
• في حاجة.
• عندك شيء كدا.
• تفطر وما تفطر.
• تتغدى وما تشعر بذلك.
• فرحان.
• ومنتظرها تمغرب.
• تمرق ليك مشوار بدون هدف، عشان تكتل الوقت.
• عشان ترجع وتلقاها مغربت.
• لكن هي بتمغرب بي ساهل.
• واول ما تمغرب ، القعدة كمان تغلبك.
• ولمن الهلال تكون عندو مباراة مهمة ومصيرية زي مباراة أمس الاول أمام اكوا يوناتيد، ما بتعرف تعمل شنو؟.
• دا كلام تاني.
• تمرق من روحك وتدخل ليها بدون ما تشعر.
• تخش في جلابية كبيرة، احساس انك (واثق) من الهلال.
• لكن مع ذلك تشاكل أي زول.
• البلاقيك كلو.
• وما ترد على التلفون.
• وتمشي على (التلاجة) عشرين مرة.
• وما تشرب.
• تقيف فيها، وما تعرف انت الجابك هنا شنو؟…مع انك (عطشان).
• ترجع من غير ما تشرب.
• تذكر.
• تمشى تاني للتلاجة.
• ما تعرف الجابك ليها شنو؟.
• تفتحها المرة دي.
• تعاين في بطن التلاجة ، وترجع تاني.
• ما تشرب.
• ترباس شرب، الهلال استقبل 3 اقوان.
• تعاين للتلفون.
• بتلقى في 15 مكالمة (لم يرد عليها).
• ديل عاوزين شنو؟.
• تفكر تمشي ليك صالون حلاقة.
• المرة الفاتت وقت الهلال كان عندو مباراة ، مشيت الحلاق.
• الهلال غلب اربعة.
• تقعد تفكر في الاحتمالات الكعبة.
• الليلة الهلال لو طلع من البطولة تعمل شنو؟.
• تودي وشك وين من الناس؟.
• المريخاب بيشمتوا فينا.
• قوة عين المريخاب اصلها ما قابلتني.
• يطلعوا من (التمهيدي).
• ويسخروا من الهلال عشان اتأهل للمجموعات بعد الخسارة بثلاثية.
• تفكر.
• تجرب الاتجاه التاني.
• تقول أنا الشارع دا وقت أمشي بيه الهلال أصلو ما قاعد يغلب.
• تغير الشارع.
• وأول ما تشوف (حسنين) واقف في بداية الشارع ، تخلي ليه الشارع.
• تقول في نفسك ، انا حسنين بي راسو الكبير دا قدر ما اقابلو ، الهلال بطلع مغلوب.
• تزوغ من حسنين.
• تعمل فيها ما شايفو.
• وحسنين يشعر بالحتة دي.
• لكن ناس الحلة كلهم بيعذروك اليوم داك.
• وقت الهلال يكون عندو مباراة ما في زول قاعد يلومك.
• ما في زول بقول ليك شيء.
• تخش البيت.
• وتطلع.
• وتاني تخش.
• يجيبوا ليك (بامية مفروكة) …نفسك تاباها.
• وقت الهلال يكون عندو مباراة ما تاكل (البامية المفروكة).
• اسمعوا كلامي دا.
• يوم الهلال يكون عندو مباراة ، ابعدوا من البامية المفروكة.
• والعدس.
• والقرع.
• قاطعوا الحاجات دي.
• ما حصل أكلت لي قرع او عدس او بامية مفروكة ، الهلال طلع غالب.
• تتوهم عديل كدا.
• تجيب (الجرايد) كلها اليوم داك.
• بما في ذلك جرايد المريخ.
• تشوف ناس سلك ومزمل وكابو قالوا شنو الليلة.
• ما عندهم موضوع.
• طلعوا من (التمهيدي).
• بتفرجوا على الهلال.
• منتظرين الهلال يطلع.
• تقرأ صحف الهلال.
• تشوف رمضان احمد السيد كاتب شنو؟.
• توقعو !!؟.
• احساسو كيف بالمباراة؟.
• تقرأ لخالد عزالدين.
• خالد بمنطق ليك المباراة.
• بطمئنك.
• ما تخلي ليك عمود.
• لكن برضو ما بتفهم شيء.
• يغلبك تكمل (العمود).
• تمشي الصفحة العالمية.
• تقرأ العناوين.
• تقول أحسن الجرايد دي أخليها بعد المباراة.
• ملحوقة.
• هسع والله ما عندي ليها اعصاب.
• تفتح الراديو.
• تسمع محمد وردي بغني في (الوصية).
• خلاص الهلال غالب.
• ما حصل وردي غنى (الوصية) ، والهلال طلع مغلوب.
• لكن (وصية) وردي ، هي وصية نصاح.
• تمشي الدكان.
• عشان تكتل الزمن.
• تجيب ليك طحنية وزبادي.
• نفسك في طحنية وزبادي قبل المباراة.
• تجيب الطحنية.
• وتجيب الزبادي.
• لكن لا بتاكل الطحينة ولا بتاكل الزبادي.
• ما عندك نفس.
• ولا بتقدر تاكل.
• أول انت جبت الطحينة والزبادي عشان تاكلهم.
• أبداً.
• بس عاوز تكتل بيهم الوقت.
• والزبادي ما مضمون.
• الزبادي بغلبنا.
• وقت الهلال يكون عندو مباراة صعبة ، بتحصل الحاجات دي.
• تركب التلفون في الشاحن.
• والشاحن ولا بيشتغل.
• تغيّر (الكوبس).
• تجدع الشاحن.
• أصلو الشواحن الصينية دي ما نافعة.
• تجيب ليك ليمون.
• وتطلع ليك قالب تلج من التلاجة.
• تقطع الليمون.
• وتطلع السكر.
• وتشغل الخلاطة.
• تخلط الليمون.
• ما تلقى المصفاة.
• تقلب المطبخ دا قلب.
• تصفي الليمون.
• ولا تقدر تشربو.
• ترجعو التلاجة.
• وقت الهلال يكون عندو مباراة ، أصلك ما بتقدر تشرب ليك عصير ليمون.
• كفاية انك قدرت تعملو.
• لكن تشربو.
• لا.
• ما بتقدر.
• الهلال عندو مباراة.
• تعاين للضل.
• تلقاه واقف في حتتو.
• وتلقى ليك مريخابي يقعد يغالط فيك من الساعة السادسة صباحاً.
• وهم طلعوا من (التمهيدي).
• مع ذلك بيقعد يغالط فيك.
• المريخاب جابوهم بس للغلاط.
• أمس الأول وقت الهلال جاب القون الاول ، مشينا جبنا اللبن.
• أنا ما عارف (ترباس) عمل شنو؟.
• رجعنا لقينا اكوا جابوا ليهم 3 أقوان.
• يا جماعة ، ديل يتصرفوا معاهم كيف؟.
• تفتح قناة الهلال تلقى الديبة قاعد يتكلم.
• الزول دا قاعد يقول في شنو؟.
• تخش النت – تلقى هجمة خطيرة.
• جمعة ينقذ هدف مضمون.
• والحكم ما مضمون.
• تعاين للمروحة.
• طيب هسع في الوضع الزي دا الواحد نتصرف كيف؟.
• نعمل شنو؟.
• تقفل التلفون.
• أي (جرس) في الوقت دا (هوا).
• ديل لو جابوا (الرابع) نحن وين نقبل؟.
• نمشي وين؟.
• مالها (الدقائق) واقفة.
• والزمن (حارن) في الدقيقة 30.
• باقى ربع ساعة.
• نتصرف كيف؟.
• ترجع قناة الهلال ، تلقى (الديبة) قاعد يتكلم.
• ما بتفهم أي شيء.
• تقول أحسن أشوف موقع كووورة – الحاصل شنو؟.
• تلقاها لسه 3 / 1.
• تقعد تفكر ، لو الهلال طلع ، نعمل شنو؟.
• أي دمعة حزن لا لا.
• زي جماعتنا ديك.
• لا الكلام دا نحن ما بنفع معانا.
• لا دمعة ولا بامية مفروكة.
• نشارك في (سيكافا).
• معقولة بعد العمر دا نلعب في سيكافا.
• أبداً والله – نحن حاجات زي دي ما بنعملها.
• نقول الحكم !!..
• وألّا (اوسكار) الكاردينال.
• قعدنا نفكر في المبررات.
• ليه محمد الطيب ما أشرك شيبولا.
• وليه لاعب بـ (5) مدافعين هو لاعب في الكامب نو.
• غايتو محمد الطيب كان يشيل شيلتو معانا.
• فريقو اتقدم بالهدف الأول وما قادر يتأهل.
• لكن الحمدلله ، الهلال اتأهل ..وما احتجنا للحاجات دي.
• ………….
• ملحوظة : الناس وصلوا المجموعات وناس المريخ بتكلموا عن شكوى ود هاشم سنار.
هوامش
• ناس ود هاشم سنار لو عندهم شكوى في التش ..كلموهم يقولوا الزول دا سجلوه بي 4 مليار جنيه.
• 4 مليار التش.
• و4 مليار احمد آدم.
• وراجعين ليكم بي نقطة من سنار.
• والنقطة ذاتها ود هاشم بيقالع فيها.
• حالتكم صعبة.
• مع ود هاشم بتعملوا كدا ..البطولة العربية كيف؟.
• انتوا ما بتفتروا من (التمهيدي).
• طلعوا من (تمهيدي) البطولة الافريقية.
• ودخلوا تمهيدي البطولة العربية.
• عينكم (حجر) بس.
• وابقوا على سفر.
• ………..
• عاجل : في البطولة المحلية بتجمعوها نقطة ..نقطة في البطولة العربية كيف؟.