داليا الياس والناس الضحكتهم زي (العطسة) !!
قزاز ورذاذ
محمد الطيب الأمين
داليا الياس والناس الضحكتهم زي (العطسة) !!
* الفترة التي تقع ما بين (المغرب والعشاء) أول أيام العيد هي أكثر فترة حزينة ولا أعرف ما السبب في ذلك ..
* ربما يكون حزننا في أول ليالي العيد سببه فرحة الشياطين بمناسبة إطلاق سراحهم والله أعلم ..
* كل الأجهزة الموجودة في السوق هي (صينية) تقريباً ..
* ولذلك كل (محلات صيانة الأجهزة) تعمل (24) ساعة في اليوم ..
* محلات صيانة الأجهزة تعمل علي مدار الساعة لإستقبال (الحالات المتأخرة) من الأجهزة الصينية ..
* عندنا في البيت (مكوة كهربة) صينية بنوديها لبتاع الصيانة مرتين في اليوم الواحد ..
* مكوة يا كافي البلا أ تقول عندها (جرح سُكري) ..
* بنوديها الصباح (نغير ليها) وبنجي نكوي بيها (قميصين) وتاني المساء بنوديها (للغيار) ..
* حاجة تكسف والله ..
* الصبر هو أن تشاهد (كراع الخروف) معلقة في الجزارة ثم تذهب وتشتري (نص كيلو بطاطس بـ 15جنيه) ..
* لما تشوف منظر (الضأن) معلق في الجزارة الدنيا دي بتمسخ ليك ..
* شكلنا كده مكتوب علينا نشوف (اللحمة) وما نشيلا ..
* وبما أن ذلك كذلك يجب أن نشبع (شوف) في اللحم قبل أن يصبح (الشوف) بالشئ الفلاني ..
* أدينا حق العين في اللحمة وباقي حق اللسان ..
* اللحمة بقت لينا زي كأس العالم (نشاهد ولا نشارك) ..
* وجع يا مولانا وجع ..
* طوال أيام العيد كنت أتحاشى فتح (الحنفية) خوفا من أن تطلع منها داليا الياس ..
* والله صحي ..
* داليا الياس هي مثل هدى عربي ظهرت للناس بعد ما بقت كبيرة ..
* ولذلك هي تجتهد في الظهور وتحاصر الناس في الاذاعات والصحف والقنوات والقروبات (ربما هي في صراع مع الزمن) ..
* كل الذي اقوله أن قصائد داليا الياس لو كتبها رجل لما ظهر في القنوات والإذاعات والمنتديات بهذه الكمية..
* وللضمان كده أقول (كثرة الطلة) لن تصنع من داليا الياس روضة الحاج ولا نضال حسن الحاج ..
* وغايتو جنس غايتو ..
* كانت الأغنية تقول : (الليل الليل العديل والزين .. الليلة العديلة تقدمو وتبرا) ..
* ولأن فكرة الناس عن الزواج (قاصرة) تحولت الأغنية فأصبحت : (الليل الليل العوير والشين .. الليلة البايرة تدقسو وتبرا) ..
* تري كم (عوير) دقس في هذا العيد السعيد ؟؟
* عموما مبروك لكل زيجات العيد ويارب بيت مال وعيال ..
* أغلى أنواع (الرزق) هي (العافية والصحة) ..
* الصحة تأتي بالمال ولكن ليس في كل الأحوال المال يجلب العافية ..
* في ناس يتذمرون ويشكون من (كترت العافية) و (إنبساط الجسم) وفي ناس يتذمرون ويشكون من إرتفاع سعر (العجلة) أو (الكرسي المتحرك) الذي هو (بدل فاقد) لاجسامهم التي لا تقوى علي الحركة ..
* إذا كنت تأكل وتشرب وتضحك وتتحرك باقدامك عليك أن تشكر الله علي هذه النعمة الغالية وأعلم أن هذه كله مجرد أمانة ..
* يشهد الله أنا قابلت ناس لما يضحكوا بتعبوا ..
* حتي الضحك بيرهقهم ..
* الضحك يحتاج للياقة وهؤلاء (الضحكة) عندهم مثل (العطسة) ..
* إحنا محتاجين نتدبر النعم ونحمد الله ونعرف إنو العافية العندنا وما عند غيرنا هي منحة وكرم من الله ..
* وبالمناسبة ..
* زمان كانت (القحة) أفضل من (صمة الخشم) ..
* وبعد إرتفاع سعر الدواء أصبح علاج (القحة) يحتاج لرأس مال ..
* ولذلك (صمة خشم) أفضل مية مرة من القحة ..
* وعلي فكرة ..
* من أكثر الأشياء التى تعجبنى عند البنات هي (النزلة) ..
* النزلة يعنى الألتهاب ..
* تاريخيا أنا بحب (النزلة) عند البنات وذلك دون أسباب واضحة ..
* إذا عرفت سبب ذلك لن أبخل به على القارئ الكريم بأذن الله ..
* من مقومات نجاح المذيعة : البدرة والديانا والتوب المزخرف وتعطيش حرف الجيم ..
* وأظن أن (مقومات هذا النجاح) في متناول يد الجميع ..
* أسهل حاجة البت تبقي مذيعة أو فنانة ..
* وأعتقد أن الفرصة كبيرة أمام (بنات حلتنا) للإلتحاق بالقنوات والإذاعات ..
* أعتقد ذلك ..
* وأي زول طبعا حر في (إعتقاداتو) ..
* الأستاذة سعاد الفاتح عضو البرلمان قالت قبل فترة أن هنالك نقص حاد في عدد (الدايات) بولايات السودان المختلفة ..
* تصريح الأستاذة سعاد يؤكد أن كل (الدايات) شغالات داخل الخرطوم وهذا مؤشر على أن (الولادة) في طريقها أن تصبح (حصريا) داخل العاصمة ..
* نقول للأستاذة سعاد التي تشكو من نقص الدايات : ( كترت الدايات بتكسر رأس الجنا) ..
* وغايتو جنس غايتو ..
* (السمار هو نصف الجمال) ومع ذلك تفسخ حواء وجهها رغم أنف (الخدرة) ..
* غني وردي عليه الرحمة: (في اللون الأسمر ذوبت شبابي) وقصد بذلك أن يوصل لحواء رسالة المحافظة علي لونها بعيدا عن (البوماستيك) ..
* ولكن لا حياة لمن تغني يا وردي ..
* جنس جلخ ..
* يا أستاذة : كل ما أضرب ليك بلقاك في (ركشة) أنتي (جوكية) ولا شنو ؟؟
* و..و..
* وأنا بيك سعادتي مؤكده وبلاك حياتي …(تحنن الكافر) ..
تطبيق كورة سودانية لتصفح أسرع وأسهل
لزوارنا حمل من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app
