دم الشهيد بي كم…كيس الرغيف بي كم؟؟؟

في السلك

بابكر سلك

دم الشهيد بي كم…كيس الرغيف بي كم؟؟؟

*نعلم ان سوء الادارة في العهد الغابر هو ما اورثنا ضنكا لايحسدنا عليه اعظم حاسد في الكون
*لكن كمان لما تزيد الضغوط بسبب سوء الادارة او الاهمال او عدم الكفاءة في عهد مابعد الثورة
*تبقي القصة محبطة حد الاشباع
*ثورة لم يستشهد شبابها عشان تفشل الادارة الجديدة للبلد في استعادة كرامة المواطن واشباعه
*وترمي ذلك بكل بساطة علي النظام البائد
*وينعم وزراء العهد الجديد بمرتبات تفوق المائة وخمسين مليون في الشهر
*ويفشل محمد احمد في توفير نفس المبلغ ليشتري حذاء لابنه ودواء لامه ووجبة غداء للاسرة

*اسرة اذا بتتعشي بوش محتاجة لسبعمائة الف جنية ياحمدوك
*معاناة في كل مناحي الحياة
*لاخطط تعيننا علي الصبر
*ولا استراتيجيات نضمن معها حياة كريمة لاجيال قادمة
*وقد تكون تلك الاجيال قادمة من المهجر
*لانو بالطريقة دي الناس القاعده هنا ما بتساعدها لياقتها علي انتاج اجيال قادمة
*نموت وتموت اجيالنا داخل اصلابنا
*ماعندنا مانع
*بس السودان يصبح قبلة للاجيال القادمة ولو من الواغ الواغ طالما كانت سودانية تحفظ النسل وتنتمي للوطن
*القصة كانت ماقصة رغيف
*لكنها اصبحت قصة رغيف يا برهان
*وقصة جوع
*وقصة اساسيات حياة
*وقصة ثورة
*والقصة الاخيرة دي هي القصة الوحيدة البتتحكي ولسة ما انتهت
*لانو الثورة مابتنتهي
*ايها الحكام
*نفض الشعب الغبار عن وطنيته عند الثورة
*فلماذا تكيلون التراب ارتالا علي وطنيتنا من جديد؟؟؟؟
*انه هدوء
*ولكنه يحمل في طياته انفجارا لن تتحمله التاتشرات ولا المؤشرات
*ولا البنك الدولي
*دقيق ووقود وكهربا مستقرة وموية في المواسير
*دي دايره درس عصر؟؟؟؟؟
*علي كل
*فشلكم لن يعيدنا لعهد السوء ولن يدفعنا للندامة عليه
*ولن يثنينا عن ثورتنا
*ولن يبقيكم علي هاماتنا
*طالما فشلتم
*ولن نقل نجحتم
*لانهم سيسألونا في ماذا؟؟؟
*وعندها سيقف حمار شيخنا في عقبة الواقع
*ايها الناس
*دم الشهيد بي كم وكيس الرغيف بي كم؟
*ايها الناس
*تمضي المسيرة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*دي ياها المن اجلها الشباب استشهد لينا
سلك كهربا
ننساك كيف والكلب قال كنتوا تشاكلوا في وزنو وفي تمنو بقيتوا كايسنوا باي وزن اي سعر؟؟؟
والي لقاء
سلك