ربيكا للذكرى وهدفين للتاريخ !!

قزاز ورذاذ

محمد الطيب الأمين

ربيكا للذكرى وهدفين للتاريخ !!

* زمان كانت عناصر الجمال ثلاثة : (الخدرة والماء والوجه الحسن).
* وبما أن كل حاجة في البلد زادت فقد أصبحت عناصر الجمال أربعة : (البُدرة والبرادو والجُزلان وقون محمد عبد الرحمن) .
* الغربال جاب ليهو قون زي (جيت الكهرباء).
* ماشاء الله تبارك الله.
* قبل أن (تكتل) حكومة الإنقاذ مشروع السكة حديد كان القطر (المشترك) بمشي مدينة نيالا مرتين في الشهر.
* والكيزان (كتلوا السكة حديد ومشوا في جنازتها) .
* القطر ذاتو شكلهم باعوهو.
* الآن (الفيفا) قاعدة تصدر قرارات ضد المريخ كل (١٥) يوم .
* مرتين في الشهر .
* علاقة المريخ بالفيفا تشبه علاقة (القطر) بالحبيبة نيالا.
* الفيفا بقت شغالة قصاد المريخ .
* أي (تلفون يرن) في الفيفا ستجد المتصل عايز يشكي المريخ .
* الفيفا عرفت المريخ بالشكاوى وليتها عرفتهم بكرة القدم .
* شُهرة الشكاوي الله لا يكتبها لنا .
* وغايتو جنس غايتو .
* أي توليفة لمنتخبنا الوطني تخلو من (عيد مقدم ومحمد أحمد ارنق ونزار حامد) هي توليفة ناقصة ومنقوصة .
* عيد مقدم يفرض نفسه الآن كخيار بالغ الأهمية في المرحلة القادمة .
* الأخ برقو بدلاً من أن يفكر في إعادة رمضان عجب الذي أساء السلوك وخان العهود عليه أن يركز مع عيد ونزار ومجاهد فاروق وسليم برشاوي.
* في هذا التوقيت سيكون عيد مقدم أفضل للمنتخب من رمضان عجب .
* أما محمد الرشيد فهو ليس أفضل من بوغبا أو نزار حامد أو حتى صلاح عادل.
* المنتخب منتخب البلد والبلد ما واقفة على عجب والرشيد .
* المنتخب يجب أن لا يحمي الذين لا يحترمون العهود والعقود .
* لا نريد التحايل على القانون عن طريق المنتخب الوطني .
* عشان المنتخب ده يمشي لقدام يا برقو أحسن تبطلوا المجاملات .
* حاجة تكسف .
* قد لا يصدق أحد أن الحكم الزامبي حمادة هو أول حكم في تاريخ أفريقيا يصل السودان وهو يحمل هاتف (ربيكا) ، ثم يعود هذا الحكم لوطنه وهو يحمل (جلاكسي ومركوب نمر ولابتوب) .
* جانا بربيكا ورجع مننا بجلاكسي ومركوب نمر ولابتوب.
* علماً بأن هذا الحكم جا وأدار مباراة إفريقية للمريخ .
* طبعاً المريخ فاز في تلك المباراة وقد سافر الحكم حمادة عن طريق صالة كبار الزوار.
* الموضوع ده كلو أنا بتهمني فيهو حاجة واحدة بس : الزول ده شال معاهو الربيكا ولا خلاهو هنا للذكرى؟
* حالة صعبة .
* لا نتدخل في الأمور الفنية ولكن المنطق يقول أن جيسي وفيني يحتاجان لفرص أكبر.
* إذا كان زوران ينتظر أداء أفضل لهذا الثنائي في المجموعات يجب عليه أن يستمر في اشراكهما محلياً .
* توقف جيسي عن الكرة قبل شهر رمضان السابق وكذلك فيني وعودتهما للفورمة أمر ليس بالسهل .
* الكنبة ما بترجع الفورمة يا زوران .
* المهم .
* قبل انطلاقة دور المجموعات تعاقد المريخ مع طبيب نفسي .
* هو طبيب نفسي لكن إسم الدلع (معد نفسي) .
* المريخ الذي لا يعرف مرحلة الكبار هو بالفعل يحتاج الآن لمعد نفسي بعد أن تجاوز التمهيدي في أكبر إنجاز حدث لهم خلال السنوات الأخيرة.
* المعد النفسي يجب أن يكثف الجرعات حتى يعرف المريخ أن الأندية المشاركة في هذه المرحلة هي أندية موجودة معنا في أفريقيا وعادية جدا .
* واوع تجي تقول لي لوح الشرف وبطيخ .
* كأس مانديلا هو (دورة رياضية) حققها المريخ وهي لا تختلف عن كأس بن ياس إلا في التسمية .
* وتعال أناقشك.
* كأس مانديلا ده المريخ شالوا سنة كم ؟
* ٨٩ صاح ؟ قال أي.
* لعب النهائي مع الأهلي المصري ؟ قال لا .
* لعب مع الوداد ؟ قال لا .
* مع الترجي ؟ قال لا .
* مع الهلال ؟ قال لا .
* قوم على حيلك .
* سبب واحد بيخلي الأهلي المصري يلعب نهائي أفريقيا ضد الهلال سنة (٨٧) ويغيب عن نهائي (٨٩) ما في .
* معقولة فريق لعب نهائي (٨٧) ويغيب عن نسخة (٨٩) ؟
* كأس مانديلا عبارة عن (دورة رمضانية) حقق المريخ كأسها.
* أنت قول (كأس) مانديلا ونحن بنقول (دورة) مانديلا.
* أما حكاية لوح الشرف دي قولوها لزول ما عندو (عمتو) في القاهرة .
* شوفوا ليكم زول ما عندو (كمامة) وقولوا ليهو لوح الشرف .
* شرف ب(القاء) .
* ونركب صافنات ونجيبة (جعلية) واصلو الزول بيموت والذكرى تفضل حية.
* و..و..
* وغدار دموعك ما بتفيد في زول …….. (بشيل سلفية عشان يحلق في الصالون) .