رجع ليهو جنيهين الباقي أقل من شوط !!
بالعربي الكسيح
محمد الطيب الأمين
رجع ليهو جنيهين الباقي أقل من شوط !!
* واحدة من أهم أسباب اشتعال سوق (العجلات) في السودان هي (النجاح في المدرسة) ..
* يقول ليك أبوي قال لي لو نجحت بجيب ليك عجلة ..
* نصف أبناء جيلنا ركبوا عجلات كجائزة للنجاح في احدى الفصول الدراسية ..
* زمان الناجح من الفاشل بتعرفو بالعجلة ..
* البتلقاهو راكب عجلة معناها جا الأول أو الثاني أو الثالث ..
* وللاسر السودانية سياسة وتربية غاية في الجمال ..
* بجيبو ليك العجلة وأول ما المدرسة تفتح برفعو العجلة في رأس الدولاب ويقول ليك : تاني إلا في الإجازة ..
* عجلتك تركبها من الإجازة للإجازة..
* يعني عجلتك ما حقتك أثناء العام الدراسي ..
* وفي ناس أثناء العام الدراسي بيطلعوا ليهم عجلاتهم كل يوم خميس ..
* تذكرت هذه السياسة ومجلس المريخ غير الشرعي يمنع سيف تيري وحمزة داؤود من الإنضمام لتدريبات (المدفور) ..
* محمد الشيخ مدني رفع تيري وحمزة في رأس الدولاب ..
* مجلس المريخ غير الشرعي تعامل مع ناس تيري علي طريقة الاطفال ..
* الطفل لما يكون عندو (كورة) لو ما اختارهو في الدافوري بشيل كورتو ويمشي..
* وهسه محمد الشيخ مدني لو ما جلس في الكرسي بشيل التيري حقو وبيمشي ..
* وغايتو جنس غايتو ..
* كشفت المتابعات وبحسب الصحف الرياضية عن إمكانيات كبيرة لمهاجم الهلال الجديد هارونا ..
* نجاح هارونا في المقدمة الهجومية يعني الكثير ..
* عانى الهلال مطلع هذا الموسم في خط الهجوم رغم وجود اكثر من مهاجم الشئ الذي جعل الاجهزة الفنية (فارياس ، محمد الطيب ) يولفون بشة في الهجوم ..
* الآن نستبشر خيراً بنجاح هارونا ونتمنى أن يشكل إضافة كبيرة لخط الهجوم وللفريق بصورة عامة ..
* قالوا محترفين الهلال بيتصورو سيلفي مع الجوهرة الزرقاء قبل وبعد التمرين ..
* المهم ..
* لولا وجود شداد على رئاسة الاتحاد لتمكن الوزير اليسع في فعل الكثير داخل الوسط الرياضي ..
* سعادة الوزير كان ممكن كل يومين يعمل لجنة تسيير للمريخ ..
* ولكن وجود شداد وانحيازه الواضح والمعروف لاهلية وديمقراطية الحركة الرياضية أفشل كل مخططات الوزير ..
* علي الأخ محمد جعفر قريش أن يتمسك هو ومجلسه بحقهم الشرعي حتي ولو هبط المريخ للدرجة الأولى ..
* المريخ لن ينافس على المراكز المتقدمة هذا العام حتى لو عاد جمال الوالي ..
* دوري النخبة ح يكون مولع نار والمراكز الأولى للكبار بقيادة الهلال وهلال التبلدي ..
* أما مدفور البلد فالمركز الرابع يليق به ..
* وتبكو بس .. عين قطرة وعين مس ..
* أكثر ما لفت نظري في كأس العالم هو قيمة تذكرة الدخول لأندية المشاهدة بالخرطوم والولايات ..
* قيمة التذكرة (10) جنيهات وتصل في بعض الاحياء لـ(15) جنيه ..
* يعني في اليوم (3) مباريات ب(30) جنيه ..
* لحدي ما كأس العالم ينتهي أي زول ح يكون دفع حوالي (700) جنيه من اجل المشاهدة ..
* العشرة جنيه دي ثمن المساطب الشعبية في مباراة هلال مريخ ..
* أصحاب الاندية يريدون ان يصبحوا رجال أعمال من واقع هذه القيمة العالية للتذكرة ..
* في حلتنا وامام النادي صادفتني مشكلة بين زبون وصاحب النادي ..
* الزبون وصل النادي في الدقيقة (12) من عمر الشوط الثاني ومنح صاحب النادي (10) وطالب بالباقي ..
* وصاحب النادي رفض إرجاع باقي باعتبار أن قيمة التذكرة (10) جنيه ..
* والمشكلة دورت ..
* ده يقول رجع لي وداك يقول ليهو ما برجع ليك ..
* قال ليهو ما بترجع لي ليه والمباراة في الدقيقة (12) من عمر الشوط التاني ؟
* المهم أثناء الجوطة دي في واحد من العقلاء أدخل وقال لصاحب النادي : ياخ رجع ليهو جنيهين الباقي أقل من شوط ..
* وغايتو جنس غايتو ..
* لأول مرة من قلوبنا تمنينا المشاركة في بطولة سيكافا ..
* الهلال في الأصل (بيعاف) من سيكافا واخواتها ..
* بنعاف منها عديل ..
* سيكافا عندها ناس والهلال ما من ناسها ..
* ولكن هذه المرة تمنينا المشاركة لأنها ستخدم اعداد الهلال ..
* أضاف الهلال ثلاثة أجانب فضلا عن فارس ودخول اكثر من لاعب شاب للخدمة ..
* هذه الكوكبة لو شاركت في سيكافا تستطيع أن تقدم الكثير وتستعد بصورة ممتازة لمتبقي مباريات المجموعات ودوري النخبة ..
* مشاركة الهلال مهمة وبالعدم يجب أن يخوض الفريق عدداً من المباريات الودية الكبيرة لاختبار القوة ووضع الفريق في أعلى درجات الحاهزية ..
* تعاقد أهلي الخرطوم مع المدرب محمد عبدالله مازدا ..
* واضح أن الأهلي قرر الهبوط من الممتاز ..
* حاجة تكسف ..
* لا أعرف هل إنضم تيري وحمزة امس لتدريبات المريخ أم لأ ولكن في كل الأحوال عندي مقترح ..
* بقترح تيري يرجع يتمرن مع الخرطوم الوطني لحدي ما يقضي الله أمراً كان مفعولا ..
* هكذا بقترح ..
* وأي زول طبعاً حر في ( مقترحاتو) ..
* أتوقع إنو جمال الوالي بكرة يمنع أي لاعب سجلو من التدريبات ..
* تاني تمارين المريخ ح تكون بالعناصر التي سجلها سوداكال وعددهم خمسة لاعبين ..
* لو أي زول شال اللاعب السجلو ح يكون ما في مريخ ..
* وغايتو الله يكفينا شر (المصدي) اللمعتو الأيام ..
* ونركب صافنات ونجيبة (هدندوية) واصلو الزول بيموت والذكرى تفضل حية ..
* و..و..
* واتعلمنا من ريدها ….(أكل الفشار) ..
تطبيق كورة سودانية لتصفح أسرع وأسهل
لزوارنا حمل من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app
