ريحة السجائر في الستائر !!
بالعربي الكسيح
محمد الطيب الأمين
ريحة السجائر في الستائر !!
* التخلص من (الكيف) بعد (الإدمان) أمر في غاية الصعوبة .
* لما تخلي (القهوة) بعد (١٨) سنة ح تتعب جدا .
* لما تبطل (تمباك) بعد (٢٢) سنة ح تعاني .
* قرار الإقلاع عن (الكيف) يحتاج لقناعة وشجاعة وقوة قلب .
* كان عندنا بلدياتنا مدمن سجائر .
* بشرب سجائر (٣١) سنة.
* وفي النهاية قرر يبطل .
* اليوم الأول عدى .. وهو من الصداع رابط رأسو.
* اليوم التاني عدى .. وأخلاقو بقت في طرف نخرتو .
* اليوم التالت عدى .. وعيونو بقت صغيرة ومحمرة .
* في اليوم الرابع جاب ليهو (مُبخر) مليان جمر ، وجاب علبة سجائر .
* بقى شغال (يفت) السجارة في المبخرة ويتبخر.
* على طريقة بخور الصندل والتيمان والقرض أيام كورونا .
* تجي داخل عليهو في البيت تشم ريحة السجائر حتى في الستائر .
* تسألو : يا فلان رجعت للتدخين ولا شنو ؟ يقول ليك : أبداً .
* طيب الريحة دي شنو ؟ يقول : عملت السجائر بخور .
* ليه ؟ يقول ليك : والله اشتقت ليها .
* وبما أن ذلك كذلك فإن ما يحدث مع جماهير المريخ هو شئ يشبه (بخور السجائر) .
* والله صحي.
* جماهير المريخ (أدمنت) جمال الوالي (١٤) سنة .
* وبعد الإقلاع .. اليوم الأول عدى.
* اليوم التاني .. جابوا بندول اسمو (سوداكال) .
* لكن سوداكال ما شال ليهم الصداع .
* إمبارح جابوا ليهم (مُبخر) وقاموا على (المساير) .
* مساير جمع (مسيرة) .
* أو قل (مسيرات) جمع (مسرة) .
* أو قل البعجبك.
* شفنا مسيرة الأمس، سألناهم : مالكم ؟ قالوا : اشتقنا للمسيرة والله .
* في زمن جمال الوالي الجماعة ديل ادمنوا (المسيرة) .
* المسيرة عندهم بقت زي السجارة .
* لو ما طلعوا مسيرة بيت جمال الوالي الواحد بجيهو صداع .
* وتعال اناقشك.
* جمال الوالي كان بيستقيل في السنة مرتين .
* المرة الأولى بعد المريخ يطير من التمهيدي.
* والمرة التانية بعد الهلال يفوز بالممتاز.
* كل سنة كده .
* مرتين في السنة .
* زي تطعيم الأطفال.
* وكل استقالة تعقبها مسيرة ، وبعد كل مسيرة بيرفع الاستقالة .
* (١٤) سنة نحن في الحالة دي .
* أمبارح جماهير المريخ اشتاقت للمسيرة.
* عملوا مسيرة لمقر الإتحاد العام.
* الغرض من المسيرة شنو ؟
* الشوق وما في غيرو .
* تعملوا مسيرة ولا تعملوا رحلة سوداكال ده قاعد وح يكمل فترتو وبالقانون.
* وشداد ما ح يشتغل بيكم الشغلة .
* ما تتعبوا ساي .
* ونحن ننصح الأخ آدم سوداكال بأن يرتب حال عضويته من الآن استعدادا للانتخابات.
* اصلو ما تخلي المريخ يا سوداكال .
* جمال الوالي ما احسن منك عشان يقعد ١٤ سنة .
* انت احق من جمال الوالي .
* الوالي جابو المؤتمر الوطني وانت جابك الصندوق .
* وشن جاب لجاب ؟
* خليك قاعد .
* فترتك تنتهي وتاني اترشح.
* ما تسمع الجوطة دي .
* ما في مسيرة بتشيل ليها رئيس منتخب .
* ديل بيحلموا ليس إلا.
* المهم .
* كل المطلوب من الهلال أن يدعم صفوفه من المريخ .
* اصلا المريخ فيهو تلاتة لاعبين بس .
* التلاتة ديل نشيلهم ونريحهم.
* ده ما وقعت مثاليات .
* ده زمن الكاش .
* لابد أن يدخل الهلال في مفاوضات مباشرة مع هذا الثلاثي اليوم قبل الغد .
* أي لاعب في المريخ عندو رغبة يلعب في الهلال .
* دي ما دايرة ليها درس عصر .
* وأي لاعب من الهلال مشى المريخ ده زعلان داير يتفشى.
* حققوا رغبة بعض اللاعبين بالمريخ وسجلوا النافع منهم .
* والرهيفة تنقد .
* و..و..
* والشوق غلب .
[1:02 PM, 9/13/2020] رفيده:
