بالعربي الكسيح
محمد الطيب الأمين
سبعة وثامنهم الكاردينال !!
* أكثر ما كان يشغل أهل الفلاح والدين والصلاح هو (حسن الخاتمة) ..
* وحسن الخاتمة هو من الأمور الصعبة جداً ..
* قد تكون على خلق ودين وعمل صالح فيختم عليك الله بسيئة تهوي بك في نار جهنم ..
* والعكس هو الصحيح ..
* وأهل المناصب والقامات لا يزعجهم شيء أكثر من سقوطهم في نظر الناس ..
* سقوط الكبير في نظر الناس شيء يدعو للانتحار ..
* عندما يضعك الناس في مكانة رفيعة يجب أن تظل في هذه المكانة مهما كان الثمن ..
* (الرفعة) التي يضعك فيها الله ثم يشهد عليها الناس يجب أن تكون أنت أحرص عليها من غيرك ..
* وبعض الناس في الحياة يعانون من عدم توفيق رباني يظهر في كل ما يتعلق بهم بشكل يشبه سوء الخاتمة ..
* ولعل الكاردينال رئيس الهلال يعاني من عدم التوفيق هذا وهو عدم توفيق ظهر في كل تفاصيل الهلال ..
* وهذا سنعود له ولكن ..
* أنا حزين جداً لأن الهلال في ذاكرة الناس هو غير الهلال الفي واقعنا ..
* البعض حمل الحكم الجزائري خروج الهلال والبعض الآخر حمل حسين الجريف ..
* كل هذه مسببات مقبولة ولا غبار عليها ..
* كان للحكم يد في خروج الهلال وكان لحسين الجريف يد أيضاً ولكن هل هذا هو الهلال ؟
* هل أصبحنا نفرح ونهلل لمجرد أن الهلال (نقل أربعة باصات موزونة) ؟
* كيف تقاصر الطموح وبتنا نرضي بالعادي ونعتبره فوق الدهشة ؟
* ليه ؟
* هل الوصل الإماراتي هو الفريق الذي يخرج من مقبرة الهلال مبسوطاً ؟
* وأقسم بالله تلاتة لو الهلال فيهو عافية زي الوصل ده ما يطلع من المقبرة مبسوط ..
* لماذا نعفي إدارة الهلال الهزيلة من كل هذا الذي يحدث ؟
* أليس رئيس الهلال هو الذي سجل الجريف ؟
* في الهلال أصبحنا نفرح عندما نجد شماعة نعلق عليها الفشل ..
* أنظر للكاردينال ومن هم حوله ستجدهم أكثر فرحا بما فعله الحكم وحسين الجريف ..
* لولا الحكم وحسين الجريف لما كانت هنالك شماعة (يتفشا فيها الكاردينال) ..
* الكاردينال يبلغ قمة سعادته عندما يجد جمهور الهلال زعلان من لاعب معين، أو زعلان من المدرب ..
* في الحالة دي الكاردينال بيشطب اللاعب وبيشيل المدرب عشان يكسب تعاطف الناس ..
* مع إنو هو السجل اللاعب وهو الجاب المدرب ..
* سمع الكاردينال إنو الجمهور زعلان من حسين الجريف فقام بشطبه عشان الناس تشيد بالقرار وما تركز مع الكاردينال ..
* إداري ضعيف ..
* حسين الجريف لو ما الهلال بقي هين يفترض بشارع الإستاد ما يجي ماري ..
* ولكن لأن الهلال في عهد الكاردينال بلغ درجة متقدمة من الهوان ظل حسين أساسياً في تشكيلة الهلال …
* وين كان الكاردينال لما دفاع الهلال خمس سنوات قاعد في السهلة ؟
* لشنو ما سجل مدافعين زي الناس عشان أمثال حسين الجريف ديل ما يلبسوا الشعار أصلاً ؟
* لو الكاردينال فاكر إنو شطب حسين الجريف إنجاز يبقي غلطان ..
* أصلاً كيف من الأساس حسين الجريف يكون لاعب في الهلال ؟
* يعني أنت داير تسجل غلط ولما تجي تشطب نعتبرو ليك إنجاز وشطارة؟
* قايلنا أغبياء ولا ما بنفهم ؟
* حسين الجريف لاعب متواضع جداً ولكن الحقيقة الكاردينال أكثر تواضعاً من حسين الجريف ..
* الجريف غلط ولكن غلطات الكاردينال أسوأ من غلطات الجريف ..
* الجريف طيرنا من بطولة يشارك فيها الهلال ولكن الكاردينال دغمس الهلال ذاتو ..
* حسين الجريف هو واحد من أسلحة الكاردينال والشيء من معدنه لا يستغرب …
* باكر لو شفنا عم شبشة أساسي في تشكيلة الهلال لن نلومه ولكن سنلوم الغبي الذي سجله بعد أن بلغ من العمر عتيا ..
* حسين الجريف ما عندو حاجة وما بعرف كورة لكن اللوم علي الجابو ..
* الكاردينال ومجموعته ربما لا يعلمون أن الهلال الحالي لا يحتاج لظلم من حكم ولا من حسين الجريف ..
* الحكم دخل أرض الملعب وفي ذاكرته الهلال القديم فقرر أن يظلمه ..
* قرر يظلمنا ولكنه في الحقيقة لو ساعدنا لسقطنا أيضاً ..
* الهلال بشكه الحالي لو ساعدوه سيدس المحافير ..
* وأصلاً الكاردينال ما خلا محافير ..
* الكاردينال حوله سبعة أشخاص لا بطونهم بتشبع ولا جيوبهم ..
* ونحن عشان سبعة وثامنهم الكاردينال ما ح نضيع الهلال ..
* تشطب الجريف يمشي الكوكي .. المشكلة في الإدارة ..
* الآن أمامنا انيمبا النيجيري فماذا لولا قدر الله حدث ما حدث.. ؟
* و..و..
* وغداً نواصل.
