سِـيكافا دَخَـلَت في (العَضُـم)

صَـابِنَّهَـا
محمد عبد الماجد

سِـيكافا دَخَـلَت في (العَضُـم)

زمان عندنا جارنا بلاقيك من تاني يوم في رمضان كاتل ضُلهُ وشايل بطيخة ومسواك ويقول ليك: رمضان دخل في العَضُـم.
وقت العيشة بقت صعبة ورمضان جاء في الصيف، بقى قبل أسبوع من رمضان، تلقاه قاعد يصلح في (المكيف) تقول ليه مالك؟ يقول ليك رمضان دخل العضُـم ـ كان زول جرسة.
هسع سيكافا من أول مباراة دخلت في العضُـم.
ما عارف الحاصل شنو؟
في تاريخ العشق الهلالي، اشتهر أستاذنا الراحل عبد المولى الصديق برجفته عشقاً للهلال، فقد كان عبد المولى يعلن عن رجفته ولو كان الهلال يلعب ودياً أمام أحد أندية الدرجة الثانية في أم درمان.
كنت في الأيام التي كان يكتب فيها الراحل في صحيفة قوون، أرى الناس تتزاحم على المكتبات، عشان تشوف رجفة عبد المولى الصديق عندما يلعب الهلال.
وزي ما كان الناس بتنتظر (تمريرة) هيثم مصطفى، و(هوبة) مهند الطاهر، و(قوون) سادومبا، كانت كذلك تنتظر (رجفة) عبد المولى الصديق قبل مباريات الهلال.
الناس كانوا بتلاقوا مع عبد المولى الصديق في الرجفة.
الواحد فيهم يلاقيك الصباح: أهَـا الرجفة كيف؟
ورجفة الراحل عبد المولى الصديق رحمة الله عليه لم تكن (خوفاً)، وإنما كانت (عشقاً)، والخوف نفسه دليل حب، (بخاف) أبوعركي البخيت تأكيد لذلك، ومحمد وردي في (لو بهمسة) بقول (خوفي منك)، والهادي الجبل بغني (ما اتعودت أخاف من قبلك إلا معاك حسيت بالخوف)، وإبراهيم عوض بغني (خايف الناس تغريك تنساني وتنسى حناني)، ومحمد الأمين بغني (بخاف شوق العمر كله يفاجئك يوم في عينيا)، والشعور بالخوف حتى في العبادات موجودٌ وهو دليل خشوع، والتضرُّع بخوف هو شهادة إيمان وتقوى ومحبة وورع، وعبد المولى الصديق لم يكن يتوانى ولا يبالي في الإعلان عن رجفته عندما يلعب الهلال، وهو الذي أطلق على الهلال (صاحب المقام الرفيع)، ليجعل الهلال في أرفع المقامات، مع رجفته تلك، وأهل التصوف عندهم الارتقاء إلى أعلى المقامات يتم عن طريق (الخوف).
عبد المولى الصديق هو الذي اخترع أسلوباً إعلاميّاً جديداً وأدخل مصطلحات وأبواباً وأفكاراً مُختلفة في الصحافة الرياضية، وهو رائد صحافة المنوعات في الصحافة الرياضية والاجتماعية، وهو الذي سَـنّ أدب الرسائل المُختصرة والتلغرافات العميقة، وهو الذي كان يكتب تحت عناوين مختلفة مثل عزيزي، وألو، وكان يكتب بأسلوب المعادلات الكيميائية، عبد المولى الصديق كان لإيقاعاته السريعة إيقاعٌ لا يُقاوم، ولرسائله سرعة خيالية للوصول والبلوغ.
رحمة الله على أستاذنا عبد المولى الصديق الذي كان بسبب حُبه للهلال جعل أسماء أولاده على أسماء لاعبي الهلال ـ تأكيداً لعشقه الخرافي لصاحب المقام الرفيع.
الليلة تذكّرت (رجفة) عبد المولى الصديق، أما عبد المولى نفسه فهو لا ينسى.. ويمكن أكون شعرت برجفته والهلال يواجه اليوم الأهلي مدني.
الشئ شنو؟
قلت حمى؟
ملاريا؟
خفت الرجفة دي تكون حمى الضنك البقولوها.
دخلت قوقل ـ قلت أشوف الأعراض.
كان بقت على رجفة الكورة هينة.. ناس صنداي وفلمو ديل قادرين يشيلوا الرجفة من أول خمس دقائق.
الأعراض كانت جديدة عليّ، شعرت ليك بي رجفة ولفة رأس، وتقل في الأطراف، والأضنين، وزغللة في العيون. قالوا لي أشرب شاي تقيل، قدر ما تقّلت الشاي ما عمل حاجة.
قلت الحاصل شنو؟
مالي الليلة؟
أوعى تكون دي حمى الضنك.
مشيت الدكان سبع مرات، كل مرة أصل الدكان وما أعرف عاوز شنو؟ أرجع تاني، أصل البيت أتذكّر، أرجع الدكان أقوم أنسى، آخر حاجة رجعت لي بي (صابونة) وقلت ما بتضر.
وأنا أصلاً عندي حكمة، لمن تمشي الدكان وتكون ما عارف عاوز شنو؟ شيل ليك (صابونة)، أصلهم في البيت دائماً لمن تكون طالع بقولوا ليك جيب معاك صابون.
ودائماً بقولوا ليك ما تنسى اللبن، ودائماً إنت بتنساه، أو بتقصد تنساه.
معقولة (سيكافا) تعمل فينا كدا.
الله يستر من حمى الضنك.
الليلة أنا أصلي ما طبيعي.. أشيل التلفون أقول أضرب لي زول، أول ما أفتح التلفون أنسى الزول العاوز أضرب ليه.
أرجِّع التلفون.. أتذكّر الزول العاوز أضرب ليه، أول ما أفتح التلفون الاسم يطير.
معقولة سيكافا تعمل كدا؟
هي بطولة نحن في الأساس ما مُعترفين بيها ـ الرجفة في شنو؟
هي حصلت؟
المشكلة تطلع حمى الضنك.
غايتو الهلال دا يوم بكتل ليه زول.. ونجي في النهاية نعملها في حمى الضنك.
الهلال سوف يلعب اليوم أمام الأهلي مدني وليس الأهلي القاهري.
إنتوا عارفين الكلام دا؟
شعرت ليك بالرجفة زادت ـ الأعصاب باظت، المشكلة إننا سوف نلعب أمام الأهلي مدني أي خسارة بتكون مشكلة.
كمان بعد الفصاحة دي نطلع من سيكافا.
هي حصلت؟
الرجفة في شنو؟
أخير حمى الضنك.
بعد التسجيلات دي ـ ومدرب عالمي، معقولة نشعر بالخوف؟
إنتوا يا ناس الهلال لو جابوا ليكم مبابي وبامال ما بتخلُّوا رجفتكم.
مرات لمن تكون مية المية، وما عندك عذر، بتخاف يحصل العكس.
الخوف بكون أكبر.
والكورة ما مضمونة، وكثيراً ما تضع الناس في حتة صعبة.
ناس المريخ ما بحبوا الجرجرة، أي حاجة فيها الهلال بيبعدوا منها.
بخافوا من الإحراج.
في دوري النخبة لو لم يكن لاعبين لمباراة القمة بفرصتين، كانوا انسحبوا.
انسحبوا من كأس السودان وعملوها في كابو.
انسحبوا من السوير في دار السلام، وبرضو قالوا كابو.
رفضوا يشاركوا في سيكافا، والأهلي مدني طلع عنده شجاعة أدبية أكتر منهم.
الهلال بدون محمد المصطفى وكرشوم وصنداي وأكول وإيمانويل كان بغلب أربعة.
الموضوع بقى صعب.
الجماعة ديل صعب تاني ينستروا.
لذلك على الهلال اليوم أن يتخيّل الأهلي مدني هو المريخ.
ختوا حازم مصطفى قدامكم ـ بتغلبوا أربعة إن شاء الله.
أقول ليكم الكلام الجد.
الليلة تعالوا شوفوا صنداي.
أتمنى أن يبدأ المباراة، عشان تشوفوا السوبر على حقيقته.
الزول دا الليلة يمكن (يهتركها) ليكم عديل كدا.
إنتوا فاكرين شنو؟
وكان لي رجفتنا نحن الهلالاب، أقول ليكم ناس المريخ برجفوا أكتر مننا.
الناس ديل مُركِّزين في سيكافا وشايلين هَـمّ الهلال يفوز بيها.
عشان كدا مباراة الهلال اليوم أمام الأهلي بتكون رجفتهم أكبر.
خايفين الهلال يرجع ويفوز، ويشيل البطولة.
عشان كدا، البقول ليك (قاصر).
والبقول ليك بطولة ما فيها فريق كبير.
والبقول ليك ضعيفة.
مُجهِّزين مُبرّراتهم، لو فاز الهلال بالبطولة، ولو ما فاز كمان شيلوا شيلتكم.
ح يقعدوا ينظِّروا ليك أكتر من تنظيرهم في الحرب.
نحن الموضوع معانا عادي ـ فزنا بيها ما بتزيد لينا حاجة، ولا بنرفعها السماء.
خسرناها سوف نحاول نستفيد من الخسارة بصورة أفضل.
ما تسمحوا لي زول يحدد ليكم تقديراتكم.
شكّلوا رؤيتكم براكم.
واتعلموا تكونوا (تُقَـال) في كل الأحوال ـ نفوز، نخسر، يبقى الهلال.
الهلال اليوم إن شاء الله سوف يظهر بشكل جميل، ما ترفعوه السماء لو حدث ذلك.
ما تقعدوا تتغزّلوا في المحترفين بصورة مبالغ فيها.
اتعاملوا بمعقولية مع كل الأمور ـ مع كل الأحداث.
واعلموا أنّ البطولة ليست هي في حَـدِّ ذاتها غاية، سيكافا وسيلة، حتى الفوز بها وسيلة.
هدفنا أكبر، لكن يكون أجمل أن تكون وسيلتنا من خلال الفوز وتحقيق سيكافا.
كل الأمور تحت السيطرة، وأيِّ شئ تمام إن شاء الله.
…
متاريس
في الوسط الإعلامي، هنالك أسماءٌ كثيرة وقامات كبيرةٌ، لكن أعتقد أن هنالك إعلامياً يختلف عن الآخرين، قدم الكثير وخدم الوسط الرياضي وخيره على الهلال كثيرٌ.
الغالبية من الإعلاميين استفادوا من الهلال، إلا هذا الاسم، أعتقد أن الهلال هو من استفاد منه.
ظل يخدم في الهلال من زمن جكسا ومحمد حسين كسلا إلى عهد الغربال وإسماعيل حسن.
هذا الاسم كان له دورٌ كبيرٌ في تسجيلات الهلال وكان أحد الأسباب التي جعلت الغربال يعود إلى داره من جديد.
أتحدث عن الأستاذ محمد محمود هساي، وأرى أن واجب الهلال هو أن يُكرِّم هذا الاسم.
قد تكون الظروف الآن غير مُهيأة لذلك، لكن عندما يعود الهلال ويرجع النشاط، يجب على الهلال أن يُكرِّم هساي.
هنالك ديونٌ على الأندية وعلى الدولة لبعض الأفراد يفترض أن يتم تسديد تلك الديون.
نحن لو ما عرفنا قيمة رموزنا وقدرنا من خدم البلد والله ما بنمشي لي قدام.
في الفترة الأخيرة، توقفت كثيراً عند كتابات مريخابي جميل يكتب تحت اسم (بلاتينيوم) وتنتشر كتاباته على مواقع التواصل الاجتماعي، رغم إنّني لا أتابع مواقع التواصل الاجتماعي بصورة كبيرة، وغير ناشط فيها بصورة فعالة.. هذا القلم الشاب يكتب بلغة رصينة وفكرة جميلة، وهو قد سَـنّ لنفسه طريقاً مختلفاً يجمع فيه بين الغزل في الهلال والمريخ ـ عشقه الكبير للمريخ لم يمنعه من أن يتغزّل في ما يراه جميلاً في الهلال، وهذا طرحٌ جديدٌ، لم نتعَـوّد عليه وإن كنت أحببته.
بلاتينيوم من الطبيعي أن تُواجهه عقباتٌ وانتقاداتٌ ورفضٌ، لأن أي أسلوب جديد وفكر مختلف يتعرّض لمحاربة ـ أقول له لا تتوقف، واصل في نهجك هذا، في النهاية سوف تصل وتنتصر لو كنت تملك الإرادة والعزيمة، لا تنظر للتعليقات المُحبطة والشتائم التي يمكن أن تُوجّه لك لأنك مريخابي يكتب بأدبٍ عن الهلال ـ لا يثنيك عن كتاباتك وعن طرح أفكارك ووجهة نظرك، الهجوم أو الردم الذي يمكن أن تتعرّض له، لأنّ ذلك عندما يحدث في مواقع التواصل الاجتماعي، فإنّ ذلك مؤشر نجاح.
الردم دليل نجاح ـ خاصةً إذا كنت مُقتنعاً بأنك تعمل في حاجة صحيحة.
الإساءات التي يمكن أن تُوجّه لك، بمقدورك أن تجعلها طاقة إيجابية لك، حتى تؤكد في النهاية إنك صاح.
نحن لا نستطيع أن ندعم كل الرائعين، ربما قصور منّا أو ربما عدم قُدرة لمواكبة كل الحالات الرائعة والوقوف عندها، لأنّ قدراتنا في النهاية محدودة.
أرجو أن لا يتوقف بلاتينيوم وأن لا يبدل نهجه، فهو مريخي جميل عندما ينصف الهلال لا يزيد المريخ إلا جمالاً.
ونحن أيضاً سوف نشهد للمريخ بإشراقاته، وسوف نكتب عن إبداعاته في سبيل أن نثبت أنّ اختلاف الرأي لا يفسد للود قضية، وإنّ ما بين الهلال والمريخ أكبر من أن تفسده كتابات أو تجرفه آراءٌ.
سوف يبقى الحب.
مالها الرجفة دي خلتني الليلة إتكلم برّه رأسي.
بالمناسبة، نحن عاوزين نلعب سيكافا في هذه الظروف وتلك الضغوط، عشان الهلال يستفيد.
المريخ حتى مباراته الودية المُعلنة، امام رايون سبورت الرواندي هرب منها.
البشوف الزي الجديد يقول القبة تحتها فكي.
اللون (الكريمي) دا فيه حلاة أربعة.
الليلة الأحد عنده كلام في يوم الأحد.
…
ترس أخير: نَـاس المريخ بكـرة مُمكن يقُـولوا صَنداي برضُـو قاصِـر.