(شكرا حمدوك) انهاء ازمة العلامة التجارية للهلال!!

(شكرا حمدوك) انهاء ازمة العلامة التجارية للهلال!!

• عندنا قريبنا لمن تصلو (دولارات) من ولدو الشغال في فرنسا ..بقوم من غير ما يشعر يقول : (شكرا حمدوك).

• ومن لا يشكر الناس لا يشكر الله..

• نحن بنقول ليه : هسع حمدوك دخلو شنو في الموضوع ؟ الدولارات حولها ليك ولدك ام حمدوك؟

• قريبنا بقول لينا الجيل الجديد دا – والشباب الحالي دا شباب الحكومة المدنية…عشان كدا بقول : شكرا حمدوك.

• دا جيل زي الورد ..زي ما بقول الراحل داؤود مصطفى رحمة الله عليه..

• الجيل الحالي جيل واعي ومدرك ..وعارف حقوقه ..وما بتهاون فيها ..ولا بلعب.

• ولا بزايد عليها.

• نحن زمان كنا فاكرين الاجيال الجديدة دي اجيال فارغة وما عندهم موضوع ولا وطنية.

• كنا جاهلين.

• وما عارفين حاجة.

• لمن جاءت ثورة ديسمبر المجيدة ..وشفنا هذا الجيل يقدم في التضحيات والشهداء من غير خوف او من او تردد.

• قعدنا نتعلم منهم.

• ما قدرنا نقول شيء.

• نحن طلعنا أي كلام.

• طلعوا اوعى جيل مر على تاريخ السودان.

• في كل يوم بقدموا شهداء جدد بحكوا عن اعظم المواقف والمثل والقيم.

• الجيل الجديد – جيل غريب ..جيل عندو مثل وقيم ومبادئ وأخلاقيات لا تتواجد في من سبقوهم.

• جيل ملتزم ومثقف ومحترم.

• في ناس اختزلوا الجيل الجديد في البنطلون السيستم.

• وفي الحلاقات الغريبة.

• تجاهلوا المضمون وذهبوا نحو الشكليات.

• الحمدلله ثورة ديسمبر المجيدة رغم الازمات التى تعرضت لها إلّا انها نجحت في ان تقدم شخصيات يحرّضوا على (المدنية) ويحفزوا عليها.

• اعتقد ان الدكتور عبدالله حمدوك ..منحنا حافز قوى للمدنية وجعلها هي الراهن الاقوى – والرهان الكاسب ان شاءالله.

• عشان كدا بنقول : شكرا حمدوك.

• والشكر قبل ذلك للشارع السوداني.

• الشارع المدرسة والشعب المعلم.

• حمدوك مرة حاولوا يقتلوه ..وقت فشلوا في ذلك قاموا اعتقلوه.

• قريبنا الذي كلمتكم عنو فوق ..لمن تعزمو (شية جمر) بقعد يضرب ليك في شية الجمر دا ما بخلي ليه عضم.

• اول ما يقوم على الماسورة عشان يغسل بقول ليك : شكرا حمدوك.

• نحن بنقول ليه : هسع حمدوك الدخلو شنو في الموضوع؟

• علاقة حمدوك بالشية شنو؟

• قريبنا بقول لينا الشية دي شية مدنية (نضيفة).

• عشان ما يقوم يعيد لينا الكلام ويقوم يحكي لينا ويقص لينا في نفس القصة السابقة ويربط لينا علاقة الشية بالمدنية والمدنية بحمدوك بنقوم نحن مننا ولينا بنغير الموضوع.

• الزول دا لو فتح في حمدوك تاني ما بقيف.

• المهم يا جماعة انا ح افك ليكم (قريبنا) دا – لكن ح امسك ليك في حمدوك ..واقول ليك عديل كدا : شكرا حمدوك.

• ح تقولوا لي شكرا حمدوك في شنو؟

• ح اقول ليكم في عودة العلامة التجارية للهلال.

• ح تقولوا لي وعلاقة عودة العلامة التجارية للهلال بي حمدوك شنو؟

• ح اقول ليكم شغل الحفر والكيزان جعل الهلال يفقد علامته التجارية في العهد البائد.

• الهلال فقد علامته التجارية بفعل فاعل.

• في عهد الكيزان ..اتوقع أي حاجة تحصل.

• الفساد كان على قفا من يشيل.

• شجرة صندل يسرقوها من جذورها في المتحف القومي.

• 450 جوال سكر في الدندر يضربوها ويقولوا ضربها النمل.

• وجسر المنشية يسقط ويتهالك ويقولوا ليك السبب الجقور.

• ورئيس جمهورية يسمسر في العملات الصعبة.

• ووزير خارجية يطلع عندو 99 قطعة ارض.

• في ظل هذه الاوضاع وهذا الفساد طبيعي ان يلفحوا شعار الهلال.

• تتخيلوا الهلال الذي كتبوا في شعاره الله – الوطن – الهلال سرقوا شعاره.

• باللون الازرق والأبيض.

• بي أي حاجة.

• ما في زول بعمل الحاجات دي غير (الكيزان).

• ديل بيسرقوا الكحل من العين …عاوزنهم ما يسرقوا شعار الهلال.

• باعوا البلد وقسموها.

• الهلال في العهد البائد حاول واجتهد كثيرا من اجل ان يعيد العلامة التجارية.

• مشى المحاكم ..وعمل واساطات..وبرضو فشل في استرداد شعاره.

• عارفين ليه؟

• عشان (الكيزان) كانوا مسيطرين على الاوضاع.

• الآن وبعد ثورة ديسمبر المجيدة والمستمرة ان شاءالله عاد للهلال شعاره.

• الموضوع اكتمل في هدوء وبعيد عن الاضواء.

• الفضل الاول في عودة الشعار يرجع للثورة.

• شكرا حمدوك.

• شكرا لجنة تطبيع الهلال التى عرفت كيف تعيد شعار الهلال وعلامته التجارية المسلوبة.

• نائب القطاع الرياضي المهندس محمد ابراهيم العليقي لعب دور كبير في عودة العلامة التجارية.

• الزول دا شغال صاح.

• ما فشل فيه صلاح ادريس وما جاء بعده الحاج عطا المنان والامين البرير ويوسف محمد يوسف والكاردينال دورتين نجح فيه العليقي في فترة هشام السوباط الذي يحسب له هو الاخر هذا الانجاز.

• موضوع العلامة التجارية دي كان كابوس بالنسبة للهلال.

• الآن استرد الهلال كرامته.

• استرد شعاره.

• رجع لينا لونا.

• نشكر الله وفضله.

• هذا انجاز كبير يحسب للجنة تطبيع الهلال بقيادة هشام السوباط ..ويحسب على وجه خاص للدينمو المحرك للإحداث والانجازات في الهلال محمد ابراهيم العليقي.

• كان في حلقنا غصة.

• وفي حقنا ما كويسة اننا نفقد شعار الهلال.

• هلال الحركة الوطنية.

• هلال الملايين.

• هلال الخريجين الاوائل.

• هلال الشعب.

• هلال الثورة.

• اتوقع ان تتحقق انجازات كبيرة في الفترة القادمة بعد النجاح في استعادة العلامة التجارية.

• تخيلوا نادي في قامة وحجم الهلال يفقد علامته التجارية.

• فريق في حجم الهلال كان بدون علامة.

• وكل ذلك كان من (الكيزان).

• الفلول لو كان عرفوا بالموضوع ما كان عرقلوا حل هذه الازمة.

• الامر تم في سرية تامة.

• مبروك للهلال.

• ومبروك لكل الهلالاب.

• الهلال ايضا حسم بشكل قاطع موضوع الجهاز الفني.

• كنا نتمنى استمرار ريكاردو لقيادة الجهاز الفني للهلال بعد النجاحات التى حققها.

• لكن ربما يكون في التعاقد مع مساعده جواو موتا خير اكبر بعد ان فقد ريكاردو الرغبة في الاستمرار.

• المدرب مهما كان اسمه وحجمه اذا فقد الرغبة فلن يضيف لك شيء.

• نتوسم الخير في المدرب الجديد – ونتوقع بإذن الله وتوفيقه ان يحقق نجاحا كبيرا مع الهلال ، خاصة ان موتا مدرب (تنفيذي) و (ميداني) و (عملي).

• موتا ما مدرب (تنظير) ساكت.

• الجميل ان موتا يعرف كل شيء في الهلال وفي الكرة الافريقية والسودانية وعلاقته جيدة مع اللاعبين.

• التعاقد مع مدرب جديد كان سوف يجعلنا نحتاج للمزيد من الوقت حتى نجنى ثمراته.

• موتا اشرف مع ريكاردو على التسجيلات الاخيرة – وهي قد تمت بتوصياتهما وتقريرهما الفني.

• ننتظر ان يكمل الهلال ملف الملعب بصورة ممتازة حتى يكون ملعب الهلال مؤهلا لاستقبال مباريات الهلال في مرحلة المجموعات.

• هناك وقت كاف سوف يمكّن لجنة التطبيع من انجاز كل اشتراطات الفيفا والكاف.

• نتوقع ان نرى بشريات كبيرة في هذا الملف في الايام القادمة.

• وان شاءالله البلاد تستقر.

• والحكم المدني يرجع.

• الثورة مستمرة.

• وما في اصلو عوجة.

• مع ان التضحيات التى تقدم كبيرة وعظيمة.

• اللهم احفظ البلاد والعباد.

• اللهم انصر الهلال ووفقه في كل ملفاته.

• ….

متاريس

• بعد مغادرة المنتخب الى الدوحة الهلال في حاجة الى معسكر خارجي.

• الاهلي المصري سوف يعسكر في الفترة نفسها في الامارات..وكذلك الزمالك المصري.

• كل الاندية تستعد لمرحلة المجموعات والدوريات المحلية بمعسكرات خارجية.

• العناصر الشابة في الهلال ياسر كوجايك (الهدف عطبرة) وامجد قلق (مريخ القضارف) يجب ان ينضما للفريق الاول ويفترض ان يكونا مع معسكر الفريق القادم.

• طبعا مبارك عبدالله تلقائيا هو مع الفريق الاول الى جانب اباذر ميسي.

• الله يجيب بس الحكم المدني.

• نحن بقينا على الحكم المدني.

• والبلد تستقر.

• والدم يقيف.

• اللهم احفظ البلاد والعباد.

• وما تدي قفاك للعسكر.

• ……

• ترس اخير : ترسوا بس.