* العافية درجات، وأعلى درجات العافية (الصحة)، وأدناها (الغيبوبة) ..
* ومثلما أن العافية درجات فإن (اللخمة) أيضاً درجات..
* (اللخمة) بتختلف من زول لزول ..
* (لخمة) العريس بتختلف عن (لخمة) أم العروس، ولخمة (الترزي) يوم الوقفة بتختلف عن (لخمة) الحرامي الطلعت عليهو شمس جوة بيت الناس ..
* اللخمة درجات وكذلك (اللحمة) ..
* في زول من شدة (اللخمة) بينسى (يسرح شعرو)، وفي نوع بينسى (يزرر زراير القميص)، ونوع آخر بيلبس (شُراب كل فردة من بلد) ..
* يلبس (شُرابين) مختلفات و(الجزمة واحدة) ..
* ولكن أدنى درجات (اللخمة) هي أن تقف في (باب الشارع وما تعرف نفسك جاي وألا ماشي) ..
* والله صحي ..
* أنا شخصياً مرة حصلت ليّ ..
* وقفت في باب الشارع وأثناء ما أنا واقف في باب الشارع قمت إتلخبطت ما عرفت نفسي (المفروض أدخل ولا المفروض أطلع) ..
* نسيت إني طالع وألا جايي ..
* هذه الدرجة المتقدمة من (اللخمة) يعاني منها الآن (90%) من المريخاب وعلى رأسهم (الرئيس الما رئيس) سوداكال ..
* أول مرة في حياتي أشوف لي (رئيس وفي نفس الوقت ما رئيس)..
* المريخاب لا قادرين يعارضوا سوداكال وعلى قادرين يخسروا ناس طارق المعتصم ولا قادرين يقولوا (عائد عائد يا الوالي) ..
* وافقين في النص ..
* هم واقفين في النص والهلالاب واقفين قنا ..
* واقفين قنا حتى لا يلدغ الكاردينال من (الجحر مرتين) فيما يتعلق بملف الأجانب ..
* ملف الأجانب واضح وما داير درس عصر ..
* طريقة تسجيل المحترفين عن طريق (الفيديو) ما بتنفع ..
* الطريقة دي حتى (العرسان) خلوها ..
* زمان العريس المغترب بيختار العروس من شريط فيديو ..
* ولكن إتضح إنو الشريط بيديك (10%) من حقيقة العروس ..
* تشوفها مُمكيجة والحواجب غزيرة وعندها وجنات وحلاااااات الدنيا عليها ..
* ولما تمشي شهر العسل لا بتلقي (غزارة في الحواجب) ولا (كثافة في الرموش) ..
* قبل كده عندنا صاحبنا إختار ليهو عروس من شريط فيديو ..
* وفي الشريط الزولة دي كان عندها (وجنات) ..
* وتاني يوم من العرس، العريس إكتشف إنو ما في وجنات ..
* الزول ده بقى مستغرب ورأسو ضارب ..
* قال لي: الزفاف عرفناهو إيجار، الشعر عرفناهو تركيب، الرموش عرفناها تصنيع، معقولة الوجنات تكون (شاداها من صاحبتها) ..
* وجنات (سلفية) ..
* قال لي: البت دي الوجنات الكانت في الفيديو طلعت ما حقتها..
* قلت ليهو أول مرة أعرف إنو هنالك (وجنات ما ملك)..
* معقولة في (وجنات) ما عندها شهادة بحث ..
* المهم ..
* الأجانب بتوعين الفيديو ديل هم زي (العروسات) ديل ..
* والله صحي ..
* والهلال نادي كبير يجب أن لا يسجل بهذه الطريقة العشوائية جداً..
* بالطريقة دي بيكون ما عندنا فرق من المريخ الشهير بـ(المدفور)..
* مستحيل الأهلى المصري يسجل ليهو لاعب عن طريق (الفيديو) وكذلك الترجي والزمالك والنجم ..
* والهلال لا يقل عن هذه الأندية ..
* قلنا ان الطريقة الأمثل أن يقوم الهلال برصد الأجانب منذ ستة شهور ويتابعهم في الدوريات وفي دوري الأبطال والكونفدالية وحتى سيكافا الهايفة ..
* متابعة اللاعب الأجنبي ورصده لشهور طويلة هي التي تعطيك حقيقة اللاعب ..
* وما عدا ذلك ستكون الأمور (بطيخة مقفولة) ..
* يمكن ينجح ويمكن لا ..
* والهلال السنة الجاية ما بيستحمل فشل جديد يا الكاردينال ..
* السنة الجاية دي دايرين بدايتها تكون بـ(إفتتاح الجوهرة شهر واحد) ونهايتها بـ(بالأميرة السمراء شهر حداشر) ..
* وبذلك نكون إفتتحنا العام بـ(حفلة إفتتاح الجوهرة) ، وختمنا العام بـ(حفلة التتويج بالأميرة) ..
* والكلام ده عشان يحصل داير ليهو محترفين أجانب يحدثون الفارق ويحققون الأحلام ..
* ثم أهم من هذا.. التجديد للنجمين الكبيرين بشة وبوي..
* لا نهضم (حق كاريكا) ولكن بشة يلعب دوراً مؤثراً في قيادة الهلال ..
* وأظن أن الشطب في الهلال لن تكون فيه مفاجأة ..
* الشطب أعتقد أن ابراهومة هو الخيار الأول ..
* نقول ذلك عشان ما تحصل مفاجأة وعشان ما نرتكب غلط ونشطب من جوة التشكيلة الأساسية ..
* البتشطب واضح والموضوع ما داير تنظير ..
* أطهر الطاهر مهما كان كعب ما بتشطب، ابراهومة هو الخيار ..
* المهم ..
* نرجع للمريخ ..
* سوداكال داير يسجل إنكوم ودفع قروشو، وناس طارق المعتصم ما دايرين إنكوم ..
* وإعلام المريخ السالب هو ذاتو ما عارف داير إنكوم وألا ما دايرو..
* وفي النهاية طبعاً بيمشي كلام سيد القروش ..
* سيد القروش هو البحدد إنكوم يسجل ولا ما يسجل ..
* إنتو ما بتدفعوا عشان كده تقبلوا بما يختاره سيد القروش ..
* وزمان كمال ترباس قال: (أنا جني وجن الزول الما بيدفع في الشيرنق ويقوم يقلب في السمك) ..
* وكمان طه سليمان غنى: (سيد القروش بلقى الحنان مفروش)..
* ووفقاً لكل هذه المعطيات أنا شايف أفضل تبطلوا التنظير وتخلو سوداكال يسجل الزول ده ..
* أنا شايف كده ..
* وأي زول طبعاً حر في (شوفو) ..
* إنكوم شاب غاني معجب بالهلال ومحترف بصفوف المريخ ..
* الزول ده (قدانا قد) كل يوم معانا في الجوهرة الزرقاء ..
* من شهر عشرة هو قاعد يتابع في مباريات الهلال ويأكل في قصب السكر ..
* وأنا أفتكر إنو سوداكال عندو بُعد نظر ..
* سوداكال عرف إنو اللاعب بيحب الهلال قام فاوضو بدون ما يعرفو ..
* وده بعد نظر ممتاز جدا ..
* أصلاً البحب الهلال ممكن يبقى كابتن في المريخ ودي قاعدة ثابتة ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (حمدية) وأصلو الزول بيموت والذكرى تفضل حية ..
* و..و..
* والريد من قبلك ما كان ريد ولا بعدك شفنا ….(محترف عندو كرِش) ..
