طه سليمان وهدى عربي والسرطان !!
قزاز ورذاذ
محمد الطيب الأمين
طه سليمان وهدى عربي والسرطان !!
* من المآسي الكبيرة أن (القونقليز) الشهير بالتبلدي والذي هو (حقنا شديد) أصبح أغلى وأعز من (قمر الدين) علماً بأن قمر الدين ما حقنا يعني مستورد ..
* حاجاتنا البلدية بقت أغلى من الحاجات المستوردة والله يكون في العون ..
* قام اتعزز التبلدي عشان بالغنا في ريدو ..
* حاجة تكسف ..
* ظهرت المغنية أفراح عصام طوال شهر رمضان وهي تقدم إعلان ل(الشباشب)..
* شباشب يعني (شحاطات) ..
* وأنا حقيقة لا أعلم هل تطورت أفراح عصام أم تطورت (الشباشب) ؟؟
* لكن الأكيد المؤكد أن (التونة) و(الشحاطة) وجهان لمغنية واحدة يعاين لها الناس ولا أحد يستمع إليها ..
* عندما يلبس منتخبنا الوطني اللون الأحمر فانه يخسر بالتلاتة، الآن الحكومة طبعت عملة جديدة فئة (50) جنيه باللون الأحمر.
* نحن لا نخشى على الورقة أم خمسين الحمراء من الخسارة فهي خسرانة بكل الألوان ..
* الدولار سيضرب اللون ..
* لو بقت علي اللون هينة ..
* برنامج المايسترو الذي قدمته سودانية (24) في رمضان فكرته جيدة غير أن (كمية الرشاقة والاستظراف) خصمت من الفكرة ..
* أي برنامج يكتر فيهو (الهظار) بيطلع من النص يا محمد عثمان ..
* الغريبة الموصلي ظهر في البرنامج وكأنه معجب بالفنانين ..
* كسير تلج ورشاقة مبالغ فيها ..
* عموما المايسترو قدم فكرة جديدة وخدمة كبيرة لمجموعة من الفنانين الشباب الذين قدموا أغنياتهم الخاصة وهذه محمدة كبيرة ..
* الشئ الوحيد الذي فشل الشعب السوداني في تخزينه هو (الماء والوجه الحسن) ..
* الجماعة ديل خزنوا (البنزين والجاز والغاز وحبوب الضغط وضغط الحبوب والبصل والأسمنت والسكر) ..
* الدور علي الموية ..
* الذكي هو الذي يخزن موية منذ الآن ..
* طبعاً في الخرطوم تتفاقم أزمة الموية خلال شهر رمضان وتنفرج هذه الأزمة أول أيام العيد..
* هيئة المياه تريد للمواسير أن تصوم معنا الشهر الكريم ..
* حاجة تكسف والله ..
* من أكبر عيوب برنامج الكاميرا الخفية (عليك واحد) أن مازن (سعادة العقيد) لا يعرفه حتى اولاد حلتهم ..
* زول نكرة ..
* رامز جلال عندما ينزع القناع أمام الضحية يعرفه الضحية بسرعة أما الأخ مازن فهو يحتاج لكتلوج ..
* لنا مع ريحة الخبيز ذكريات (صادقة وجميلة) ، ولنا مع (دق الستائر) ذكريات (قاسية واليمة) ..
* والذكريات في كل ليل تفتح حنينك بيت بكا أو كما قال الجميل ازهري محمد علي ..
* (رحمة) شهر رمضان شملت حتي المواصلات التي توفرت بشكل مريح طوال أيام الشهر ..
* ومع انتهاء شهر الرحمة ستبدأ الزحمة والحجز بالشباك ..
* وغايتو جنس غايتو ..
* من الحسنات الكبيرة أن هدى عربي كفنانة ظهرت بعد ما بقت كبيرة وكذلك عاصم البنا ..
* الظريف في الموضوع قالوا قبل أيام خصصت خيمة الصحفيين حلقة عن الأجيال في الغناء (أو فيما معناه) ..
* الحلقة قدمت الأستاذة هادية طلسم باعتبارها من جيل الأمس وقدمت هدى عربي باعتبارها من جيل اليوم ..
* هدى عربي لو من جيل اليوم مكارم بشير تكون من جيل (بعد بكرة وألا شنو) ..
* مكارم وشموس وإيلاف وإنصاف فتحي وشادن من جيل (بعد بعد بكرة) ..
* وغايتو الله يكفينا شر (المصدي) اللمعتو الأيام ..
* تذبحني ألما إمرأة في عمر أمي تفترش في السوق حاجات هي ليس من مسلتزمات العيد ..
* عليكم الله كل ما تمشوا السوق وتلقوا النسوان ديل فارشات (ويكة) بخمسة جنيهات و(زيت كركار في قارورة بيبسي) بعشرة جنيهات اشتروا منهن ..
* انت لو ما محتاج للويكة والكركار هي محتاجة للجنيه والحياة مشايلة يا مولانا ..
* الفنان الصاعد عبد السلام صوت يبشر بكثير من الخير فقط مطلوب منه ان يتوقف عن الغناء اثناء فترة المراهقة وتغيرات الصوت ..
* أكثر ما أضر الشاب سعد مواصلته للغناء اثناء فترة المراهقة ..
* نخشى على عبد السلام من استهلاك ما بعد رمضان ..
* من ايجابيات سهرات طه سليمان انها انقذتنا من عبط بعض المذيعات ..
* طه غطى أيام الاسبوع وبالتالي ضيق الخناق على مذيعات الوزن الخفيف ..
* كل ما اتذكر المذيعة أم عضلات بسأل الله إنو رمضان ده يمطووو ..
* يا الله مطووو ..
* أول مرة في حياتي أشوف لي مذيعة عندها عضلات ..
* أنا والله مستغرب المذيعات ديل بجيبوهن من وين ..
* من الأرجح أن يكون الجمعة عيد ..
* والعيد عند كثير من الناس هو مثل (المنبه) يصحي كثير من المواجع (النايمة) ..
* كثير من الأسر يكون اليوم الأول في العيد عندهم أشبه ببيت البكا وذلك إما بسبب رحيل عزيز أو مرض حبيب أو غربة صديق أو أخ أو والد ..
* حتى جروح المحبة تصحى أيام العيد ..
* نحن ببركة خواتيم شهر رمضان نسأل الله أن يرحم كل أموات المسلمين وأن يشفي كل مريض يارب ..
* قلوبنا مع مرضى السرطان والفشل الكلوي والأمراض الكبيرة والصغيرة ..
* إن شاء الله ربنا يكتب ليهم الشفاء وتعود لشفاههم البسمة وتعود لاسرهم الضحكة وراحة البال ..
* منظر البطيخ في نهار رمضان لا يقل خطورة من منظر فتاة متبرجة وعارية في ذات النهار ..
* تجار البطيخ (الله يسامحهم) الواحد يشق ليك البطيخة نصين ويعلقها النهار كلو ، تعاين ليها لما تدنقر ..
* نقول لتجار البطيخة السترة والفضيحة متباريات ..
* ونركب صافنات ونجيبة (كاهلية) واصلو الزول بيموت والذكرى تفضل حية ..
* و..و..
* والحنان الفي قلوبنا أصلو نابع من ….(جيوبك) ..
تطبيق كورة سودانية لتصفح أسرع وأسهل
لزوارنا حمل من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app
