عارفين ليسكر منع التصريحات ليه ..؟
في الصمت كلام
محمد عثمان بلل
عارفين ليسكر منع التصريحات ليه ..؟
• الخوف كان ظاهر على بعثة ليسكر في مطار الخرطوم.
• أفراد البعثة كانوا شغالين زي مروحة (الطربيزة).
• وزي الزول الرايحه ليهو حاجة مهمه
• ابناء جورج (ويا) عارفين جماهير الهلال كويس.
• الجماعة ديل قرروا منع اللاعبين التصريحات الاعلامية.
• عارفين دا ليه.
• خوفا من جماهير الهلال.
• نادي ليسكر درس الهلال كويس.
• بالجد والله.
• وحتي كمان درسوا الجماهير الزرقاء أكتر من الفريق زاتو.
• لو ما كدا ما بصدروا قرار زي دا.
• ليسكر استفاد من دروس الأندية التي واجهت الهلال في ملعبه.
• بتذكروا التصريحات التي اطلقها المدربين واللاعبين الافارقة قبل سنوات.
• الاعلام الازرق أصلاً ما قصر شال الكلام دا ونشروا في جرائده.
• دا كان عبارة كان رسالة واضحة للجماهير الزرقاء.
• التصريحات أصبحت تحدي بالنسبة للجماهير.
• استفزت الاهله.
• لو بتذكروا تصريحات النيجيري اموكاشي.
• مدرب ناساورا.
• الفريق النيجيري غلب الهلال 3/0.
• طبعا في نيجيريا.
• في دور ال16.
• والمؤهل لدور المجموعات في دوري الابطال.
• اموكاشي قال كلام كتير في حق الهلال.
• أهم حاجة ذكر إنو فريقه ضمن التأهل.
• والهلال مستحيل يهزم فريقه.
• حتي ولو حصل فاز الهلال ما بحصل نتيجة نيجيريا.
• اعلام الهلال كان ذكي جدا.
• نقل الرسالة دي للجماهير.
• جماهير طبعا ما قصرت يوم المباراة.
• تدافعت نحو المقبرة للوقوف خلف اللاعبين.
• لعبت دور كبير في نتيجة الفوز ومعادلة نتيجة نيجيريا.
• كلنا تابعنا جرسة اموكاشي ولاعبي ناساورا.
• الزول دا بعد المباراة هرب.
• لحدي الليلة اموكاشي ما ظهر تاني.
• في نيجيريا مافي.
• وكمان ما تنسوا مباراة الاهلي المصري.
• وتصرفات الحضري مع لاعبي الازرق.
• دي ما كانت محتاجه استنفار جماهير الهلال.
• المقبرة كانت عبارة عن بركان.
• الاهلي دا عرف حاجة.
• الحضري ندمان انو جاء مع البعثة.
• شخصيا المباراتين ديل ستظل في الخاطر على الدوام.
• جمهور الهلال ابدع.
• المساندة الخرافية ساهمت في ظهور اللاعبين بذلك المستوي.
• (يلا ناس ليسكر خايفين من جمهور الهلال).
• كدا الرسالة وضحت يا جماهير الهلال.
• الهلال وبس.
(نضم زين) ..
• راجيكـ يا املاً زمن واقف علي حد الصبر.
• بحلم شمووسك يشرقن..
(صمت اخير) ..
• أكيد بكرة أحلى.