عاوزين (الحكم) يشيل (السوباط والعليقي) ويكتب ليهم نسبة من (الذهب)..!

صابنها
محمد عبد الماجد
عاوزين (الحكم) يشيل (السوباط والعليقي) ويكتب ليهم نسبة من (الذهب)..!

• الاعلام الرياضي زمان كان ممكن يضحك على (الجمهور) – الكلام دا قبل ان تحدث الطفرة الكبيرة في التكنولوجيا والاتصالات والعرض.
• أي حاجة هسع بقت بالثابتة.
• ما في كلام ساكت.
• زمان (المعلومة) كانت عزيزة – هسع المعلومة بقت متوفرة ويمكن الحصول عليها بأسهل الطرق.
• نتيجة المباراة زمان كان بجيبوها ليك غلط.
• اذا كان في اعلامي بستعرض على القراء بمعلومة او خبر بكون هو (جاهل) حتى بالمعلومة التى يستعرض بها.
• زمان كان اعلام المريخ ممكن يسوق جمهوره بالخلا .. ويمكن ان يحدثهم عن (محترف) فلتة وضربة جزاء لم تحتسب للمريخ .. ويكون ما في كلام زي دا .. وممكن اعلام الهلال يفعل نفس الشيء مع جمهور الهلال.
• هذا كان يحدث من الطرفين .. نحن شركاء في ذلك.
• هسع (الجمهور) بقى اوعى من (الاعلام) …وبقى أي مشجع عارف أي شيء .. ولا يمكن ان تضحك على القراء او تسوقهم بالخلا عطفا على عواطفهم.
• ما في زول بغش ليه زول تاني.
• المشجع مرات ممكن يقبل منك حاجة عشان اللون الذي يجمعكم والحب الكبير .. وممكن على مزاجه ان يفوت ليك شيء .. لكن بينه وبين نفسه هو بضحك عليك.
• الناس بقت واعية.
• والجمهور متابع ومثقف اكثر من الاعلام.
• اقول هذا الكلام بعد (المهزلة) التى قدمتها لنا صحيفة (الصدى) التى مازالت تتعامل بالعقلية القديمة وهي تتحدث عن مهزلة تحكيمية انقذت الهلال في القضارف.
• نسوا (البمبان) الذي خلفوه وراءهم في القضارف بسبب تراجع الحكم عن ضربة جزاء احتسبها لصالح الشرطة.
• الله ما قسم ليكم شيء من (الخجل).
• ديل قاعدين وين ؟ الناس بضحكوا عليكم.
• انتوا اذا ما تابعتوا مباراة الهلال والشرطة؟ .. مباريات كأس العالم ما تابعتوها.
• لغاية الآن شغالين بالفهم دا.
• الناس كبروا على هذا الفهم.
• ناس الصدى بتحدثوا عن (مهزلة) قام فيها حكم المباراة بنقض هدفين للهلال من وجهة نظري وكثيرون معي لا يرون هنالك أي سبب لإلغاء الهدفين.
• الحكم ايضا قام بطرد مهاجم الهلال المحترف ليليبو وعمد لإيقاف القطار السريع في الهلال بدون مخالفة تستحق ..(وبرضو اقول ذلك من وجهة نظري) .. اللاعب طرد في الزمن البدل الضائع .. لكن الهلال سوف يحرم من مهاجمه في الجولتين القادمتين.
• المهزلة في شنو؟ ان لم تكن في هذا الذي تفعله صحيفة (الصدى) التى يفترض ان تحترم القراء اكثر من ذلك حتى ولو كانت تدرك انها تخاطب (مشجع) قد يكون متعصب ومتحيز للمريخ .. حتى مشجع المريخ الذي تابع مباراة الهلال والشرطة لن يقبل هذا الطرح الذي حسبت صحيفة الصدى انها يمكن ان تقلل به من قيمة انتصار الهلال او يمكن ان تجعل الحكام تحت ضغط في مباريات الهلال القادمة.
• نحن نعرف كيف يفكرون ؟ لكن هذه الطريقة التى يفكرون بها طريقة قديمة وبالية وشرب الزمن عليها واكل .. ولن يتضرر منها إلّا المريخ … وأظن ان موقع المريخ الآن وحاله يؤكد الضرر الذي يعيش فيه المريخ بسبب اعلام المريخ.
• الناس بضحكوا عليكم .. انتوا قاعدين وين؟
• دي مسخرة والله.
• اعلام المريح بقيادة الدكتور مزمل ابوالقاسم .. عاوز يحدد رئيس المريخ .. وعاوز يحدد من بعد الطريقة التى يعمل بها المجلس .. عاوزين يحددوا ملعب المريخ الذي يجب ان يلعب عليه ..وعاوزين يحددوا انتخابات المريخ … يشيلوا مدرب ويجيبوا مدرب .. الانكأ من ذلك اصبحوا يشيلوا رئيس ويجيبوا رئيس .. الموضوع بقى (هملة) في المريخ.
• اعلام المريخ بعد تلك (المهازل) التى يفعلها مع المريخ يريد ان ينقل مهازله الى الهلال ويتحدث عن تحكيم مباريات الهلال.
• ألعبوا بعيد.
• الكلام دا ما بتقدروا عليه.
• طريقة بدائية وتقليدية مكشوفة تعمل بها صحيفة الصدى وهي تستضيف احد الاداريين او احد المسؤولين في النادي الذي يلعب امام الهلال ليتحدث عن التحكيم.
• مسرحية مكررة.
• وتمثلية معيودة.
• مرتضى دياب رئيس القطاع الرياضي بالشرطة القضارف ليه اسبوع قاعد يصرح في صحيفة الصدى.
• في زول بعرف الاسم دا – لو ما الهلال.
• قبل المباراة كان دياب بهدد في الحكام وبعد المباراة سار على ضلاله القديم.
• زول عاوز يشتهر ويظهر بس .. عليكم الله في زول كان بعرف (مرتضى دياب).
• اظن لاعبي الشرطة ما بعرفوه .. رغم انه رئيس القطاع الرياضي.
• مرتضى دياب بتحدث بسبب ميوله للمريخ وليس ميوله للنادي الذي يعمل به ويصرف منه مرتب.
• هذا المسؤول الذي يعمل في نادي الشرطة اظنه في مباراة المريخ مع الشرطة التى تراجع فيها الحكم من احتساب ضربة جزاء للشرطة وأدت الى ثورة جمهور الشرطة وإطلاق البمبان لم يتحدث بكلمة .. الله ما فتح عليه بحرف جر.
• اظنه وهو رئيس القطاع الرياضي في نادي الشرطة القضارف في مباراة فريقه امام المريخ كان ضمن اولتراس المريخ يشجع ضد الفريق الذي يشغل منصب رئيس القطاع الرياضي فيه.
• امثال هؤلاء الاشخاص يدفعهم حبهم للظهور ونشر تصريحاتهم وصورهم في الصحف الى تلبية رغبات الصحف والاستجابة الى اهوائها ليجعلوه عنوانا رئيسيا في صحيفة الصدى وهم يكتبون على لسانه ان الهلال فلت بسبب التحكيم من هزيمة محققة امام الشرطة القضارف.
• بالله.
• نفس هذا الكلام لو قاله مرتضى دياب بعد مباراة المريخ .. لو جابوا اعلان تسجيلي في الصفحة الاول ودفع عليه بالعملة الصعبة ما بنزل في الصدى.
• وبتكلموا عن (المهنية).
• وبزعلوا لمن يضحكوا عليهم.
• الزول دا ما شاف (البمبان) الذي اطلق في مباراة الشرطة والمريخ بسبب اعتراض جمهور القضارف على قرارات التحكيم.
• ولا جابوا سيرة (البمبان).
• حكم مباراة الهلال والشرطة نقض هدفين للهلال وطرد ليليبو واحتسب اكثر من (10) دقائق كزمن بدل ضائع … عاوزين بعد كدا شنو؟
• عاوزين اكتر من كدا شنو يا ناس الصدى؟
• يكتبوا ليكم نسبة من حصة السودان في الذهب الذي يستخرج من الاراضى السودانية.
• يدوكم مقعد في مجلس السيادة.
• يعملوا ليكم كتيبة باسمكم في الدعم السريع لإرهاب التحكيم.
• يعملوا ليكم شنو؟
• ناس الصدى بكونوا عاوزين حكم المباراة يشيل ليهم السوباط والعليقي من الهلال .. زي ما شالوا سوداكال وحازم مصطفى من المريخ.
• عاوزين الحكم يقفل الجوهرة الزرقاء .. ويصادرها من الهلال.
• والله الجاكومي كان عندو حق لمن كسر (الطبلة).
• الناس ديل بعيدين شديد من الهلال.
• لسه شغالين بنظام (المديدة حرقتني).
• والطبلة كسروها.
• وقلاب الرملة وصل.
• …………
متاريس
• اقترح على نائب رئيس الهلال ورئيس القطاع الرياضي في الهلال المهندس محمد ابراهيم العليقي وعبدالمهيمن الامين ان يكون حافز الانتصار عندما يتعرض الهلال لظلم من التحكيم مضاعفا .. حتى يحفّز ذلك اللاعبين لمضاعفة الجهد عندما يتعرضون للظلم من التحكيم.
• جسد هذا الامر المهاجم جون مانو.
• الهلال يجب ان يعرف كيف ينتصر على الخصم وعلى الحكم.
• عرف الهلال ان يتغلب على كل العقبات التى واجهته امام الشرطة القضارف.
• زمان الهلال وقت ينقضوا ليه هدف .. بقيف على كدا.
• هسع كل ما الحكم ينقض للهلال هدفا يردوا عليه بهدف اخر.
• وهو المطلوب من الهلال.
• اخطاء التحكيم لن تنتهي .. ان لم تكن تمتلك القدرة على التغلب عليها حتى وان كان فيها استهداف وظلم ..فلن تحقق البطولة.
• الاندية الكبيرة كدا.
• خلوا ناس الصدى يعيشوا على (الولولة) بعد أي مباراة للهلال.
• مباراة الهلال القادمة امام توتي.
• ونحن دائما عندما نتجاوز الصعب نأتي ونخفق في السهل.
• ركزوا في مباراة توتي.
• جمهور الهلال يجب ان يكون حاضرا في ستاد الخرطوم لمساندة الهلال.
• ما في احلى من انتصارات الهلال.
• …………
• ترس اخير : ان شاءالله الانتصارات مستمرة