عدالة السماء وأية افرو!!

صابنها
محمد عبد الماجد
عدالة السماء وأية افرو!!

· الواحد ذاتو ما عارف يعمل شنو؟
· نتقطع!!
· هسع الواحد يكتب ليكم عن تعادل الاهلي مروي مع المريخ في مروى وإلّا يكتب ليكم عن آية افرو؟
· نقطت!!
· والله نقطت!!
· شوف عيني دي.
· تاني يا ابوجيبين.
· انا مالي ومال المريخ.
· احسن الواحد يكتب عن آية افرو.
· المريخ ح يمشي مننا وين؟
· نحن قاعدين والمريخ بنقط.
· والله التعادل دا فيه جنس عمود.
· موضوع زي دا ما بتفات.
· يا ربي الواحد يعمل شنو؟
· يكتب عن آية افرو وإلّا عن المريخ؟
· شوفوا الدنيا دي وضعت المريخ في ياتو حتة.
· شوفوا الظروف.
· انتوا عارفين انا موقفي كيف مع الموضوعين ديل .. موقفي زي السماية البتقع يوم العيد.
· او زي الاجازة الرسمية البتقع جمعة.
· المنتخب طلع بسبب آية افرو .. المريخ مالو؟
· آية افرو مشت مروي؟
· اقول ليكم حاجة ما تزعل .. ابوجيبين دا كراعو حارة … اخطر من آية افرو ذاتها.
· نحن الهلالاب بندعم رئاسة ابوجيبين للمريخ.
· ابوجيبين اول ما مسك المريخ… المريخ اتغلب من الاهلي طرابلس بالثلاثة الذي خرج بدوره امس من دور الترضية وخسر امام – تشاشوما مادزيفهاديلا – الجنوب إفريقيي بالثلاثة وغادر المنافسات الافريقية كلها.
· المريخاب بعد خسارة الاهلي طرابلس قالوا ما مشكلة المهم المريخ اتأهل.
· والحكم.
· ورضوان جيد.
· مشى المريخ كوستي .. اتغلب من الرابطة بهدف باشري .. الرابطة خسرت امس من الزومة الخرطوم.
· شفتوا كيف؟
· نحن أي حاجة نحن عندنا بي نظام!!
· يا ريت لو وقفت على كوستي.
· مشوا مروي … اتعادلوا امام الاهلي مروي.
· اها عليكم الله المشكلة وين؟
· في آية افرو وإلّا في ابوجيبين؟
· يا سلك قول انت.. انا ما ح اقول شيء.
· انا فترت عديل كدا.
· ح انسى ليكم موضوع مروي شوية .. عشان عندنا مباراة اليوم امام الاهلي شندي في بربر .. وعندنا مباراة تانية مع الاهلي في مروي.
· احسن الواحد ما يتفاصح.
· احسن الواحد يسكت ساكت .. لمن نلم نقاط الشمال علينا بنرجع نتكلم عن المريخ.
· هسع ما عاوز زول يجيب سيرة تعادل المريخ مع الاهلي.
· اعملوا فيها ما عارفين حاجة.
· وقولوا عادي مثل هذه النتائج .. نتحدث دائما في كورة القدم.
· وأرضية ملعب مروي سيئة.
· سوف اتحدث عن خروج منتخب الشباب وخسارته امام المنتخب اليوغندي.
· دي فيها حاجة؟
· مدرب يوغندا قال : (عدالة السماء أنصفتنا وفوجئت بإستبعاد خمسة لاعبين بداعي الكورونا. حيث أكد مدرب منتخب يوغندا جاكسون في المؤتمر الصحفي، أن عدالة السماء أنصفته بعد إستبعاد خمسة عناصر أساسية من منتخبه بدواعي الإصابة بالكورونا.. واضاف: أجرينا فحوصات والنتيجة جاءت نظيفة، وتفأجانا بعد ذلك بوجود خمسة إصابات وسط صفوف منتخبنا، ورغم ذلك كنا على علم بأن العدالة ستنصفنا..وكشف جاكسون عن أهدافه، مشيرا الي أنه سيصل مع هذا المنتخب لنهائيات كأس العالم، قائلا: جلست مع كل لاعب علي حدى وأخبرتهم بذلك قبل مواجهة السودان، لذلك دخلوا لهذه المباراة بطموحات عريضة).
· الحركة دي ما حلوة من اتحاد معتصم وأسامة عطا المنان.
· ما صاح.
· بس نحن بنقول لمدرب المنتخب اليوغندي (عدالة السماء) لم تكن بسبب فحوصات كورونا التى دبرها لهم الاتحاد السوداني.
· عدالة السماء تحققت بسبب ما قام به الاتحاد السوداني وهو يسعى في هرولة نحو حسن تسريحة وآية افرو.
· نعم كان لا بد ان يخسر المنتخب ويخرج بعد تلك التصرفات الغريبة التى قام بها اتحاد الكورة.
· طبعا في ناس هاجموا آية افرو … وهي ما عندها ذنب … آية افرو الاتحاد قدم ليها دعوة ومنحها 500 الف جنيه عشان تجذب الاضواء لبطولة سيكافا.
· تعمل شنو آية؟
· طبيعي تقبل بهذا العرض .. خاصة ان هذا العرض يجعلها (تريند) ونجوم السوشيال ميديا بيبحثوا عن (التريند) وممكن من اجله يعملوا أي شيء.
· ما فارقة معاهم كتير.
· آية افرو شابة وصغيرة في السن وما عندها خبرة في الحياة وبتعتبر نفسها (نجمة) وصانعة محتوي .. واي زول على كيفو في روحو – المشكلة في اتحاد الكورة .. الاتحاد المؤسسة .. والذي يحاسب من جمعيته العمومية ومن الفيفا ومن المراجع العام عن أي قرش بصرفه.
· يبدو ان (الفساد) في الاتحاد وصل الى مرحلة يعتبروا بعده ما قاموا به مع آية افرو وحسن تسريحة شيء عادي .. وما فيه حاجة.
· الناس ديل اترفع عنهم الحياء.
· ما عندهم خجل وما فارقة معاهم في شيء.
· الخبر المؤسف جدا ليس في الدعوة التى قدمها اتحاد الكورة لحسن تسريحة وآية افرو .. وإنما في البطاقة التى منحها لهما .. اذ منح آية افرو بطاقة اعلامي … وعملها (مصورة) عديل كدا.
· هذا اعتداء على حقوق الاعلاميين والمصورين على وجه التحديد.
· انتوا فاكرين (التصوير) دا لعب؟
· الاتحاد العام بتعامل مع الاعلامي المحترف .. وبشترط يكون بمثل جهة معتبرة.
· بالمناسبة كان يمكن ان يتعاقد الاتحاد مع آية افرو وحسن تسريحة بصفاتهما باعتبارهما من نجوم الميديا .. ما في مشكلة.
· ما حدث مع آية افرو حدث مع الاء المبارك (لوشي).
· حدث ذلك مع لوشي في بطولة (كأس العالم) وليس (سيكافا) البطولة التى لم يسمع بها احد.
· يعني الموضوع لو وجد اخراج جيد كان يمكن ان يكون عادي … لكن الجماعة (ساطوها).
· (كشفت الإعلامية السودانية المعروفة آلاء المبارك الشهيرة باسم لوشي عن تلقيها لبطاقة دعوة من شركة كوكاكولا للمشاركة في الترحيب بنسخة كأس العالم التي ستصل السودان. ووفقاً لمتابعات محرر موقع النيلين فقد نشرت حسناء الإعلام السوداني صوراً من بطاقة الدعوة التي وصلتها من الشركة العالمية كوكاكولا وذلك على حسابها الرسمي عبر موقع التواصل الاجتماعي فيسبوك. وجاء مكتوب في بطاقة الدعوة التي وصلت لنجمة السوشيال ميديا الأولى بالسودان وفقاً لما قرأ محرر موقع النيلين: “تتشرف كوكاكولا بدعوتكم للانضمام إليها في الترحيب بنسخة كأس العالم “فيفا” في السودان).
· تتخيلوا الموضوع دا حصل على مستوى كأس العالم وشركة كوكاكولا .. ويحدث مثله كثير في العالم.
· وان كنا نحن بنعتقد اننا لسه ما وصلنا المرحلة بتاعة (الترويج) دا.
· بطولة سيكافا بقى ما فيها أي موضوع غير (آية افرو).. لا اسامة عطا المنان ولا مبارك سليمان ولا امجد قلق.
· آية افرو خطفت الاضواء من الجميع .. طبعا الاضواء هنا اضواء سلبية .. ممكن تعمل ضجة وإثارة .. وتخلق اضواء عن طريق العشوائية والسطحية والفراغ والتخبط.
· الشهرة في السودان اسهل من عدم الشهرة!!
· أية افرو خلقت (فراغ) عريض لبطولة سيكافا.
· الناس خلوا (سيكافا) وقبلوا على آية افرو.
· الكارثة الاكبر تتمثل في هذا الخبر : ( كشف معلومات مطلعة في اتحاد كرة القدم السودان وفي اللجنة المالية لبطولة سيكافا الجارية حالياً في الخرطوم، عن حصول الموديل آية آفرو على مبلغ 500 مليون جنيه بالقديم (نصف مليار) مقابل الترويج للبطولة وتحديداً التصوير مع لاعبي المنتخب السوداني وزيارتهم ورفع الروح المعنوية، والترويج في الوقت نفسه للبطوله. وقام المراقب الاداري لمباراة منتخبنا الوطني الشاب ونظيرة اليوغندي التي جرت في ملعب كوبر امس بطرد اية افرو بعد ان انتحلت صفة المصور الفوتوغرافي ونزلت الي ارض الملعب).
· يروجوا ليها شنو سيكافا؟
· يروجوا ليها فضائحكم دي؟
· خروج المنتخب السوداني.
· المراقب الاداري الذي قام بطرد افرو مفروض يكرموه.
· الزول دا نجم البطولة كلها.
· تأهل منتخب جنوب السودان وخرج منتخب السودان .. شفتوا الكورة دي منصفة كيف ؟ لا بتعرف اسماء ولا بتعرف تاريخ .. وتعطي من يجتهد.
· لقد اثلج المنتخب الجنوب السوداني صدورنا .. وكان هو نقطة الضوء التى في اخر النفق.
· اعود الى الخبر اعلاه .. واستعجب من اتحاد الكورة – اتحاد معتصم جعفر وأسامة عطا المنان .. الذي لم يتكرم قادته بزيارة نصرالدين جكسا بعد اجراء عملية جراحية في مستشفى شرق النيل .. جكسا (التاريخ) الذي حقق للسودان لقب كأس الامم الافريقية الوحيد في تاريخه.
· اهتم الاتحاد بآية افرو ..ومنحها (500) الف جنيه .. ولم يساهم بمليم في علاج الكابتن وليد طاشين.
· مامون الطاهر اكثر شخصية قدمت الرياضة العالمية في السودان .. قبل (غوغل) ما سألوا عنه.
· انتوا ما بتخجلوا.
· لم يقدموا بطاقة دعوة للكابتن ياسر رحمة ولم يسألوا عن اللاعب الخلوق رمضان حبني الذي يعاني الآن ويتألم.
· عيب ان يحدث هذا من اتحاد الكورة – عيب في حق السودان ان تمثلوه في قيادة الاتحاد بهذه السطحية.
· لهذا خسر المنتخب.
· عدالة السماء كانت لهم بالمرصاد.
· الكورة (عادلة) و (منصفة) وما بتعرف المجاملات .. ولا تنتصر إلّا لأهل العطاء والجهد والبذل.
· افتكر احسن بعد كدا ألحق لي حاجة في تعادل الاهلي مروي مع المريخ امس في مدينة مروي.
متاريس
· قالوا ليك – والكلام دا ما يطلع من العمود دا .. ابوجيبين قرر يصرف حافز (النقطة) للاعبي المريخ بعد تعادلهم مع الاهلي مروي.
· الزول دا أي (نقطة) عندو ليها حافز.
· التعادل بحفز عليه.
· هسع ناس مزمل ابوالقاسم ح يكتبوا عنه ويشكروه و ما يخلوا ليه حاجة.
· والله يا حليل سوداكال.
· لو حازم (زرّاف الدموع) موجود .. كان شاف (العين الحمراء) من ناس مزمل بعد تعادل المريخ امس.
· الناس ديل لو مشوا (الجيلي) بقت (تنقط) عندهم.
· فقدوا (5) نقاط في كوستي وفي مروي.
· في القضارف تعنلوا شنو؟
· شيلوا شيلتكم.
· في عطبرة (النقاط) العندكم ممكن يشيلوها منكم.
· ناس عطبرة ديل خطرين.
· ولا بتفاهموا.
· عفارم على ناس مروي.
· اصلو ما قصرتوا.
· احلي حاجة في هدف محمد سعيد في المريخ .. (الطفل) الذي قلب الهوبة ودخل الملعب وعانق اللاعبين.
· حاجة روعة.
· اللقطة دي بـ (فيك يا مروي شفت كل جميل).
· كابلي صدق.
· الهلال الليلة ان شاءالله في بربر يقدم العرض والنتيجة.
· ما في مشكلة.
· ربنا يوقف الهلال.
· الله غالب.
· ………..
· ترس اخير : النقطة دي ذاتها لو ما النصري ما كان بترجعوا بيها من مروي.