* يحفظ تاريخ السودان (الحديث والقديم) كثير من قصص الزواج التى تمت بواسطة المحكمة ..
* (عقد) بواسطة (القاضي) ..
* يحدث هذا عندما يكون (أبو البت ما راضي) أو حتى عندما يكون (أبو الولد ما راضي) ..
* الولد والبت عايزين بعض ، والأهل ما عايزين إنو الولد والبت يكونو لبعض ..
* فيذهب الولد والبت للمحكمة ويتم الزواج وهو زواج شرعي ..
* وبرغم رأي المجتمع السوداني في مثل هكذا زواج إلا أن هنالك زيجات تمت عن طريق المحكمة ومن ثمراتها كثير من الأبناء والبنات الصالحات ..
* ماذا لو كان (القاضي الرياضي) يستطيع أن (يعقد) على (الهلال وبوغبا) ..
* الهلال وبوغبا عايزين بعض وصلاح أدريس رافض فهل يسن لنا شداد مادة جديدة تشبه (الزواج عن طريق المحكمة) ؟؟
* لو ظهرت مادة زي دي على بالنعمة أهلى شندي ما يفضل فيهو زول ..
* يرفض صلاح أدريس أو يوافق تبقى الحقيقة (95%) من نجوم اهلى شندي (مُكسرين في الهلال) ..
* وصلاح إدريس ذاتو مُكسر في الهلال ..
* نجوم أهلى شندي ممكن يجوا الهلال بـ(الإصرار والرغبة والتمرد) ولكن صلاح إدريس تاني إلا يشوف الهلال في السماء ..
* ضيق ذات اليد هو وحده الذي سيكتب عمر جديد لصلاح نمر وعلاء الدين يوسف بالمريخ ..
* عندما يكون (العدم) هو خيارك الأول والأخير فلاشك إنك ستقبل بالموجود ولا كتر خيرك ..
* المريخ الشهير بـ(المدفور) إذا أراد تسجيل لاعب إلا (يبيع كأس) ..
* (فقه البيع) يمكن أن ينقذ تسجيلات المريخ ..
* وعندي ليكم مقترح ..
* بقترح تدخلو في (ختة صندوق) ..
* أعملوا (صندوق) يتكون من : (المريخ ، الأهلي ، النسور ، الرابطة) على أن تكون (الصرفة الأولى) من نصيب المريخ عشان يلحق التسجيلات وكده ..
* طبعا الصندوق ده الهلال ما معاكم فيهو ..
* براكم شايفين (الكسكتات) شغالة كيف الأيام دي ..
* أعملوا الصندوق ده بينفعكم والله ..
* هكذا أقترح ..
* وأى زول طبعا حر في (مقترحاتو) ..
* أول مرة في حياتي أشوف لي نادي (72) يوم بدون رئيس !!
* وغايتو جنس غايتو ..
* إذا كان محمد موسى نجم الأهلى الخرطوم هو نجم التسجيلات في الدوري الممتاز فأن محمد عباس مهاجم أمبدة هو نجم التسجيلات من دوري الدرجة الأولى ..
* محمد عباس مهاجم أمبدة ونجم منتخبنا الشاب من المهاجمين أصحاب الإمكانيات الكبيرة وكل المنى أن نراه بشعار الهلال ..
* يمكن لغرفة تسجيلات الهلال أن تسأل خبراء دوري الأولى من إمكانيات محمد عباس الذي يعتبر مهاجم بمواصفات خاصة ..
* المهم ..
* إذا عاد مهند الطاهر لكشف الهلال يكون الفريق قد إستعاد (60%) من شكله المفقود ..
* مهند فيهو (ريحة الهلال القديم) وعودته تعني عودة كثير من القيم الهلالية الأصيلة ..
* ولذلك يستحق الكاردينال الشكر على هذه الخطوة الكبيرة ويستحق مولانا هارون التقدير إذا أكمل هذه العملية بدون (لكلكة) ..
* ويبقي من المهم جدا عدم التفريط في مؤيد الصيني ..
* الهلال يجب أن يرفض أى طلب إعارة بخصوص مؤيد الصيني ..
* الإعارات ممكن تكون لوليد الشعلة واطهر الطاهر وبشة الصغير ..
* الهلال الآن يحتاج كثيرا لمؤيد ، وحقيقة نتمنى أن يكون المدرب البرازيلي الجديد شجاعا حتى يعتمد على عناصر شابة ويصبر عليها ..
* بمناسبة الصبر ..
* عمار الدمازين في أيامه الأولى مع الهلال كان متواضعا للحد البعيد ولكن عدم وجود مدافع آخر جعل الهلال يصبر على الدمازين بكل عيوبه ..
* صبر الهلال على الدمازين وبعد ستة شهور أصبح الآن عمار من أفضل المدافعين بالدوري الممتاز ..
* وما كان له أن يكون كما هو الآن لولا الصبر والإستمرار في المشاركة ..
* وهذا يؤكد أن اللاعب إذا إستمر في التشكيلة سيفتح وسيتألق مع الأيام ..
* وما ينطبق على عمار الدمازين ينطبق على السموأل وقد إنطبق من قبل على قدوين وكثير من الأسماء ..
* وبما أن الإستمرار والصبر يصنع النجوم ننتظر قرار شجاع بإستمرار مؤيد الصيني في التشكيلة الأساسية حتى نشاهد نجم من ذهب بعد ستة شهور ..
* حل مشاكل الهلال موجود في الرديف والشباب ..
* إحنا لو ما طماعين ما بنشيل لاعبين من الأندية ..
* العندنا ديل بكفونا ..
* لكن ما مشكلة نشيل من برة وبرضو ما نظلم أولاد البيت ..
* ولازم برضو في التسجيلات نراعي تشليع المريخ ..
* دي أهم حاجة ..
* تسجل للهلال وفي نفس الوقت تشلع المريخ أو تحرم المريخ من الوصول لنجوم التسجيلات ..
* وهذا ما تم حتى الآن ..
* غير الهلال إتجاه حسين أفول وهو (لاعب صبي ومتمكن) وكذلك تم تغيير إتجاه محمد موسى لاعب الأهلى وأيضا هو مهاجم خطير ..
* تسجيلات الهلال هذا العام مبشرة جدا ..
* نجتهد أكثر ونمنع المبرزين في الدوري من التسجيل للمريخ ..
* ممكن نسجل اللاعب ونعيره لناديه ..
* لازم تخنقوا (مدفور البلد) ..
* تخنقوا وتحاصروا عشان يخرج من المولد بدون حمص ..
* أصلا المدفور في البطولات بقى يخرج من المولد بدون حمص ولازم برضو في التسجيلات يخرج صفر اليدين ..
* أظرف حاجة (ضفر قال الهلال فاوضو) ..
* هلال وين يا ضفر ؟؟
* (الهلالات) بقت كتيرة في البلد دي والحمدلله ..
* عشان كده نرجو من الأخ ضفر أن يوضح لنا هو قاصد ياتو هلال ؟؟
* ما ح نرد على ضفر إلا نعرفو هو قاصد ياتو هلال ..
* وغايتو الله يكفينا شر (المُصدي) اللمعتو الأيام ..
* ونركب صافنات ونجيبة (حمرية) وأصلو الزول بيموت والذكرى تفضل حية ..
* و..و..
* يمكن قاصد الهلال الأحمر
