فطور الجمعة !!
بالعربي الكسيح
محمد الطيب الأمين
* زمان كانت المدارس مبنية من (القش والجالوص) ورغم ذلك كان التعليم (مسلح ومتين) ..
* الآن أصبحت المدارس مبنية من (الطوب والأسمنت المسلح) فأصبح التعليم عبارة عن (قش وجالوص) ..
* الاهتمام بالتعليم من حيث (الكم) و(المباني) أطاح بـ(الكيف) و(المعاني) ..
* التعليم أصبح محتاجاً لتعليم ..
* أسوأ (خمسة) حاجات فى الدنيا دى (تلاتة) هي: (حريق الوسخ فى الحِلة صباح الجمعة) و(مسكول الصباح)..
* فى ناس (الوساخة) دي ما يحرقوها ليك إلا يوم الجمعة الصباح وفي نص الحِلة كمان ..
* يخلو ليك الجمعة دي دخان فى دخان من صباح الرحمن ..
* نعم النظافة من الإيمان لكن الدخان ده بيلحقنا أمات طه ..
* بمناسبة الدخان ..
* معلومة طبية أكدت ان (سجائر النعناع) يسبب (رطوبة في القلب) ..
* هنالك سجائر سوداني معروف وهذا السجائر نوعان: (نعنعاع) و(سادة) ..
* ولذلك نحذر الشباب من السجائر بصورة عامة ومن سجائر النعناع بصورة خاصة ..
* فى كثير من أحياء الخرطوم تجد العمارات مشيدة من طوابق شاهقة بينما تجد المسجد داخل الحي من طابق واحد ..
* عندما (تتطاول) منازل البشر على منازل وبيوت الرحمن علينا ان نراجع أنفسنا ونتدارك الخلل ..
* الذي يبني مسجداً فى الدنيا يبني له الله بيتا في الآخرة ..
* في دول اوروبا (البرد) يفتح شهية الناس للأكل ..
* وفي السودان البرد يفتح شهية (الحرامية) للسرقة ..
* حاجة تكسف ..
* حتى وقت قريب كنت أعتقد ان الكهرباء بتعادي ..
* فاكرها زي (النزلة) بتعادي ..
* كنت بعتقد إنو الزول لما تضربو كهرباء ويسلم عليك معناها انت ذاتك بتضربك الكهرباء ..
* هكذا كنت اعتقد ..
* وأي زول طبعاً حر فى (إعتقاداتو) ..
* قبل كده عندنا ولد في حلتنا ضربتو كهرباء إحنا تلاتة شهور ما بنسلم عليهو ولا بنأكل معاهو في صحن واحد ..
* وغايتو جنس غايتو ..
* مهما كان البنطلون (ضيقا) عند الأولاد ومهما كان (الإسكيرت) ضيقا عند البنات فهو أوسع بكثير من (القبر) ..
* الملابس الضيقة التي إنتشرت وسط الجنسين هي أوسع من (القبر) ..
* (ضيق الملابس) هين وساهل ولكن (ضيق القبر) هو الأصعب والأخطر ..
* والخطورة تكمن في أن (ضيق القبور) أبدي والى يوم الدين ..
* الذكي هو الذي (يلبس واسع) ويعمل صالحاً حتى اذا دخل القبر وجده أوسع من بيته في الدنيا ..
* إنصاف فتحي هي أكثر فنانة مؤهلة لقيادة الساحة مستقبلا ..
* إنصاف فنانة صاحبة صوت جميل ومثقفة وواعية بدورها كفنانة وكشابة سودانية ..
* نصيحتي لانصاف أن تتعامل مع الوسط الفني بـ(أطراف أصابعها) ، من بعيد لبعيد ..
* الوسط الفني (يسئ المعاملة) مع البنات ..
* قالوا ان (لحم الأرانب) علاج لكثير من الأمراض ..
* هو أنا عليك الله وكت بقدر (أقبض) لي أرنب بكون عيان كيف ؟؟
* ولا لحم الارانب ح تبيعوهو لينا في (الجزارات) ؟؟
* نحنا علاجنا في (لحم الضأن) بس أنتو اوقفوا التصدير ..
* ما في حاجة جايبه لينا (سوء التغذية ده) إلا التصدير ..
* في المثل يقولون : (سمن علي عسل) ولا يقولون (عسل علي سمن) مع إنو (الطعم) واحد ..
* والناس أيضاً يقولون: (الهلال والمريخ) ولا يقولون (المريخ والهلال) ..
* حتى المريخاب أنفسهم يقدمون (الهلال) على المريخ وفي النهاية لا يصح إلا الصحيح ..
* الصداع النصفي أو (نصف الصداع) هو من الامراض التي أصبحت شائعة جداً ومؤلمة جداً ..
* والمصيبة ان كل من يشعر بصداع نصفي تجده يبلع (بندول ومسكنات) ..
* في ناس المسكنات دي يبلعوها زي الحاجة السمحة ..
* يحس بنصف صداع يجري جري يبلع بندول ..
* ولا بيتلفت ..
* والبندول يا كافي البلا ما جايب حقو ..
* تبلع ليك شريط بتاع بندول وتلقى الصداع زايد ..
* إنتو البندول ده صيني ولا شنو يا مأمون حميدة ؟؟
* أنا ما عارف الكعب البندول ولا كعب الصداع العندنا ؟؟
* غايتو في واحد كعب .. يا البندول ده صلاحيتو منتهية ويا كمان الصداع اتطور وأصبح أكبر من قدرات البندول ..
* أي حاجة في الدنيا دي عندها (حناكيش) ..
* وناس قاردن سيتي والمنشية والرياض هم (حناكيش) الخرطوم ..
* و(العجوة) هي حنكوشة (البلح) ..
* حتى البلح عنده (حناكيش) ..
* و(الصلصة) هي حنكوشة (الطماطم) ..
* و(الهايس) حنكوشة (المواصلات) ..
* و(النيل الأزرق) حنكوشة (الفضائيات السودانية) ..
* و(الأسبورتاج) هي حنكوشة (العربات) ..
* وبالمناسبة ..
* (الرماد) هو الابن الشرعي للنار ..
* الكبريت هي (أبو الرماد) والفحم هو (أم الرماد) ..
* والكبريت التي تمثل (أبو النار) هي في نفس الوقت (حبوبة الرماد) ..
* وهذا (نسب) صعب جداً ..
* أشرح ليكم .. الكبريت (أبو النار) عندما نولع بها (الفحم الذي هو أم النار) يتم إنجاب الرماد ..
* والكبريت دي ذاتها تمثل أبو الفحم لأنها تحرق الحطب فيصبح فحم ..
* خلاصة القول : (النار تلد الرماد) وبعض أبناء الفنانين هم عبارة عن (رماد فني) ..
* (فطور الجمعة) محاولة للإستراحة من الكتابة في الرياضة ونرجو أن نوفق فيها ..
* ونركب صافنات ونجيبة (محسية) وأصلو الزول بيموت والذكرى تفضل حية ..
* و..و..
* ويا نجوم الليل اشهدي …(الحرامية ما خلو لينا موبايل في البيت) ..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملوh التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
على متجر apkname
https://apkname.com/ar/net.koorasudan.app