قبل مُواجهة الهلال تحذيرٌ رسمي للمريخ (لو ما فاطر ما تخاطر)!!

صَـــابِنّها
محمد عبد الماجد
قبل مُواجهة الهلال تحذيرٌ رسمي للمريخ (لو ما فاطر ما تخاطر)!!

في اعتقادي الشخصي أنّ الوسيلة التي يُطبّق بها (الانضباط) أهم من غاية (الانضباط) نفسه.
لا تدعو للانضباط بالفوضى.
في مدارس التربية الحديثة ومذاهبها، الجلد والعقوبات لم تعد الوسيلة المُجدية لتربية الأبناء وتعليم النشء.
ولدك في البيت في هذا الزمن لو ما قعدت معاه واتكلمت بالمنطق ما يقتنع ليك، وبعمل الحاجة الفي رأسو. والله نحن أولادنا ديل لمن نكون عاوزين نناقشهم في موضوع، بنشرب معاهم القهوة.
في الحرب دي!!!
طريقة تربيتنا نحن زمان تختلف عن طريقة تربية أولادنا الآن.
لا يمكن أن تحقق الانضباط بصورة أو طريقة غير منضبطة.
دا كلام نهائي.. عشان ما تقعدوا تتغالطوا لي في التعليقات.
وهذا كله مقدمة الى أن سلوك أو طريقة المدير الفني للمريخ مع لاعبيه (غير منضبطة)، وهي لن تؤدي إلا لتفكك المريخ وهذا ما يحدث الآن.
هسع لو عاوز تزرع ليك شجرة نبق بتغرس ليك بطيخة.
بتغرس دي ما بتلقوها في حتّة تانية.
الله يرحم زمان تدفن!! هسع بقينا نقول تغرس.
عندما أشاهد انفعالات مدرب المريخ في المنطقة الفنية وهو واقف على الخط متل مستر بين، أقول في نفسي، الزول دا ما عندو أي علاقة بالانضباط.. يا جيوفاني انت نفسك ومشاعرك ما قادر تسيطر عليها، عاوز تسيطر على لاعبي المريخ، وصينية الفطور.
اضبط نفسك أولاً.
إذا كنت (أوفر) في انفعالاتك بتكون (أوفر) في كل شئ.
شفتوا العلم دا!!
طبعاً في ناس ممكن يختصروا الموضوع ويقولوا لي: (إنت مالك ومال المريخ) وممكن كثير من المريخاب يقولوا لي: (خليك في فريقك) وهذه طبعاً نظرية بالية وقديمة، لأننا في مواقعنا دي ومع حربنا الشغالة بنتكلم عن خطة سلوت مع ليفربول، وبنتحدث عن غرفة ملابس لاعبي برشلونة وما يحدث فيها، وأي زول في العالم دا ممكن يتكلم عن سياسة البيت الأبيض وعن تخاريف بايدن، وعثرته على سلم الطيارة، وما في أمريكي واحد بطلع بقول ليك خليك في حربكم دي.
نحن في العالم الثالث بنتكلم عن فستان شاكيرا وعن طلاق بيكيه وما في زول بيسألنا، التكنولوجيا والعلم اختزل الفروقات أو انتهى منها. العالم اختزل الغرف والحديث عن أي فريق في العالم مدحاً أو نقداً ما عاوز ليه بطاقة تموينية أو واسطة.
وأي زول في العالم الآن بكتب رأيه ووجهة نظره في صفحته الخاصة وبتحدث عن الذرة والوصول للقمر.
الحاجات دي بقت عادية.. ما تقيفوا فيها.
في المريخ لا يمكن أن تبعد لاعباً أو تحرمه من الفريق وتعيده من موريتانيا الى بورتسودان رأساً عشان اتأخر 5 دقائق عن وجبة الفطور.
دا فطور شنو دا؟
يا زول نحن في حرب، وأي لاعب في هذه الأوضاع يجب أن تتعامل معه بفهم وذوق.
الذوق هو طريقنا إلى الغايات النبيلة، ما عندك ذوق ما بشيل منك أي حاجة ولا بعاين ليك.
ما تقعد تكورك ساكت.
السؤال هل هذه السياسة التي يتبعها جيوفاني في المريخ كان يطبقها في تجاربه السابقة، لا أعتقد انه كان يتجرّأ على ذلك حتى ولو امتنع الفريق كله عن وجبة الفطور، ناهيك من أن يتأخر لاعب 5 دقائق عن الفطور.. إلا إذا كان هذا المدرب يريد أن يثبت أن السودانيين ما عندهم انضباط ولا احترام للوقت، وحتى وإن كان ذلك أمراً نعاني منه جميعاً، فإن إزالته لا يمكن أن تكون بتلك الطريقة.
في المريخ زملاء افاضل وأصحاب مهنية وروية مثل ناصر بابكر وأواب محمد يا ريت يعملوا لينا تقرير عن انضباط جيوفاني وشعاراته وإفطاراته في تجاربه السابقة.
ما ممكن بعد بداية التنافس تستبعد ليك 12 لاعباً وتعمل ليك اختبارات لـ(5) محترفين أجانب بعد نهاية فترة التسجيلات.. دا انضباط شنو دا؟
نحن كمان ما بنعرف الانضباط.
الشخص غير المنضبط في العملية دي هو المدرب وليس جبرئيل أو موسى أو شمس الدين أو علي فداسي.
في المريخ أطاحوا بالكبار بقيادة صلاح نمر لاعب المنتخب الوطني حتى وقتنا هذا وحمزة داؤود واحمد بيبو والتكت بسبب عامل السن (بالمناسبة التكت دا كان أكتر لاعب بيزعجنا في مباريات القمة).
وبسبب الانضباط تمت الإطاحة بمجموعة أخرى جبرئيل وموسى وشمس الدين وعلي محمد علي ورامي والسبب التأخر في الحضور للفطور.
ما ممكن تستغنى عن نصف الفريق بسبب الفطور.
اذا تقبّلنا هذه الحلحلة والتفكيك للمريخ، لماذا فرّط المريخ في محمد المصطفى ومصطفى كرشوم ، وبخيت خميس وعبد الرحمن كوكو والتش والجزولي نوح.. فرّط المريخ في هذه الأسماء، لأن مجلس إدارة نادي المريخ غير منضبط.
يعني إنتوا عاوزين تعملوا المشكلة كلها في (الفطور).
وهل الطريقة التي سحب بها هيثم كابو المريخ من الملعب أمام الهلال في بطولة السوبر في تنزانيا كان فيها شئ من الانضباط.
يا جماعة الموضوع أكبر من الفطور.
عماد الصيني وبعده التش وعبد الرحمن كوكو فسخوا عقودهم مع المريخ، غير أن هنالك وسيلة أخرى لفسخ العقد في المريخ وهي أن لا تحضر أو تتأخر في الحضور لوجبة الفطور.
يمكن الجماعة ديل شافوا الغربال وجان كلود وأداما كوليبالي قالوا أحسن نهرب من مواجهة الهلال، قام عملوا شنو؟ قاموا اتأخروا في الفطور. وهذا سببٌ كافٍ للهروب من مواجهة الهلال، خاصةً أن هيثم كابو لا يتواجد في موريتانيا.
المريخ في مواجهة السبت ح يفقد زيكو وكابو.
لو عاوزين تمرقوا منها ما تفطروا.
وببني وبينكم الما فاطر ما يخاطر ويواجه الهلال، ناس جان كلود ديل زول ما فاطر خمس دقائق ما بقيف قدامهم ولا يكذب.
شوف عيني دي جان كلود عمل ليه عملية في مدافع موريتاني، دكتور في ضرس ما عملها.
اللاعب مشى شرق بينما ذهبت خلقاته غربا، وظلت (لغاليغو) مفقودة حتى وقتنا هذا.
رقم الفانيلة اتمسح من القميص والشنكار ظهر بعد المباراة في قدم لاعب آخر، وعيون اللاعب نزلت للنخرة، والنخرة وقعت في الركب، والركب اتبخرت في الجو.
والصرة اتلخبطت مع عضم الشيطان.
بمناسبة مباراة القمة، مرة سأل صحفي أمريكي، خريتشوف عن تقييمه لما أنجزته الدورة للجمعية العمومية للأمم المتحدة فأجاب ضاحكاً: (كنت في شبابي أعمل حطّاباً في جورجيا. كنت أعرف آخر اليوم ماذا أنجزت؟ من كمية الحطب الذي قطعته. أما هنا فكيف تقيس الإنجاز؟).
شوفوا الزول دا حسبها بالحطب. عشان ما تقعدوا تنظروا فينا ساكت.
الكلام دا علم ما انضباط.
طبعاً انتوا ح تقولوا الكلام دا علاقتو شنو بالمباراة؟
في ناس بقولوا كدا.
بتعرفوا العلاقة بعد المباراة، لو قلت ليكم الآن ما في زول بنلقاه واقف يواجه الهلال يوم غد السبت.
تتخيّلوا نحن المريخ دا بنفتش ليه فتّيش، من يوم ما قامت الحرب ما لقينا فيه فرصة.
عملوا الحرب سبب.
الحرب حرمتنا من المريخ.. الله يقطع سنينها.
نحن سنة ونص بنفتِّش في المريخ.
قلنا نواجه المريخ في بورتسودان، قعدوا ينقنقوا، قالوا في ظروف الحرب دي ما ممكن نلعب مباراة قمة.
الحصة وطن.
والناس في شنو وانتوا في شنو؟
سكتنا وكتلناها في قلبنا.
قلنا نعمل بطولة سوبر في تنزانيا.. جبنا حي الوادي عشان يتشجّعوا ويدردقوا ويواجهوا الهلال.
لكن عرفوها.
هيثم كابو نزل من المقصورة وسحب المريخ من الملعب.
الهلال ذاتو غلطان ما كان يغلب حي الوادي سبعة.
السبعة دي بتقطع القلب.
الجماعة قلبهم وقف.
في بطولة السوبر المريخ بعد ما نزل الملعب وعملوا القرعة هيثم كابو سحب الفريق، عشان المباراة متلفزة.
الفضيحة منقولة على الهواء.
قلنا ما مشكلة نقنص ليهم في سيكافا.. ناس المريخ ديل زمان كانوا كل خميس بنظموا ليهم سيكافا، أها الموضوع وقت بقى فيه جان كلود ومباراة أمام الهلال قالوا ما بنلعب.
رفضوا المشاركة في سيكافا.
قُمنا عملنا شنو؟
قُمنا عملنا الخطة (ب).
جيناهم بي هناك.
باللفة.
إلّا نعمل ليهم كدا.
شاركنا في الدوري الموريتاني.. وقلنا التنافس لازم يستمر، والحرب يجب أن لا تجعلنا نتوقّف.
الجماعة صدّقوا.
عملنا جدول الدوري وقلنا ليهم روفا مصاب وخادم مصاب وصلاح عادل مصاب وفوفانا مصاب والموريتاني الجديد فوفانا مصاب، وياسر مزمل مصاب ،وكل ذلك عشان يتشجّعوا ويلعبوا.
قالوا الفندق غير مريح.
والترحيل.
والفطور.
والاتحاد الموريتاني لم يلتزم.
هيثم كابو قعد يطنطن.
السَّلطة ما فيها ملح.
والشطة والليمون ما في.
لكن مع ذلك شافوها تقيلة ينسحبوا أمام الهلال تاني.
أو عاشراً.
لو حصلت في موريتانيا تبقى فضيحة.
لكن مع ذلك هيثم كابو ممكن يعملها ويسحب الفريق من الملعب.. قبل كدا عملها زيكو في الشوط التاني.
اصلو ما في حاجة غريبة.. أنا بكتب عن المباراة ومتوقع المريخ ينسحب في أي لحظة.
دا كلام كدا كان لازم نقوله قبل الحديث عن المباراة.
ومع كل الظروف التي يعيش فيها المريخ، علينا أن نحترم المريخ، ومع كلامي دا، لأن مباراة القمة تظل مباراة القمة حتى من غير فطور.
ما عاوز أقول في مباريات القمة الفريق غير الجاهز والفريق الذي يلعب كورة في الهوا ويلخبط المباراة هو الذي يفوز بنتيجة المباراة، لأن الكلام دا غير علمي وهو دعم رسمي للفوضى والسبهللية.
يجب أن ينتصر الفريق الأكثر جاهزيةً والأكثر تنظيماً، وإن كانت هذه الأمور يمكن أن تتفوّق عليها الدوافع والروح.
دوافع لاعبي المريخ ممكن أن تكون أكبر، لأنّ المريخ ليس عنده ما يفقده والبطولة الوحيدة التي يمكن أن يحققها هي الانتصار لا قدر الله على الهلال.
الهلال فنياً وتنطيمياً ومن ناحية الجاهزية والامكانيات والاستقرار ما عنده مشكلة، والفرق بينه والمريخ كبيرٌ، لكن يجب ان نعرف أن الدوافع والإرادة والإصرار هي التي تحسم مثل هذه المباريات.
على الهلال أن يلعب بروح، وأن يعرف أنه يلعب أمام الند التقليدي المعتاد، كما انه عليهم أن يعرفوا أن الانتصار في هذه المباراة يبقى حدثاً وتاريخاً.
ما تهملوا المباراة وما تتجاهلوا قيمتها.
في المريخ عناصر جيدة مثل رمضان عجب وطبنجة و محمد قباني ومصعب مكين والحارس النيجيري وموسى كانتي، وكردمان ومبارك عبدالله ومباراة القمة تبقى مباراة القمة.
أي انتصار لن يتحقق اذا لم تحترم الخصم، فكيف إن كان الخصم هنا هو فريق المريخ الند التقليدي للهلال.
الهلال يفقد بسبب عامل الإصابة عناصر مؤثرة مثل روفا والموريتاني خادم وهذه أمور يجب أن تجعل الهلال يلعب بحذر.
على الهلال ان يفرض سيطرته وأسلوبه في المباراة وأن يسجل أكبر عدد من الأهداف اذا اتيح له ذلك، لأن الهلال يمكن أن يحقق نتيجة تاريخية في المباراة اذا حالفه التوفيق في المباراة.
ما تضيِّعوا الفرصة.
انتوا الأفضل والأحسن والأجدر.
بعد الهدف الرابع يمكن الاستعانة بالأخ هيثم كابو.
اربعة ما كتيرة في الحرب دي.
… … …
متاريس
فقدنا في خضم هذه الأحداث السلطان كيحاب.. سلطان البحر، الذي كان يمكن أن يشرب البحر الأحمر كله من أجل المريخ.
كيجاب ممكن يشرب المحيط عشان المريخ.
بحر ما فيه كبجاب يقدل فيه التمساح.
نحن اتعلمنا العوامة بفضل هذا الاسم.
نسأل الله تعالى له الرحمة والمغفرة.
اقف اجلالا واحتراما لما يقدمه الزملاء الاعزاء في صفحاتهم على مواقع التواصل.
خدمات اخبارية وتحليلية ورياضية وحصريات وانفرادات ظل يقدمه الزملاء على صفحاتهم على مواقع التواصل الاجتماعي ، على سبيل المثال اذكر صفحات ومصطفي عيدروس وعبداللطيف ضفاري ومحمد الطيب الامين وعمر الطيب الامين وشمس الدين الامين وسامر العمرابي وسالم سعيد وعاطف الجمصي ودكتور حسام وايمن اليماني واستاذنا رمضان احمد السيد واستادنا ابراهيم عوض.
في غياب الصحف تقوم هذه الصفحات بدور كبير وهي نجحت في ان تسد الفراغ وان تجعل الرياضة في السودان حاضرة رغم توقف النشاط.
كذلك تقوم الصفحات المتخصصة والجماهيرية في الهلال والمريخ بدور عظيم وتحدث حراك تفوقت فيه على حراك الحرب.
ونلتقي إن شاء الله على انتصار.
ونقول يا رب.
انتصار الهلال اكيد ان شاء الله.
الله غالب.