قدامو ده (الرادي) وتلفونو (بقادي) !!

قزاز ورذاذ
محمد الطيب الأمين
قدامو ده (الرادي) وتلفونو (بقادي) !!

* عندنا في السودان الزول بعد ينزل معاش بشتغل شغل بعيد كل البعد عن الشغل الكان شغالو قبل المعاش.
* عسكري معاش .. حالياً شغال ترحال.
* مفتش في السكة حديد معاش .. حالياً عندو دكان.
* مهندسة في الشركة السودانية للكهرباء معاش .. حالياً شغال سواق هايس.
* وأي زول نزل معاش في مرحلة لازم يمر بها.
* مرحلة إنك (تخت الكرسي في ضل العصر في الشارع ويكون جمبك راديو والإذاعة شغالة والتنظير شغال).
* مرحلة إنك كل ما تشوف شافع ماشي تناديهو ترسلو.
* وتسألو تقول ليهو انت ود منو؟
* مرحلة إنك تتكلم في السياسة والرياضة والإقتصاد وضربة العراق وعلاج السكري والدفاع بالنظر وكدايس مستشفى أم درمان.
* المرحلة دي كان ماري بيها غارزيتو في فرنسا خلال السنوات الأخيرة .
* غارزيتو ترك الكورة وطلع ليهو كرسي في باب بيتو في حي الهدى في باريس وقاعد في ضل العصر.
* قاعد وجمبو الراديو ومُشغل (هنا باريس).
* قدامو (الرادي) وتلفونو (بقادي) .
* غارزيتو ما خلى ليهو شافع في باريس ما رسلو.
* شغال مراسيل وذكريات.
* ما كان متوقع إنو في نادي ممكن يتصل عليهو.
* عشان كده بقى مركز مع (الرادي) وخلى تلفونو بقادي.
* قام سوداكال اتصل ، رد عليهو أنطونيو.
* سوداكال قال لانطونيو : يا ود اديني أبوك.
* وتم الإتفاق.
* أول طيارة وصل غارزيتو ومعه (المرافق) أنطونيو.
* وغارزيتو طبعاً بقى لا بشوف ولا بسمع.
* لكن بشتكي بس.
* بعرف يشتكي للفيفا.
* بعد أن نزل معاش بقى شغال شكاوى.
* غارزيتو قبل ما يكمل الأسبوع الأول مع المريخ (تعادل وخسر).
* واتشاكل مع حوالي سبعة لاعبين.
* غارزيتو لازم يخاصم (نص الفريق).
* قبل كده غارزيتو أبعد بلة جابر من التشكيلة عشان بلة ما سلم عليهو في يدو.
* والله صحي.
* المهم.
* الفرق بقى ست نقاط.
* وبعد مباراتكم أمام هلال الفاشر إن شاء الله الفرق يبقى تسع نقاط.
* قبل كده الهلال شال الدوري بفارق ١٨ نقطة.
* والسنة دي الدوري حقنا بفارق ١٢ نقطة إن شاء الله.
* حي الوادي نيالا ال(٢) الاخدها من الهلال مشى أداها للمريخ.
* وهلال الفاشر ال(٣) الاخدها من الهلال يارب يمشي يديها للمريخ.
* دفاع المريخ لا يختلف عن شوارع الخرطوم هذه الأيام.
* نفس الطين.
* دفاع المريخ محتاج إغاثة.
* دفاع ما بحب يزعل ليهو مهاجم.
* أما منجد النيل فهو (عبد الكريم جداً).
* منجد بمستقبل في الأقوان زي المكالمات.
* ماشاء الله تبارك الهلال ما نسحرو ليكم.
* بمناسبة منجد النيل.
* اتمنى أن يسحب الهلال الجنسية السودانية من الحارس اليوغندي جمال سالم .
* ضُر كده بس.
* المريخ تاني عشان يلقى ليهو حارس بمواصفات أبو عشرين تكون القيامة قامت.
* تعويض أبو عشرين صعب.
* جرح أبو عشرين زي جرح الريدة.
* قالوا غارزيتو طالب بالحارس أكرم الهادي.
* قالوا كده لكن ما ورونا طالب بيهو كلاعب ولا كمساعد مدرب بدلاً عن ابراهومة.
* غارزيتو الذي أصبح لا يفرق بين رمضان عجب وأمير كمال سيقود المريخ إلى الهاوية إن شاء الله.
* وغايتو السنة دي بالذات يا متنا من الضحك ويا كمان الضحك كتلنا.
* و. و.
* وقالوا متألم شوية ياخ ……… ( ما تأكل منقة بالشطة).