قطعت ونقطت!!

صابنها
محمد عبد الماجد
قطعت ونقطت!!

• نحن ممكن نعرش على كدا.
• الفرق بقى ( نقاط.
• فرق (الطب) من (الابتدائي).
• فرق (اللحمة) من (الفول).
• فرق (السمك) من (العدس).
• طبعا ما في حاجة بتجيب كسافتي في الدنيا دي غير (العدس) وقطوعات الكهرباء.
• والتوم هجو.
• كونها (تنقط) ما غريبة عليكم.
• لكن كمان مع (النقيط) جابت ليها (قطوعات).
• دي كتيرة.
• اول مرة اشوف لي تعادل يستمر (24) ساعة زي (وردية الجيش).
• تعادل زي الاجازة الاسبوعية.
• صفارة البداية في يوم وصفارة النهاية في يوم تاني خالص.
• مباراة شغالة يوم كامل وما قادرين تجيبوا ليكم (هدف).
• لعبوا في الليل ما سجلوا.
• جابوهم يلعبوا تاني في (النهار) برضو ما سجلوا.
• لا ليل لا نهار.
• يعملوا ليكم شنو؟
• الناس ديل (معلب الاهلي للسلام) خرب طبعهم.
• قالوا ليك ابراهومة بعد اول مباراة للمريخ في السودان بعد معسكر القاهرة اشتكى من (الطقس).
• الجو بتاع السودان ما نفع مع (بخيت خميس).
• وبكري المدنية قالوا ليك رغم انه (معلق) في السيستم … برضو بيشكو من (الطقس).
• الناس ديل خلوهم يلعبوا بي كشف فيه (41) لاعبا.
• وطلعوا ليهم الهلال من ملعبه.
• ومباراتهم شغالة (24) ساعة.
• والفرق بين الهلال والمريخ ( نقاط.
• معسكرهم في القاهرة استمر (99) يوما… احمد بيبو بقى حافظ شوارع القاهرة اكتر من شوارع الخرطوم.
• جابوا ليهم مدرب برازيلي ما نفع.
• مدرب انجليزي ما نفع.
• سوداني ما نفع.
• اخر حاجة جابوا ليهم مدرب تونسي ومدير كورة تونسي.. برضو ما في حاجة ظهرت.
• قلت ليكم المريخ ركب (التونسية) ابيتوا كلامي .. وعملتوا فيها زعلانين.
• اها هسع ان شاءالله كلامي يكون وقع ليكم.
• تبلعوا في الكلام متل الكسرة بالقرع ، وقت تبقى تبلع فيها من غير نفس.
• معقولة مباراة من يوم الجمعة لي عصراوية السبت ما قادرين تجيبوا ليكم فيها (هدف).
• قالوا ليك الحكم الرشيد محمد خير لو ما قنع من رمضان عجب وكابتن بشير كان المباراة استمرت لي يوم الخميس.
• تلعبوا سنة ما بتجيبوا ليكم قون.
• حقنا ما بروح ساكت.
• الجاكومي بعضمة لسانو قال لجان الاتحاد يسيطر عليها المريخاب.
• وقال اتفقنا مع الاهلي المصري.
• وقال اعلنت الحرب على الهلال.
• وقال لو الهلال برمجوا ليه مباراة في ملعبه سوف ننسحب من الدوري.
• الاتحاد سمع كلامهم واصلوا ما قصر معاهم.
• مع ذلك الفرق الآن بحمد الله وفضله ( نقاط.
• نقطة تنطح نقطة.
• الكلام دا زي العمارة البتكون من عشرة طوابق وجوارها بيت جالوص.
• ديل يعملوا ليهم شنو اكتر من كدا؟
• قطعوا ليهم الكهرباء.
• والموية.
• وبرضو (نقطت).
• خلوهم يلعبوا تاني يوم ، وفوق الزمن الرسمي للمباراة ادوهم عشرة دقائق تاني.
• الرشيد محمد خير اصلو ما قصر معاكم.
• منح لاعبي حي الوادي كروت صفراء .. ومنح المريخ مخالفات لا حصر لها ولا عدد امام منطقة جزاء فريق حي الوادي.
• الزول دا لو ما شافها شينة كان حسب ليه ضربة جزاء من رأسه.
• الحكم بدون أي سبب احتسب مخالفة غير مباشرة داخل منطقة الجزاء عشان جمعة جينارو احتفظ بالكرة اكثر من (6) ثواني.
• الكلام دا كان في اليوم الاول للمباراة.. اكيد الناس نسوا (الذكريات) دي.
• مباراة زي (ليالي الحلمية).
• احتساب مخالفة على الحارس لأنه احتفظ بالكرة اكثر من اللازم الحكام اتجاوزه زمان.
• الكلام دا خلوه.
• عمري ما حضرت لي مباراة احتسبوا مخالفة على الحارس لأنه احتفظ بالكورة اكثر من (6) ثواني.
• ناس الشناوي وابوجبل الكورة بحتفظوا بيها ربع ساعة ما في زول بيسألهم.
• بعدين انت يا الرشيد محمد خير مباراة شغالة لي تاني يوم زي المطرة … بتحاسب جمعة جينارو على (6) ثواني.
• بقت على الثواني دي.
• والله نحمد الله على نعمة الهلال.
• ما في حاجة بتريحني اكتر من ان يكون الفرق في النقاط بين الهلال والمريخ كبير.
• احلي حاجة.
• نحن في الاسبوع الـ (19) والفرق بقى ( نقاط.
• حالتها دي بنلعب برة ملعبنا.
• اها تاني قولكم شنو؟
• بنلعب في الجبل وفي كوبر والابيض وعطبرة وبورتسودان واستاد الخرطوم والفرق ( نقاط.
• اصلو ما عندكم عذر.
• الهلال لسه .. ما لعب في ملعبه.
• والملعب الرديف ما اكتمل.
• قلنا ليكم قروش الدعم السريع دي ما بتنفعكم.
• قعدتوا تغالطوا.
• تنططوا في عيونكم متل الاجازة السنوية.
• اها يا الجاكومي دي نهاية حربك مع الهلال.
• الفرق ( نقاط.
• ومجلسكم ما شرعي.
• قلنا ليكم الهلال دا ما تقربوا عليه.
• ما بتكسبوا عافية.
• قعدتوا تغالطوا فينا زي شجر (الحُنبك).
• انا ما عارف وقت الهلال يعمل ليه مجلس منتخب يحصل عليكم شنو؟
• حالتها دي بدون مجلس منتخب.
• والله كمان الهلال جايب ليه مجلس منتخب – الفرق من اول اسبوع في الدوري بين الهلال والمريخ بكون ( نقاط.
• الحمدلله.
• الله يديم علينا نعمة الصدارة والفرق الكبير.
• الهلال جايب ليه (مجلس منتخب) يدير (الكونغرس) ذاتو.
• بفضل الله وتوفيقه حقق الهلال الانتصار (31) مرة في (34) مباراة حيث تعادل الهلال فقط في ثلاث مباريات.
• المريخ في اخر خمسة مباريات حقق الانتصار مرة واحدة.
• والمريخ بيلعب بـ (41) لاعبا.
• من غير ناس الرشيد محمد خير وشانتير.
• ولجان الاتحاد يسيطر عليها المريخاب.
• والفرق ( نقاط.
• المريخ بالصورة دي محتاج يجيبوا ليه شانتير… الرشيد محمد خير براهو ما بقدر يعمل حاجة مع الملاعب السيئة دي.
• نسيب ناس المريخ.
• بي طريقتهم.
• هو انا هسع قلت حاجة.
• والله انا ماسك خشمي علي من الصباح.
• بي طريقتهم.
• حقق الهلال الانتصار على (اهلاوية) الدوري كلهم.
• بدأنا من الاهلي الخرطوم.
• ثم الاهلي مروى.
• ثم الاهلي شندي.
• بالدور.
• عارفين نحن قاصدين شنو؟
• قاصدين الاهلي المصري.
• الرسالة ان شاءالله تكون وصلت.
• واضحة.
• عشان تاني يا ناس المريخ تتفقوا مع الاهلي المصري وتتآمروا على الهلال.
• دورنا خبط في (الاهلي).
• أي (اهلي) قابلنا خبطناه.
• من طرف بس.
• والموسم القادم عندنا كلام كتير ان شاءالله مع الاهلي المصري.
• نحن حقنا ما بنخليه.
• ولا بنجامل فيه.
• المهم انتصر الهلال على الاهلي شندي في مباراة صعبة.
• الاهلي شندي دائما بشكل عقبة امام الهلال.
• تقدم الهلال وتعادل الاهلي شندي قبل نهاية الشوط الاول.
• هذا السيناريو كان يمكن ان يطلعنا في حتة تانية.
• لولا ان الهلال يملك القدرة على العودة في أي وقت.
• وفي نفس اليوم.
• ما في (اليوم التالي).
• ولا في (الصدى).
• سجل وليد الشعلة الهدف الثاني للهلال.
• انتوا الشعلة دي طلع لينا من وين؟
• الشعلة رجع نار عديل من الكويت.
• الله يديك العافية يا شعلة الهلال.
• تجاوز الهلال محطة صعبة في الدوري.
• الهلال مرات بتعثر في المباريات التى تبدو ساهلة.
• نتجاوز الصعب ونتعثر في الساهلة.
• مباراة الهلال امام كوبر مباراة مهمة – ما تتهاونوا.
• عاوزين نحسم الدوري من بدري.
• وبفارق (18) نقطة.
• بقينا نطمع.
• يمكن تاني نرجع فارق الـ 18 نقطة.
• مباراة الهلال القادمة امام كوبر ومباراة المريخ امام توتي.
• عاوزين نشوف (كفاح) بعمل شنو؟
• فصاحة ساكت.
• وإلّا عندو كلام.
• بعد مباراة الهلال امام كوبر ومباراة المريخ امام توتي سوف تلعب مباراة القمة.
• وممكن الفرق من خلال هذه المباريات يبقى (14) نقطة.
• يمكن.
• ما في حاجة بعيدة.
• قولوا يا رب.
• ……
متاريس
• اذا وقع لاعب من الهلال في خطأ نرجو ان لا تكون هناك حملة جماهيرية عليه في مواقع التواصل الاجتماعي.
• الهلال ماشي في الطريق الصحيح.
• يجب كذلك ان يكون الجمهور ماشي في الطريق الصحيح.
• لابد ان تتغير بعض المفاهيم السالبة عند بعض الجماهير.
• اتركوا الامور الفنية للجهاز الفني.
• دور المشجع انو يشجع.
• كدا اقول ليكم.
• بكرة ما تمشوا بعيد.
• ان شاءالله عندنا كلام تاني.
• ….
• ترس اخير : نقطة يوم جديد.