=لا أعرف متى سنبلغ كلنا الحد الأدنى من التحضر والرقى، وندرك ونقتنع بأننا كلنا بشر يمشون على الأرض.
=. لا أحد منا يحلق فى السماء وحده أو يمتلك بمفرده الحقيقة واليقين والصواب، والآخرون فقط هم المخطئون والجاهلون والأغبياء..
=لا أعرف متى سنقتنع بأنه أبدا لن تتشابه أفكارنا وأحلامنا وأقدارنا، وبالتالى لن تتطابق أحكامنا واختياراتنا.ولن نكون كلنا سواسية كاسنان المشط ولن تتبدل او تتغيير قناعاتنا فيما قررناة
=ولن تنجح مساحيق التجميل في تغيير ماهو قبيح ولن يجدي اللطم والبكاءعلي اللبن المسكوب وهو وينو اللبن البقي رطلو بمبلغ22
=وسنظل هائمين ونغني مع الفنان علي اللحو تواة انا فنحن الان في حالة توهان ونغني مع وردة الجزائرية خايفة من بكرة واللي حيجري
=واحيانا نصرخ مع نجاح الموجي في احدي مسرحياتة زغردي ياانشراح مااللي راح راح
=كل الاشياء الجميلة راحت واختفت والسبب ان البعض من المسؤلين عامل اضان الحامل طرشة وسادي دي بطينة ودي بعجينة وهم ما ناقشين اي حاجة
=يقولو ليك الزول دة قاعد ساكت وتمومة جرتق يعني بلغة الرندوك ماناقش حاجة وبرة القيم دة زي تصريحات من يستضيفوهم في القنوات الفضائية ومكتوب تحت اسمه خبير استراتيجي البلد كلها فجاءة كدة بقت خبراء استراتجيين ونشطاء سياسيين.
=وهو ما ينطبق علي السادة الجهابزة وعدد من المسؤليين الذين يتحكمون فينا الان ويجرجوفينا كل يوم لقاء وكل يوم حوار واجتماعات خارج البلاد واستهلاك ومضيعة للزمن والوقت وليبيا واليمن ضياع زمن وامريكا روسيا قد دنا عذابها
=مش كانوا بيقولو لينا كدة ايام الانقاذ ونحنا يا مؤمن يا صديق صدقنا وانتظرنا عزاب روسيا وامريكا وكان عزابنا والامنا
=وكان الخروج للشوارع والمظاهرات والضرب والدم والموت والبمبان والرصاص والمطاردات في الشوارع ليلا
=ونجحت الثورة بفضل إرادة الشباب لاحزب لة دور ولاحركة مسلحة ولا عسكر ولا حرامية ولا ناس قريعتي راحت الثورة دي ملك حر للشباب وللكنداكات.
=ونجحت الثورة وغنينا مع الشباب حققنا احلامنا وفجاءة كده الجماعة تلبت جو ناطين وعملوا أسيادها وبقوا هم البفاوضوا نيابة عن الثوار والكنداكات.
=وكل يوم دراسة لمسودة وعرضها علي الاعضاء والحركات المسلحة وتاخد ليها كم يوم
= وكل يوم يصبح نصحي علي اشاعة وانقلاب وناس قبضوهم وناس فكوهم وتحقيقات وتحريات تحفظ في الادراج
=من الثورة دي ماقامت يطرشنا كان سمعنا بزول تمت محاسبتة او ادانتة اومعاقبتة ياااخي كشكروا لينا ساكت انو في زول تمت معاقبتة شنو يعني لجان التحقيق انتهت ورفعت تقريرها وين القرارات وين العقوبات وين ووين وووين يالرحتو وطولتو وعلينا ماسالتو
=دة حالنا كدة وانتو حالكم كيف والدنيا دوارة والامور جائطة وانا هائص وانتا لائص
=وبقينا نلعب الليدو والرمة والحراس ونسينا سكج بكج وفلفلت حتي مناهجنا الدراسية تغيرت والزمن غير ملامحنا وبقينا نحنا مانحنا
=وياريت نعود لزمان وايام زمان لمة العمات والخالات والجيران والبيت المليان ضيوف والقيادات الصادقة والمسؤؤلين البحسمو الامر دون جرجرة وملاواة واكاذيب
=ونغني زي زمان لما كنا صغار كنا نغني يارب المطر جيب المطروالان نغني يارب الكهرباء يجيبوا لينا الكهرباء والان وبعد ان كبرنا وكبرت احزاننا بقينا نغني وين رحتا عني بعيد شلتا الحنان والريد وين حبنا العشنا لوابعدونا بعيد
=ونصرخ ونرفع الاكف عودي لينا يا ايامنا الجميلة وابسمي يا ايامي فنحن الان نعيش في زمن اغبر زمن ما فيهو رحمة
=والمفاوضات تاني تبدا ونعود تاني من تاني وتلقي الريد معايا لحظة مانسيتك ولانساني لابنساك ولابقدر والليلة المفاوضات مع الحلو وناس المفاوضات فاوضوا الناس الما عندهم قوة وخلو الحلو وهسة رجعوا
=يعني بقوا زي ناس الكهرباء بعد يقطعوها فترة النها ربقي في ساعتين تلاتة زيادة المساء نظام لوكنتا برة البيت وفاتتك قطعة النهار تحضر الاعادة بالليل وناس الكهرباء ديل عايزين ليهم مليونية براهم وحسبنا الله ونعم الوكيل فيكم
=انة زمن الملائكة والشياطين
=وحليلو هو
=اخر المشاوير
=كل يوم اشاعة وكل يوم كلام جديد وزل عمل انقلاب
=وبقينا كاننا نشاهد مسرحية ريا وسكينة وسهير البابلي وشادية يقتلوا النسوان ويشيلوا الدهب ولما زوجيهما عبد المنعم مدبولي واحمد بدير يقولو ليهم ماتطلعوا برة البيت في ناس بقتلوا النسوان نرد شادية وسهير بصوت واحد اوشاعات
= البلد بقت زي صاج الطعمية كل يوم يقلبوا فيها
=سؤال برئ جدا كم عدد الانقلابات التي حدثت خلال ثلاثة اشهر
=والناس البعملوا في الانقلابات دي نسوا ان الشعب لن يرضي بحكم العسكرمهما كان
=هل يريدون ان يلحقوا بلادنا باليمن وليبا وسوريا ونصبح غرباء ديار واوطان
=هل يريدون بدلا من ان نشم ونتشم عبير الحرية نشتم البارود وصوت الرصاص يلعلع في كل مكان
=صدقوني اذا ما سارت الامور علي ماهي علية الان فان طبول الحرب ستدق وتزهق ارواح ويكون هناك ضحايا وما اكثرهم في الحرب والسلم
=الوضع الان ينذر بالخطر والكل يتململ وغاضب علي كل من حوله =وناس الفارغة يتحدثون عن كاروهات الاصم وحكمة الدقير وقوة حميدتي ومرواغة كباشي وحنة الصادق المهدي
=والغاضبون يتحدثون عن عدم القبض علي رموز الفساد السابق ولاكتائب الظل ولا الدولة العميقة
=اعتقلوا من تريدون وحاكموهم بمزاجكم وأطلقوا سراح من تحبون
=بس أطلقوا سراحنا وخلونا نعيش عيشة كريمة بعيدا عن الوعود الكاذبة خلونا نحس بآدميتنا وأننا أناس خلقنا لتعيش عيشة كريمة وإلا اذهبوا كلكم لمذبلة التاريخ والدم قصاد الدم ودم الشهيد بكم
=وخلونا نواجة مصيرنا وتغني مع إبراهيم عوض لية بنهرب من مصيرنا
= شكرا لكم فانتم الحب وعمود الامس كان التيرمومتر الذي اصاب معاقل الدهشة وجفف مسافات الارتياب في حصافة القراء ومتابعي المشاوير شكرا لكل من هاتف او راسل حسن السمين معلقا علي عمود قديم وهذا عين الحقيقة.
=فالعمود يمر بمراجعات (ليست مراجعات الطاهر التوم) وتصحيح لغوي عمود الامس كان موجها لحصافة القارئ ليدرك حجم المعاناة التي يعيشها الهلال اداريا منذ سنون حيث الحال ياهو الحال ويغني عن كامل السؤال انما هو مقتضى الحال هوان ادارة الهلال.
=وبرضو ليه بنهرب من مصيرنا
=لما يطل في فجرنا ظالم نحمي شعار الثورة نقاوم ونبقى صفوف تمتد وتهتف لما يعودالفجر الحالم
=تروسنا تحمينا.
=خبر طازج لن نتراجع ونقاوم.
