لو السوباط مريخي وجا الهلال يبقى العيب في المريخ !!
بالعربي الكسيح
محمد الطيب الأمين
لو السوباط مريخي وجا الهلال يبقى العيب في المريخ !!
* في العلاقات العاطفية ، الحب يبدأ صامتا وبعد ذلك يعلن عنه .
* ما في زول بيجي يقول للطرف التاني من أول لقاء : (تعال نخش في علاقة عاطفية) .
* انت بتتعرف على الطرف التاني ومع الأيام بتلقى نفسك دخلت في الحب من غير إعلان.
* بتذكر كان عندنا صديقنا (اشتر جدا) .
* اشتر لدرجة .
* الزول ده لو قابل بت العصر ، المغرب بمشي يقول ليها : تعالي نخش في علاقة عاطفية.
* مشى للبت الأولى قال ليها : تعالي نخش في علاقة عاطفية ، قالت ليهو اقيف في الصف .
* مشى للبت التانية قال ليها : تعالي نخش في علاقة عاطفية ، قالت ليهو اقيف في الصف .
* اي بت يطرح ليها الموضوع بتقول ليهو اقيف في الصف .
* بتقول ليهو كده حتى لو كانت غير مرتبطة لأن طريقته (بالغت الشتارة) .
* الزول ده يوم من الأيام قابل ليهو واحدة وقال ليها : تعالي نخش في علاقة عاطفية.
* البت قالت ليهو : جدا ما عندي مانع .
* ما قالت ليهو اقيف في الصف .
* ونحن وأولاد حلتنا الكلام ده ما وقع لينا .
* إشمعنا يعني البت دي وافقت ؟
* عملنا تحري وسألنا عن البت دي وفي النهاية عرفنا السبب .
* السبب انو البت دي هي ذاتها (شترا) زي صاحبنا .
* زولة شترا لو قابلتك في المواصلات بتقول ليك : تعال نخش في علاقة عاطفية.
* اشتر ولاقى شترا .
* المهم .
* وبما أن ذلك كذلك نجد أن من يرغب في الجلوس على كرسي رئاسة الهلال لازم يقيف صف .
* في المريخ ما في صف .
* تمشي المريخ تقول ليهم داير اخش في علاقة عاطفية – أقصد تقول ليهم : داير ابقى رئيس بيقولوا ليك جدا طوالي .
* لا صف ولا يحزنون.
* قاعدين في السهلة .
* ناس المريخ بيعرفوا (رئيسهم) هلالابي ولا مريخابي بعد ما يجلس على كرسي رئاسة المريخ .
* بعد يبقى رئيس بعد داك بعرفوا هلالابي ولا مريخابي .
* وتعال اناقشك.
* جمال الوالي لما جاهم كانوا (متكتمين) على حكاية انو جمال الوالي هلالابي .
* عملوا فيها غمرانين .
* بعد تلاتة شهور نحن عرفنا جمال الوالي هلالابي بيضارب .
* وهسه سوداكال هلالابي .
* وأبو العائلة هلالابي .
* والتش هلالابي.
* ورمضان عجب هلالابي .
* الوحيد الممكن أعترف ليكم انو مريخابي (صلاح نمر) .
* و معاهو أبو جريشة .
* غير كده كلهم هلالاب زعلانين.
* هلالاب زعلانين وما لقوا فرصة في الهلال .
* دي كل القصة .
* انت بتطلع للدنيا هلالابي وبعد داك ممكن تزعل وتقلب تبقى مريخابي.
* الأصل أن تكون هلالي .
* هسه مش في سودانيين ماخدين الجنسية الكندية والفرنسية والصينية ؟
* نفس الفكرة .
* في هلالاب زعلانين اخدوا الجنسية المريخية وهذا لا يسقط هلاليتهم.
* قالوا السوباط مريخابي .
* نفترض الكلام ده صاح .
* افرض انو مريخابي ، طيب العاجبو في الصف شنو ؟
* هسه انت لو مشيت (فرن) لقيت قدامك (١٧) شخص في الصف ، والفرن التاني ما فيهو صف ، بتشيل الرغيف من ياتو فرن؟
* أكيد بتمشي الفرن الما فيهو صف .
* السوباط مريخابي زي ما قلتوا ، طيب العاجبو في صف الهلال شنو والمريخ قاعد في السهلة ؟
* أنا غايتو شايف لو السوباط مريخابي وجا الهلال يبقى العيب في المريخ .
* أنا شايف كده .
* واي زول طبعا حر في (شوفانو) .
* من مصلحتكم ما تقولوا السوباط مريخابي لانو الحاجة دي بتقلل من المريخ .
* وما بتنقص من الهلال .
* نحن ما عندنا دخل في الموضوع لو الناس بتحبنا وجاية تشتغل عندنا .
* ١٧ قائمة تقدمت لحكم الهلال .
* ١٧ رئيس حتة واحدة .
* وال١٧ ديل لا فيهم الحكيم ولا فيهم الأرباب.
* عظمة ولا ما عظمة عليك الله ؟
* بزار ولا ما بزار ؟
* المريخ رئيس واحد وفاز بالتذكية .
* وبكرة فترتو بتنتهي وبرضو بفوز بالتذكية .
* سوداكال ده لو زعلتوا ما بتلقوا رئيس قريب .
* والناس (البعينوا) ليكم لجان تسيير فاتوا.
* يعني يا سوداكال ويا كمان ما في مريخ .
* عشان كده بقول ليك لو السوباط مريخابي وجا الهلال يبقى العيب في المريخ .
* قوم على حيلك .
* العيب في المريخ لانو بدفن الناس والناس بتجري منو لانو الهلال بيصنع الحياة .
* المهم .. من الغد سنبدأ تقديم (٦) نصائح للسوباط علها تعينه في المشوار القادم .
* نصائح نبتغي فيها الهلال ولا شي دونه .
* ونركب صافنات ونجيبة (كسلاوية) واصلو الزول بيموت والذكرى تفضل حية.
* و..و..
* وجيت اهنيك واصافحك وجيت أقول…….(مبروك توقيع إتفاقية السلام) .
ههههه تصدق العيب فيك انت الما عارف التاريخ وبتزور الحقايق قال هلالاب زعلانين .. والهلال ذاتو حقنا وولدنا شئت ولا ابيت ودي الحارقاكم وجارين منها
العربي المسيخ ما عندو سالفه وراعي الضأن في الصحراء عارف ان الهلال كان تبم المريخ ب بعد نشأة المريخ في عام ١٩٠٨م والهلال تم تكوينه بعد ٢٢ سنة يا مرسي وانت فاكر انو كتابات ناس العربي المسيخ والسيدة وناس احيييا متين اشوف الخرطوم بتغير الحقيقة والرشاشات فاكنها في روحهم ومصدقين انهم الفريق الأول لكرة القدم في السودان هههاي الزعيم اب زرد قاطرة الفرق السودانية والمدعوم وتيمنا ب احد العربات المجرورة قال هلالاب زعلانين قال كذبة اطلقها واحد عامل فيها دمو خفيف وأصبح ابوالهل يرددونها كالببغاوات…فعلا عك وعربي مسيخ.
المريخاب عينهم قوية و الله كاتبين انه المريخ المشهور بالاصيفر تاسس ١٩٢٧ و يجيك واحد يقول ليك ١٩٠٨ كمان اخجلوا اعرفوا فريقكم تتاسس سنة كم بعد داك اتكلموا
فريق فاقد هوية
بالله دا صحفي ؟! و كيف أخد القيد الصحفي ؟! المريخ النادي الأوحد في السودان العندو إنجازات قارية و إقليمية ، و العلال زيو و زى الصوفي القضارف لسة واقف في الصف لكن الفارق إنو الهلال عمرو 90 سنة و ما عندو أي إنجاز خارجي ، دا نادي يشكعوهو يا صحفي الغفلة ؟!
يا ابواحمد انت ما عارف تاريخ المريخ اصلا انت لا تحترم المنافس والدليل قالو لو هههه انت فاكر الاصيفر ذم وبتقلل من اب زرد قاطرة الفرق السودانية مريخ مانديلا هههههاي نحن عارفين نشأة المريخ منذ ١٩٠٨ لكن انت ما سمعت عن رديف المريخ في ذلك الزمان تقسيمه إلى فريقين المريخ أ والمريخ ب حيث تم فصل التيم ب وسموهو الهلال في سنة ١٩٣٠ والمريخ في ١٩٠٨م كان اسمه فريق المسالمة وفي ١٩٢٧ تم تغيير الاسم الى المريخ طبعا الرشاشات غير صفيح عنترة بن شداد ما شافو كأس خارجي لليوم ٩٠ سنة الصفر المعمر مدغلب في المعبرة وبعد الجوهرة والقوة الضاربة برضوا ولا كأس وكتابات العربي المسيخ والسيدة وباقي اعلام الفول على رأي ولدنا هيثم مصطفى ما بتغير التاريخ وما تفتكر كوؤس الصفيح حقت صلاح صالح من ١٩٩٦م لليوم حاتغير شي ههههه احييييا متين اشوف الخرطوم؟
اختشوا يابني دلقون. كم من المرات رافقتم الهلال لدوري الابطال بصحبة راكب؟ وكم مرة صعد الهلال لدوري الاربعة الكبار ونهائي الابطال ويجي واحد منكم يقول المريخ قاطر الاندية السودانية؟ اللهم الا يكون قاطرها بالخلف لجرها للوراء. انتم زبائن دائمين للتمهيدي وصعود يتيم لدوري الاربعة الكبار وكان بصحبة سيد البلد لو تذكرون يااصحاب الذاكرة السمكية. وفعلا الاختشوا ماتوا. عاوزين تاكلوا الناس حنك بكاس اهترأت من الصدأ. حتي اليوم الهلال هو قاطر الاندية السودانية للمشاركات في الابطال.