ليه نحنا عكس اوصافنا؟؟؟
في السلك
بابكر سلك
ليه نحنا عكس اوصافنا؟؟؟
*ليه نحنا كدة!
*ليه دايما واقعنا ماعندو علاقه بوصفنا؟
*نحنا اسسنا الاتحاد الافريقي
*ونحنا علي مستوي المنتخب والاندية بنطير قبل ماجدول المنافسة يبدأ
*نحنا سلة غذاء العالم
*ونحنا الجوع كاتلنا وكاتل المروءة فينا
*نحنا اكتر شعب امين في العالم
*ونحنا تسعة طويلة واحتيال بنكك وشيكات وخندقة ونشالين اسكت بس
*نحنا الشرف
*(ماقلنا شي)
*نحنا اشجع ناس في الدنيا
*ونحنا نكسر لي التلج وننافق علي كل الاصعدة
*نحنا مابنرضي في ارضنا وعرضنا
*وارضنا كلنا عارفينها اتقسمت (شلاتيت) وبقت(حلايب) للاغراب
*نحن جند الله جند الوطن
*وكلما تضيق نشيل جوازاتنا ونشتت
*وصلنا لدرجة نبيع البيت الكبير ونشتري شقه من ابن النيل
*ياحليلك ياوطن مابنقولها
*ونحنا
*ونحنا
*ونحنا
*والواقع يقول نحنا محنة وفي محنة
*لو دايرين نبقي نحنا زي مابنقول نحنا
*اول حاجة نعترف بعيوبنا بكل صدق
*عشان نصلحها
*عشان نغيرها
*عشان نبقي نحنا زي مابنقول نحنا
*نحنا اسسنا الاتحاد الافريقي
*ونحنا ملعب واحد مطابق للمواصفات ماعندنا
*لكن عندنا الفصاحة
*اسسنا
*الا تخجل هذه الدولة؟
*مابتخجل من روحها؟؟؟
*مليون فارهة ودشليون مخصصات وطيارة رئاسية وقصرين جمهوريات
*بالمناسبة دي يادوبك عرفت البشير بني التاني ليه
*عشان قصة دمج وعدم دمج دي
*كان اندمجوا يقعدوا في واحد
*ويخلوا التاني اسبير
*وكان ما اندمجوا كلو واحد منهما يقعد ليهو في قصر وكفي الله المؤمنين شر القتال
*المهم
*دولة لاتملك استاد واحد مؤهل ومشرف ومطابق للمواصفات
*دي دولة شنو دي؟؟؟؟
*ياخ ودوا الملعب الاولمبي حرب اليمن
*ولما يرجع شيلوا ريالاتو اهلوهوا بيها
*صعبة دي؟؟؟
*وحتي هوشة تأهيل الملاعب المدورة دي
*كتر خير الاذاعة الرياضية الفجرتها
*هل هذه الهوشة ستؤدي الي تأهيل مستقبلي دائم
*ام مجرد سراميك في بيت جالوص؟؟
*اخاف يعملوا غرفة جوار المساطب الشعبية يملوها بامبرس يوزعوهوا للرواد بدل الحمامات
*المهم
*استاد المريخ بالذات
*واقول بالذات لانو طبيعة الارض التي عليها الاستاد فريدة في نوعها
*كلها عيوب
*ومياه سطحية وملوحة
*يعني اي شغل ماعلمي ببقي علوق شدة ساي
*وبكون مؤقت
*القائمون علي الامر اتمني ان يركزوا علي الحتة دي
*بدل نصرف مليارات وبعد تلاتة سنين حليمة تاكل نيمها
*حقو نشتغل شغل معالجة نهائية
*محل مانقيف نقيف
*لكن شغل مؤسس
*ويجي غيرنا ويواصل
*وهكذا الي ان نكمل استاد لاموية سطحية بتجيهو لاموية مطر بتبيت فيهو لا نجيلة بتموت ركن ولا مدرجات بتقوم وتقعد براها
*امنياتي ان يكتمل التأهيل
*ولو الملعب الاولمبي
*وان يتوفق من يقوم بتأهيل القلعة الحمراء
*سراميك في بيت الجالوص مامعانا
*شكرا اف ام ١٠٤ علي مبادتك الكريمة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*انت يا والينا
*لو كلو والي علينا
*اهل استاد وااااحد في ولايتو لينا
*بكلفكم شنو وميزانيتكم طالعة من الامة دي من حشاها ومصارينا؟؟؟
سلك كهربا
ننساك كيف والكلب قال هو الاتحاد الافريقي ده مجنون؟؟حمامات لي شنو والبطون سكنها العنكبوت
والي لقاء
سلك
تحياتي ليك أستاذ بابكر …
لا تعليق … بس ربنا يوفقك و تسلم و كفى…..
والله الكلام البتقول فيه ده كله ما مصدقه ولا بينكبق علينا …نحن جند الله ورئيسنا البرهان وجماعته بيتلقو الأوامر من الخارج…نحن الشرف البازخ وكده شوف بناتنا فى مصر والإمارات عاملات عمايل ..نحن كورونا البيظيرو فيها لا لعبوها ولا شافوها ..معتصم وأيامه وسلة الرحلات ..نحن الامانه وكده طلع لى واحد عايش بشرف وبياكل حلال ….نحن وهم وواهمين نفسنا وكالعين فيها ساااااااااكت…التكتح ماعندنا
كل الدول حولنا تتفنن في إبراز الاستادات والملاعب والمسابقات وتفتخر بها وتظهر بها روعة الدول وتقدمها
الكثير منا لا يعلم من منشئات قطر والسعوديه وحتي مصر وتونس الجزائر والدول الافريقيه غير استاداتها
الكل ينظر تحت قدميه فقط
وين دور الإعلام والصحافه
لك الله يا سودان
الغريبة يا حاج تنقو إنه وطنيتكم دي ما بنشوفها إلا لمن حلمبوش تكون كاتمة فيه.!!
زمان زمن البتاع الطوالي وباصات لجان التيسير زمن البوفيه المفتوح والليالي الملاح، ولمن قروش الشعب كانت كابة هبطرش في الحفرة العميقة، نسيتوا الوطن ومسكتوا في الوطني ووليده المدلل…..!!
أسى كاهنكم مركب مكنة ثورجي وإنتي جايي الليلة تكلمنا عن ليه ما نكون ذي أوصافنا….. بالله.!!
ألعبوا غيرها……
الحفرة العميقة دعوات المساكين أصابتها، عشان كدة أحسن تستثمروها وتبنوا فيها خ….. يأت، خصوصا إنه تربتها عايمة 😂😂😂
صــــــــــــــــــــــــــــــــــــــــــــــــــه