مبروووك .. حمدوك حسم صفقة جيسي !!
بالعربي الكسيح
محمد الطيب الأمين
مبروووك .. حمدوك حسم صفقة جيسي !!
* إتصل (الولد) هاتفيا على (خاله) في مكالمة مختصرة قائلا : يا خال الليلة عازمنك (شاي مغرب) لازم تشرفنا .
* وافق الخال على الدعوة .
* وعند الساعة الخامسة اتصل ذات الوالد على ذات الخال قائلا : عليك الله يا خال وانت جاي جيب معاك لبن وسكر و(شاي حب) وكيس فحم .
* فرد عليه الخال : يعني يا ولدي (أنا مني الشاي وانتو منكم المغرب ولا كيف يعني) ؟
* معقولة تعزم ليك زول شاي مغرب وتطلب منو يجيب ليك حاجات شاي المغرب !؟
* طيب انت عازمو على شنو ؟
* (الشاي) بكل مستلزماته على الخال و(المغرب) على الأسرة.
* هسه نحن كمان .. (رقم تلفون) نجم بلاتنيوم جيسي على الكاردينال وتسجيل اللاعب على السوباط .
* يقول ليك الكاردينال حسم الصفقة .
* حسمها كيف ؟ قالوا شال رقم اللاعب.
* حسمها بالرقم ؟
* ولا حسمها بنفس الطريقة الحسم بيها (ساماتا والأخطر من ساماتا) .
* والله العظيم الهلال ده فيهو (حركات كده) لا تعرفها (حركات شفع) ولا تعرفها (حركات عبط) .
* ده غير الحقد والحفر والدفن الموجود عندنا .
* (٨٧) يفترض نشيل كأس .. عملوا حركات ضيعوا الكأس.
* (٩٢) يفترض نشيل الكأس .. عملوا حركات ضيعوا الكأس.
* (٢٠٠٧) يفترض نشيل الكأس .. عملوا حركات وطلاق وضيعوا الكأس.
* هسه دايرين يتشاكلوا في لاعب .
* ديل بيقولوا الكاردينال حسم الصفقة وديل بقول مجلس السوباط هو الحسم الصفقة .
* حرب عديل.
* حرب بين إعلام الكاردينال وإعلام الما كاردينال .
* كل واحد داير ينسب الصفقة ليهو .
* في حين إنو اللاعب لسه ما جا وما معروف يحصل إتفاق ولا ما يحصل .
* اللاعب ده ممكن يصل الخرطوم ويطلب ٢ مليون دولار وما يحصل إتفاق اها في الحالة دي الكاردينال ح يقول شنو ؟
* ح يقولوا شنو مثلا ؟
* لازم إعلام الهلال يكون أذكى من الاداريين.
* نحن دايرين اللاعب ده في الهلال بغض النظر عن الجابو منو .
* يجيبو الكاردينال يجيبو السوباط يجيبو حمدوك .. المهم اللاعب يجي .
* ما تعملوا حرب وتصعيد إعلامي ما عندو معنى.
* صحي الكذب والتلفيق ما حبابو.
* لكن ما مشكلة نصبر لحدي ما الصفقة تكتمل بعد داك نشوف الجابو منو .
* مش الكاردينال قال حسم الصفقة ؟
* طوالي نقول ليهو أي انت حسمتها وانت احسن زول .
* انتو خسرانين حاجة ؟ قولوا ليهو أي انت حسمتها.
* خلونا نسجل اللاعب .
* معقولة نقعد نختلف ونتشاكل : منو الحسم الصفقة ومنو الجاب الرقم ؟
* حقو نبقى أكبر من كده .
* نشوف مصلحة الهلال وين ونمشي عليها .
* ومصلحة الهلال الآن بتقول نضمن اللاعب ونسجلو بدون جوطة.
* الغاية هي أن نكسب خدمات جيسي .
* دي الغاية .
* لكن الجابو منو وعن طريق منو .. دي وسيلة ما أكتر.
* بكرة تقولوا السوباط حسم صفقة جيسي يقوم واحد هلالابي يحول قروش لناس بلاتنيوم ويقول ليهم : ما تفكوا اللاعب ده للهلال .
* الخبثة والكلتشات دي شفناها كتير في الهلال.
* بقينا ما بنستبعد حاجة .
* كلو وارد .
* عشان كده في الأيام دي ما تستفزوا الكاردينال ولا تستفزوا السوباط .
* البقول ليكم : أنا جبت جيسي قولوا ليهو شكرا كتر خيرك .
* اعملوا نايمين.
* خلونا نسجلو وبعد داك يتعمل مؤتمر صحفي والحقيقة بتظهر .
* دائما مشاكل الهلال سببها ناس الهلال .
* وبسبب مشاكلنا وحركاتنا دي ضيعنا حاجات كتيرة .
* ويارب ما نضيع هذا اللاعب.
* ظللنا ننادي بتسجيله في هذه المساحة إيمانا بموهبته العالية .
* وقلنا لو ما كورونا اللاعب ده ما كان بيكون قاعد لحدي الآن في بلاتنيوم.
* لو قعدنا نتشاكل في الزول الحسم الصفقة بكرة بنسمع بجيسي وقع لمازيمبي أو الأهلي المصري .
* يا كاردينال انت الحسمت الصفقة .. اها كده مبسوط ؟
* وغايتو جنس غايتو .
* ونركب صافنات ونجيبة (زيمبابوية) واصلو الزول بيموت والذكرى تفضل حية .
* و..و..
* الله يستر ما يجي الخندقاوي يقول لينا : أنا حسمت صفقة جيسي .
