مجلس شايت ضد رغبة الناس واصدقاء الWWX تناغم في الاحساس

تغريدة واتساب
بقلم : معاذ ابومؤيد
مجلس شايت ضد رغبة الناس
واصدقاء الWWX تناغم في الاحساس

الإحساس لما يكون معدوم مشكلة
ولما يموت مرة واحدة احسن تعليق تسكت وكمان بعد الموت جابت ليها عدم احترام لأحاسيس الجمهور دي بنقيف فيها الف احمر…
الجمهور دا خط احمر عديل
عذبتوه عذاب …
يعني وقت النفرة واقفين تتصوروا وعايزين تظهروا
ووقت الجمهور يتراجاكم عاملين فيها ماسامعين !!
بالله عليكم مين الزول النصيح الاقترح الانتخابات بعد التسجيلات!!!
دا اسه زول عندو احساس ولابيفهم ذي الناس !!!
••••••••••••••••••••••••••
هوي ياشفوت طالما جابت ليه عناد من الناس الفوق كمان نحن حاليا القوة المالية والجماهيرية الضاربة
جايانا تسجيلات بعد كم وعشرين يوم بالتحديد بعد يوم النفرة بثلاثة ايام سمعتوني ثلاثة ايام فقط !!
المطلوب كالاتي ياشفوت وضع مبلغ النفرة في البنك في حساب باسم جماهير المريخ ورقم الحساب يتوزع علي نطاق واسع عشان مريخاب الخارج والولايات يودعو مبلغ نفرتهم ونفرتنا دي مخصصة للتسجيلات فقط !!
عندنا ثلاثة خانات او اربعه محتاجة الفريق …
ندبر مالنا ونملأ الخانات بلعيبة وطنيين لو وفرنا نص مليار مع دعم من الاقطاب وميسوري الحال بنقدر نسجل ونسجل ونسجل ….
عشان ماننتظر رحمة زول ..
تكوين لجنة من القابضين علي الجمر والقلبهم علي الكيان وعمل حساب بنكي عشان نحول من اي مكان ..
بنرجع ليه بالتفصيل المشروع دا ونرشح اسماء له بإذن الله…….
••••••••••••••••••••••••••
مجلس منشق في نفسو
مجلس الرجل الواحد
مجلس جون سينا
معقولة بس !!
ماكنا مفتكرين الدولارات تشعل النار كدى !!!
والسفرية الأخيرة للخارج القشة التي قصمت ظهر البعير …
عايزين تقنعونا انها سفرية نصاح دي سفرية القنبلة الموقوتة ولها مابعدها؟؟
بس ماوقتو عشان نفتح الملف دا!!
اسه حاليا عندنا طلبين
عدم سفر جون سينا للجزائر
ودفع مستحقات اللاعبين
وعندنا بطرفكم نفرة القروبات تعادل نص مليار يعني ماعندكم سبب لعدم دفع المستحقات !!
دا غير الرعاية و التلفزة والدخل!!! الكاش موجود وماعايزين نقاش اعطو الاجير حقه قبل ان يجف عرقه واللاعبين ديل عرقهم جفة ليه اسبوع !!!!
تماطلوا لي شنو وعشان منو !!
عزر العملة الصعبة دا مافهم يدخل دماغ اي شفت صغير…
دي مطالب المدرج
ياريت تنفذوها قبل السفر للجزائر …
••••••••••••••••••••••••••
ومازالت تصريحاتكم متناقضة
وكل يوم واحد فيكم مصرح
جون سينا من الخارج بصرح
ومن الداخل بصرح
الناطق الرسمي منو!!
مجلس الرجل الواحد
نجم الشباك الاول جووووووووووون سينا ??????
جون سينا ماشي وسطينا ذي باص الوالي في شارع كلو ركشات
ماشي مقفل الطبلون وكل مرة شايت ليه ركشة ركشتين برة الشارع !!
لكن وين يالحبيب
الجمهور حيبقى ليك اندر تيكر ويقول ليك استوب …
الوقت الحالي مابشبه زمان والحلبة ماتتحمل الضرب تحت الحزام!!!!
دا عهد احتراف ياحبيبنا قصة العنترية دي موضة وانتهت ذي موضة قميص تحرمني منك !!
لانختلف علي انتماءك للمريخ
لكن نختلف علي اسلوبك الذي افقدنا الكثير !!
التغريدة ذاتها زهجت من الموضوع لكن مليون في المية الحاصل لايسر عدو ولاحبيب !!
والله ماقاصدنك لكن متاكدين انو التدهور بسببك!!
لو حبيب ارحل بهدوء عشان مصلحة المريخ
لوعدو ارحل قبل ماترحل كصاحب مقولة فاااااااتكم القطار !!!
••••••••••••••••••••••••••
بمناسبه جون سينا الاداري عنده زميل اخر إعلامي The rockوالاتنين أصحاب!!
وصاحب الفرمان الاعلامي اصدر بيان الحملة ضد لجنة التسيير علي الجميع اتباع الاوردات وتنفيذها حرفيا والتهليل بعد فوات الاوان!!
The rock الإعلامي يدافع عن صديقه بصرف النظر عن غلطات جون سينا الإداري بتوجيه ضربات خطافية باليد اليمنى واليسرى وشن حملة هوجاء ضد التسيير والطبطبة علي صديقه بهجمات ناااااااعمة
الصديق وقت الضيق
اشغل الشارع عني بحملة موازية علي لجنة الكنكشة !!
The rockالإعلامي اخطر من جون سينا الإداري
والاتنين ضرب تحت الحزام!!
لكن الجمهور مصحصح يالWWX…
••••••••••••••••••••••••••
ختاما
ابعدو جون سينا الهمام وسلموا اللاعبين الدولار واكد ليكم رفع اخوان المدينة التمام …
••••••••••••••••••••••••••
ونحن علي المدرج ونشجع ونتفرج في اخر عروض العام
وتاريخ جمعيتكم العمومية مابلزمنا لانو تاريخ غير مهضوم ومامناسب لحضراتنا..
لو بفهمكم دا اقعدوا لنهاية الموسم ساكت…
لانو الحيجي حيلاقيكم خربتوها وقعدتو علي طلها !!!!
الفريق محتاج ترميم في الخانات
وانتو ماعندكم اي دولارات
ذهابكم الان من الاولويات ….
منتظرين شنو ؟؟
عندي احساس عندكم امل تدخلو انتخابات الاتحاد العام او عايزين تحرجونا في منتصف العام ….
مدرجنا بيقول بصوت واااااحد اذهبوا فانتم الطلقاء….
••••••••••••••••••••••••••
همسة أخيرة
مامكن إدارة محتاجة إدارة!!!
دا علم جديد في إدارة الملفات مفروض يدرس في الجامعات!!
انتو ماشين بالمثل البقول
ليس ليس يطلع كويس
ماتصدقوا تلاقوا منبر يطلع صوتكم تمسكوا المايك وكل زول ينكر كلام التاني ….
غايتو اشغلتوا الشارع بتصريحاتكم وعملتوا سوق للصحف والإذاعات والتلفزيون….
عايز اقول ياخلف الله عذبتنا !!!
لقيت اكتر من خلف الله في لجنتنا ..
لكن جون سينا يظل النجم الاوحد
ويستاهل بصوت واحد
ياجون سينا عذبتناااااااااااااا !!!!
••••••••••••••••••••••••••
خارج النص
دعواتنا بالتوفيق للمريخ الزعيم
فوق كل ارض وتحت كل سماء
قبضوهم الكاش وانعشوا جيوبهم بالمال عشان نحاسبهم لو اخفقوا…
بحالتكم دي نحاسب منو ؟؟
موسمنا كامل في كف عفريت
وانتو عندكم امل في التمديد!!!
كنكشة جد !!
من انتم؟؟
من انتم؟؟
المريخ مريخ الشعب والشفوت هم الشعب
المدرج يقود ولاينقاد ….
••••••••••••••••••••••••••