بالعربي الكسيح
محمد الطيب الأمين
محل ما تهبشو بيتألم !!
* السودان حالياً محل ما تهبشو (بيتألم) ..
* زي الزول العامل (حادث موتر) ..
* الزول العامل حادث موتر تهبشو في (يدو) يصرخ، تهبشو في (أضانو) يكورك، تهبشو في (بطنو) يتألم ..
* كلو حتة في جسمو فيها وجع ..
* ده طبعا إذا (عاش) وما مات ..
* حادث الموتر هو من أبشع وأسوأ الحوداث التي يمكن أن تحدث وذلك لأن الموتر لا تتوفر فيه أبسط مقومات الحماية والسلامة ..
* وهو شر لابد منه ..
* السودان خالي من المواصلات ولذلك كل من يملك (قريشات) يفكر في الموتر بعد أن أصبحت العربية جميلة ومستحيلة ..
* نسأل الله أن يحفظ كل صاحب موتر ويبعد منه وعنه عوارض الحوداث وشرورها ..
* ولكن حال السودان الآن يشبه من يتعرض لحادث موتر ..
* كل حاجة في بلدنا بقت صعبة وقاسية ومؤلمة ..
* السودان محل ما تهبشو يصرخ ..
* كلو صعب ..
* ما في ساهل ..
* المواصلات قاسية ..
* مدافرة ومعافرة وركوب بالقطاعي وضياع زمن وضياع لياقة بدنية واستغلال وزيادة في التعرفة ..
* والمؤسف أن مرمطة المواصلات هذه تحدث على مدار الأسبوع ..
* الخميس بقي زي السبت والثلاثاء بقت زي الأحد ..
* الحصول على مقعد في حافلة مواصلات أصعب من الحصول على اللوتري ..
* خلي المواصلات تعال شوف الطب ..
* المستشفيات والعلاج قاسي ومكلف ..
* تدخل الصيدلية تشيل هم القروش أكتر من هم المرض ..
* وبعد ده تشخيص خاطئ و(بلادة) تحيرك ..
* تعال السوق ..
* كل شئ غالي في السوق لا تعرف تأكل ولا تعرف تلبس ..
* اللحمة ما بتتهبش، الفراخ غالي، الزيت، البصل، السكر، المعجون ..
* الحصول على الرغيف متعب وقاسي ..
* تقيف ساعة عشان تشيل رغيف ..
* والرغيفة عبارة عن (لقمة ونص) .
* ولو شديت حيلك (الرغيفة مجرد لقمة) .
* كل حاجة قاسية ..
* حتى المشي في الأرض بقى صعب ومتعب ..
* حفر وخيران ودقداق ..
* تجي بي جاي تلقى عبد الحي يوسف عامل موضوع من مافي ..
* تفتح الجرايد تلقي أخبار تتحدث عن ضبط ذهب مهرَّب في مناطق حساسة ..
* وتلقى خبر بيقول إنو السودان يستورد (دكوة) ..
* وحتى الهلال بقى كعب زي حال البلد ..
* الهلال يطلع من خسارة يدخل في تعادل ..
* نقول الهلال لأن الهلال بالنسبة لأهل السودان هو مثل الرغيف والدواء والماء ..
* كثير من القلوب تطيب عندما ينتصر الهلال وكثير من القلوب تعتل عندما يتعثر الهلال ..
* أما المريخ ما في زول شغال بيهو كتير ..
* يطير من التمهيدي ولا يتعادل مع حي العرب .. ما فارقة كتير ..
* المهم ..
* هذه القسوة التي نعيشها في السودان نحمد عليها الله ونتمنى أن يأتي الفرج من عنده قريبًا ..
* وعشان الكيزان ما يفرحوا ما في زول بيندم على الثورة ..
* عليَّ بالقسم ما ندمانين ..
* ولا ح نندم ..
* وما في زول بيقول حليل البشير ..
* لو نأكل صفق شجر ما بنقول حليل البشير ..
* ولحدي الآن نحن بنقول مشاكل السودان وهذه المعاناة (ورثة) ..
* صف الرغيف ورثة من النظام السابق ..
* غلاء الأسعار ورثة ..
* تخبط الطب ورثة ..
* سوء المواصلات ورثة ..
* ما في جديد ..
* كلو بايت ..
* ولكن ربما أن العشم عندنا بعد سقوط البشير كان كبير ..
* توقعنا أن ينصلح الحال بصورة أسرع ..
* ولكن هنالك بطء ..
* قد يكون هذا البطء منطقي بحسابات (الوحل الاقتصادي والأخلاقي) الموروث من النظام السابق ..
* البلد كانت (وحلانة) في الفساد ..
* نرجو من حمدوك وطاقم حكومته أن يسرعوا الخطوات ..
* دايرين نشوف ثمار ثورتنا ..
* نريد أن نرى ثمار الثورة في السوق والأسعار والمواصلات ..
* وطبعاً لا نغفل اجتهاد حكومة الثورة ونجاحها فيما يتعلق بالسيولة والبنوك ..
* ونتعشم في السرعة ..
* في حاجات وصلت الحد وحسمها يجب أن يكون أولوية ..
* ملف المواصلات لم يعد يحتمل التأخير ..
* انفلات أسعار الدواء والدغمسة الطبية لا تحتمل البطء ..
* الحكومة يجب أن تشتغل في كل الاتجاهات ..
* كل الملفات تكون مفتوحة ..
* شغل ليل ونهار ..
* ننقذ البلد ونخرجها من هذا الأزمات المستفحلة ..
* و..و..
* والحمدلله على كل حال .
