موتا ح يغادر حتى لو جددوا فيه الثقة 10 مرات !!

قزاز ورذاذ

محمد الطيب الأمين

موتا ح يغادر حتى لو جددوا فيه الثقة 10 مرات !!

* لم أخف تحفظي الكبير على إستمرار موتا مدرباً للهلال رغم الإشراقات التي لم تتجاوز حدود (الكرة الممرحلة أحيانا).
* وحتى الكرة الجميلة التي يلعبها الهلال لا تكون حاضرة في جميع المباريات.
* ولذلك من الصعب إستمرار موتا.
* ح يغادر ح يغادر.
* ح يغادر حتى وإن تظاهرت لجنة التطبيع بتمسكها به ليقود مشروع البنيان.
* ح يغادر مقالاً حتى لو جددوا فيه الثقة (عشرة مرات).
* ح يغادر لأنو ح يحرجهم مع الجمهور والإعلام.
* وجمهور الهلال ما عندو استعداد الفريق يخسر الدوري والكأس.
* ولذلك كان الوقت الأنسب لاقالته عقب نهاية دور المجموعات.
* والبحث عن مدرب صاحب (سيرة ومسيرة) لقيادة المشروع الجديد.
* في ناس طبعاً ماسكين في حكاية الاستقرار الفني.
* وده كلام ما غلط.
* كلام سليم.
* الاستقرار هو الذي يصنع النجاح.
* بدون استقرار فني لا يمكن أن تنجح.
* ولكن هل موتا هو المدرب الذي يجب أن نستقر معه وعليه ؟
* هل هو خيار المرحلة؟
* لا طبعاً.
* كلنا مع استقرار الجهاز الفني واستمراره لأطول فترة ممكنة ولكن مع مدرب بيستاهل الصبر عليه.
* جيب مدرب زي موسماني أو الأمين انداي ووقع معه عقد لخمس سنوات.
* جيب مدرب زي ده وح نصبر عليهو عشرين سنة.
* لكن ما بنصبر على مدرب (رأسو قرعة).
* والكلام ده ما بنقولوا عشان الفريق اتعادل أمام أهلي مروي.
* التعادل عنوان من عناوين كرة القدم الثلاثة.
* والهلال ح يتعادل تاني وح يخسر .. ودي متوقعة من واقع أن الفريق في مرحلة بنيان وتغيير جلد.
* هذا مفهوم بالضرورة.
* ولكن المشكلة أكبر من التعادل.
* المشكلة مشكلة مدرب متواضع القدرات.
* مدرب بوافق على شطب اوتارا في وجود إبراهيما.. ده مدرب غبي جداً.
* مدرب يفشل في حل مشكلة الهجوم لأكثر من ١٤ مباراة .. ده مدرب عبيط ساكت.
* ده ما مدرب بيصبرو عليهو.
* ولا ده مدرب يستطيع أن يبني.
* أي زول يقول ليك لمتين الهلال ح يقيل في المدربين قول ليهم لحدي ما يجي مدرب قدر المقام.
* جيب مدرب بطولات وح نصبر عليهو حتى لو هبط بالفريق لدوري الأولى.
* خلينا نكون مقتنعين إنو العيب ما في المدرب.
* لكن ما تجيب لينا واحد ما فاهم حاجة وتقول لينا اصبروا عليهو.
* نصبر عليهو عشان رخيص؟ ولا عشان بيعتمد على إبراهيما؟ ولا عشان بينفذ أجندة؟ ولا عشان داير يشطب اوتارا؟؟
* لجنة التطبيع ح تقيل هذا المدرب قريباً جداً وأخشى أن تتم الإقالة في الوقت الغلط.
* أبطال أفريقيا شهر أغسطس اكسبوا زمنكم وفتشوا مدرب زي الناس وواصلوا في البنيان.
* موتا بخلاف ضعفه فهو مدرب انطباعي وخلافي وموهوم.
* مغشوش الزول الفاكر إنو مدرب الأحمال ريكاردو غادر عشان ظروف البلد.
* مغشوش الفاكر إنو أخصائي العلاج الطبيعي غادر عشان ظروف أسرية.
* مغشوش الفاكر إنو موتا عندو مشروع في رأسو.
* و.. و..
* ويا الله مطرة.