نظرية (المفتاح تحت الطوبة)

صابنها

محمد عبد الماجد

نظرية (المفتاح تحت الطوبة)

· عندي نظريات حقاتي براي – عشان ما في زول يلفحن ..من وقت لأخر ان مد الله في الاعمار ان شاء الله سوف احدثكم عنهن.

· يعني كل مرة بجيب ليكم نظرية جديدة في هذه المساحة.

· زمان كان عندنا صاحبنا شفت – عارف أي حاجة…او كان يحاول ان يقنعنا بذلك.

· ونحن كنا بنصدق.

· صاحبنا وقت تجي بطولة نهائيات كاس العالم كان بقول لينا اوعكم تشجعوا البرازيل.

· كنا بنقول ليه : ليه يا اللكع؟

· كان اسمو (اللكع).

· اللكع كان بقول لينا لو شجعتوا البرازيل يوم منتخب البرازيل يكون عندو مباراة الكهربة بتقطع.

· الزول دا بي سببو كنا بنشجع كولمبيا!!

· نحن كان عندنا احساس انو (الكهربة) دي قاصدنا..ما بتقطع إلّا وقت يكون عندنا موضوع.

· اقول ليكم حاجة كشاهد اثبات.

· نحن لمن الكهربة كانت بتقطع كنا بنعرف طوالي ان الحلقة الاخيرة في المسلسل سوف تكون في هذه الليلة التى قطعت فيها الكهرباء.

· زمان ناس الكهربة عندهم جن مع الحلقة الاخيرة.

· المسلسل يكون مولع نار ..وقت يبقى على الحلقة الاخيرة – الكهربة تقوم تقطع.

· الحلقة الاخيرة في مسلسل (ليلة القبض على فاطمة) لغاية الآن ندمان عليها.

· النظرية دي كنت مسميها نظرية (غطاية الحلة). ولغاية الليلة ما عارف علاقة (غطاية الحلة) بالنظرية دي شنو؟

· موش مرات بتلقى ليك زول اسمو (جمال) وما عندو علاقة بالجمال – لا من بعيد ولا من قريب.

· مرة عندنا واحد اتعرف بالتلفون على بنت اسمها (جميلة).

· سنة ونص وهو بتكلم معاها بالتلفون.

· جميلة قالت.

· وجميلة عملت.

· اها وقت دخل مرحلة المجموعات ..وبقى على انو يشوف البنت عشان يمشي يتقدم ويطلب يديها …جانا راجع في الحلة وهو في حالة يرثى عليها بعد ان شاف (جميلة).

· قلنا ليه مالك يا زول ؟

· قال لينا والله انا ما ندمان على شيء ، إلّا اني قبل 6 شهور حولت ليها رصيد بي 10 جنيه!!

· قلنا ليه الحمدلله بقت على الرصيد.

· ندخل ليكم في نظرية اليوم.

· نظرية (المفتاح تحت الطوبة).

· اللصوص والحرامية و9 طويلة كلهم عارفين هذه الشفرة.

· كلهم عارفين المفتاح تحت الطوبة مع ذلك بفتشوا للمفتاح في حتة تانية…ونحن مع اننا عارفين الموضوع بقى مكشوف ومعروف برضو بنخت المفتاح تحت الطوبة!!

· نفسي زول يطلع من (الميّز) او (البيت) وما يخت المفتاح تحت الطوبة.

· الموضوع دا عملناه ونحن طلبة.

· وعملناه ونحن ناس كبار.

· ولغاية الآن وقت نطلع بنخت المفتاح تحت الطوبة.

· ما عارف (الطوبة) دي سرها شنو؟ عشان السودان كله يضع المفتاح تحت (الطوبة).

· اشرح ليكم النظرية.

· في الدنيا دي ما في حاجة بتزعلني قدر التعليقات التى يطلقها الكثير من الهلالاب قبل بداية التسجيلات.

· في هلالاب عندهم (فلهمة) عجيبة ..وقت يشرع الهلال في مفاوضة لاعب ..بكتبوا في التعليقات : الهلال ما محتاج لاعب.

· او عاوزين بيه شنو؟

· وفي ناس بكتبوا ما في احسن من اللاعبين الموجودين في كشف الهلال الآن.

· يا جماعة ليفربول بفريقو الحالي بسجل وبتفاوض.

· مانشستر سيتي.

· ريال مدريد بعمل في السبعة وذمتها عشان يسجل امبابي.

· برشلونة في عز مجدها كانت بتدخل التسجيلات بقوة.

· ما في حاجة اسمها الهلال ما محتاج يسجل.

· معقولة والهلال بهذا الحال دا ونسمع ان الساحة ما فيها افضل من اللاعبين الموجودين في كشف الهلال.

· على هذا الاساس يعني ان الهلال في هذا الموسم لم يعان.

· يعني الهلال مية المية.

· وكلنا عارفين ان الهلال يعاني في كثير من الخطوط.

· الهلال يعاني في الدفاع وفي الاطراف وفي الوسط وفي الهجوم.

· حتى على مستوى حراسة المرمى لو وجد الهلال حارس اخر ..ما كعبة معانا.

· الأسوأ من ذلك ان الهلال كلما دخل في مفاوضات مع احد لاعبي المريخ …بتلقى في جماعات كبيرة من جماهير الهلال هاجمت هذه الخطوة.

· انا ما عارف ديل منو؟ هل هم حقيقة من جماهير الهلال؟

· اذا صحت الاخبار التى تتحدث عن مفاوضة الهلال للاعب الجزولي نوح فهو امر جيد وهو خبطة داوية للهلال.

· تتخيلوا في زول بقول عن هذه الخطوة هل يحتاج الهلال للجزولي نوح في وجود الغربال وياسر مزمل؟

· ليه ما بنحتاج؟

· ريال مدريد عاوز امبابي وهو عندو بنزيما.

· ما في مشجع واحد في الريال بقول الريال لا يحتاج لامبابي في وجود بنزيما.

· الكلام دا ما بحصل إلّا عندنا.

· باريس سان جيرمان..جمع كل نجوم العالم في كشوفاته ..ولغاية الآن بيبحث وبفاوض وعاوز يسجل.

· ما في باريسي واحد بقول ليك باريس سان جيرمان ما محتاج لاعب.

· او ما في احسن من العناصر الموجودة في باريس سان جيرمان.

· انا مع العمل على تسجيل أي موهبة تظهر في الساحة والعمل على تدعيم الفريق بصورة مستمرة.

· الكورة دي زي الدنيا ..ما بتقيف عند زول ..لازم يكون عندك رغبة دائمة ومستمرة في الاضافة والتجديد.

· ما في فريق بحقق بطولات خارجية من غير اضافات.

· يمكن ان يكون هناك قوام ثابت للفريق …لكن مهم ان يكون هناك في اضافات في كل فترة تسجيلات حتى لو كنت تملك اعظم فريق في العالم.

· في اي فريق بيلعبوا زي 16 او 21 لاعبا بالكتير … أي لاعب خارج هذه التوليفة يمكن ان يغادر.

· لاعب ما قادر يدخل التشكيلة يبقى علينا ان لا ننتظر منه شيئا خاصة اذا تعدد المدربين عليه وبقى في الفريق اكثر من 3 مواسم.

· في كل وقت بظهر في الساحة لاعب جديد ..وأسلوب مختلف اذا توقفت عن الاضافة لن تتقدم خطوة الى الامام.

· الاجيال الجديدة دائما هي التى تملك القدرة على الرهان على المستقبل ..الاجيال الجديدة تكسب في كل مجال.

· انظروا الى ثورة ديسمبر المجيدة الآن يقودها الاجيال الجديدة والحديثة.

· الجزولي نوح لاعب صغير في السن وتسجيله في الهلال سوف يكون اضافة كبيرة للأزرق.

· أي كلام غير هذا الكلام يبقى كلام بتاع (انشاء) ساكت وكلام نظري وربما (نرجسي) كمان.

· الجزولي خلوه.

· تتخيلوا في جماعة حتى عمار طيفور بقولوا ليك الهلال يعمل بيه شنو؟

· لا الهلال سوف يعمل الكثير بعمار طيفور.

· ولو دفع الهلال أي مبلغ في نوح وطيفور ما كتير عليهما.

· التسجيلات يمكن ان تكون فنية ويمكن تكون تسجيلات ادارية ويمكن تكون تسجيلات جماهيرية وفي تسجيلات اعلامية ..اي لاعب ينتقل من المريخ للهلال ويكون صغير في السن بحقق كل هذه الامور.

· يعني تسجيل لاعب من المريخ خاصة اذا كان (نجم) في المريخ سوف يكون خبطة حقيقية ومع الاضافة الفنية والجماهيرية والإدارية والإعلامية التى سوف يحدثها في الهلال سوف يحدث عكسها في المريخ.

· الجاكومي اعلن الحرب على الهلال …خلاص خلوه يخم ويصر.

· ناس المريخ ديل أي لاعب من الهلال حتى لو كان (مشطوبا) ولا ينتظر منه بسجلوه ..لأنهم عارفين قيمة أي لاعب يأتي من الهلال حتى لو كان (مشطوبا).

· البعد الاداري والإعلامي والجماهيري في هذا الجانب مهم ولا يقل عن البعد الفني.

· الخبطة لا بد ان تشمل كل هذه الجوانب.

· الهلال لا يريد لاعبا مشطوبا من المريخ ..الهلال يريد عناصر شابة وموهوبة في المريخ ولم تلعب للأحمر اكثر من 3 مواسم.

· في ناس لا بدفعوا ولا بساهموا ووقت يسجلوا ليهم لاعب في الهلال يعترضوا عليه.

· وقت يمشي اللاعب للمريخ يقعدوا يكوركوا.

· في عناصر في الهلال خاملة ..يفترض ان ترحل وتذهب ..من الطبيعي ان تسد هذه الفراغات بعناصر جديدة وتمنح الفرصة لتثبت وجودها من بعد قد تنجح وقد تفشل وهذا امر طبيعي في كرة القدم.

· في لاعبين فشلوا في الهلال من الافضل ان نمنح اخرين الفرصة فقد ينجحوا.

· الكلام البقول ليكم فيه دا هو نظرية المفتاح تحت الطوبة.

· وعليكم الله ما تقولوا لي علاقة النظرية بالكلام بالتقول فيه دا شنو؟

· عشان ما عاوز اشرح اكتر من كدا – يقوموا ناس المريخ يغيروا مكان المفتاح.

· بالمناسبة متعة كرة القدم ليس في المستطيل الاخضر فقط ..متعة كرة القدم ايضا في فترة التسجيلات.

· سباق وتنافس ومفاوضات وأخبار …وتحديات.

· عشان كدا ما تختصروا الموضوع في المستطيل الاخضر فقط.

· في تنافس اداري وتنافس اعلامي وتنافس جماهيري يحدث بين الاندية في هذا المضمار خاصة الكبار منها.

· اقول ليكم حاجة تأكد كلامي الفوق دا.

· في كم لاعب رفضه الهلال ومشى المريخ وندمنا عليه.

· وفي كم لاعب رفضه المريخ وجاء للهلال وندموا عليه بعد ذلك ناس المريخ.

· يكفي ان هيثم مصطفى رفضه في البداية بسبب صغر سنه وحجمه ناس المريخ وجاء هيثم مصطفى وفعل العجب مع الهلال.

· لهذا لا تحكموا على لاعب ساكت …في عناصر في الساحة يجب ان تمنح الفرصة فقد تحقق النجاح.

· التجريب والبحث سنة كرة القدم فلا تحرموا الهلال من هذه الامور التى يتم عبرها تقوية الفريق.

· الهلال يحتاج الكثير …واذا كنا عاوزين نمشي لي قدام يجب ان لا نقف ..ويفترض ان نعمل بصورة دائمة ومستمرة على دعم الفريق خاصة اذا كانت هناك عناصر متاحة للهلال من المريخ.

· المفتاح تحت الطوبة.

· وقفلوا على كدا.

متاريس

· هسع الهلال اذا لم سجل لاعب واذا ذهب لاعب من اللاعبين الذين يرصدهم الهلال للمريخ الدنيا ح تقوم على لجنة تطبيع الهلال.

· تعرفوا احسن حاجة في سوداكال كانت شنو؟ كان بسجل عدد كبير من اللاعبين واعتقد ان المريخ يملك عناصر موهوبة ممتازة الآن.

· كرشوم رفضوه ناس الهلال..وندموا عليه بعد ذلك.

· ناس الهلال بنظروا.

· بقولوا ليك : دا كبير ..ودا ما ما عندو حاجة …ودا قفل تلفونو… ودا قصير.

· الهلال الشايفو دا عاوز ليه على الاقل 7 عناصر جديدة.

· الشيخ يجب ان يعود.

· كل مرة يجددوا في اعارتو.

· موهبة مثل موهبة الشيخ يجب ان تكون في الهلال.

· أي يوم للشيخ بعيد عن الهلال خسارة على الهلال.

· لمن التش كان في الخرطوم الوطني كانوا في ناس بقولوا الهلال يعمل بيه شنو؟ بنيتو ضعيفة وبيلولو الكورة عندنا بشه الصغير احسن منو.

· سيف تيري قالوا ما عاوزنو، وهسع عاوزين يدفعوا فيه دم قلبهم.

· ….

· ترس اخير : ان شاءالله يا ناس الهلال تكونوا لقيتوا (المفتاح)