(وداد ام جضوم الليلة ما بتنوم) السيستم فتح!!

صابنها

محمد عبد الماجد

(وداد ام جضوم الليلة ما بتنوم) السيستم فتح!!

· عبقرية الثورة السودانية المجيدة كانت في (شعاراتها) ، أما عبقرية العبقرية ذاتها فهي في ان ثورة ديسمبر المجيدة طبقت هذه (الشعارات) على ارض الواقع.

· ما جابوا ليهم حاجة من برة.

· لم تكن اهازيج الثورة مجرد شعارات ترفع والسلام مثلما كان يحدث في العهد البائد عندما كان نظام الانقاذ يرفع شعارات الاسلام ويعمل ضدها.

· الشباب الذين كانوا يحرسون (المتاريس) ويدعون الناس اليها ، ماتوا فيها وهم يضعون (اجسادهم) على الطريق مع (الحجارة) ليمنعوا تقدم ميليشيات النظام وتاتشراته لحماية المتظاهرين والمعتصمين.

· ماتوا دهسا بعربات النظام البائد فقد استشهد حنفي عبدالشكور وهو يضع جسمه (ترسا) امام تاتشرات قوات النظام.

· قتلوه (دهسا) بإطارات السيارة.

· واستشهد الطفل محمد عيسي كوكو وهو يحمي (الحجارة) من الزوال حتى لا يكون الطريق ممهدا الى الدخول الى ميدان الاعتصام.

· واستشهد الطالب محجوب التاج محجوب لأنه كان يحمي عرض زميلاته في جامعة الرازي.

· هذه نماذج تؤكد ان شعارات الثورة المجيدة كانت تنفذ على ارض الواقع من قبل شباب في مقتبل العمر.

· الثورة قدمت شعارات عرفت ان تحمس الناس وان تخرجهم الى الشارع وان تبقيهم في ميادين الاعتصام.

· ثورة جاءت بفضائلها واتت بمكارم الاخلاق (عندك خت ما عندك شيل) ، كان فيها ذلك الادب الذي افتقدناه كثيرا (ارفع ايدك فوق والتفتيش بالذوق)…والتفتيش دائما يكون بغلظة ويفتقد للذوق.

· من بين شعارات الثورة التى كانت طريفة وخفيفة هتاف (وداد ام جضوم الليلة ما بتنوم) وقد تحقق للثورة ذلك عندما كان اهل النظام يظنون ان سقوط نظامهم من المستحيلات.

· لا اريد ان اخوض كثيرا في هذا الجانب – عشان عاوز ادخل في الموضوع طوالي.

· ناس الهلال (الشفوت) أخروا دخول علي عبدالله ابوعشرين الى معسكر المنتخب الوطني.

· كدا قصد.

· نحن تاني بندقس.

· والله بقيتوا (شفوت) يا الطاهر يونس.

· بقيتوا مفتحين.

· ناس المريخ اذا كان اللاعب من الميدان بيخطفوه بواسطة (قوة امنية) عينك عينك كدا – تاني نحن نثق فيكم.

· زورتوا (البصمة).

· وعملتوا ليكم عقود (وهمية) … نصدقكم كيف؟

· احسن حاجة اتعملت ان الهلال ابقى على حارسه ابوعشرين بعيدا من (القوات الامنية) حتى يتم ادراج اسمه في كشف الهلال بصورة رسمية.

· ابوعشرين كان ممكن يخطفوه ناس الدعم السريع من معسكر المنتخب الوطني.

· وممكن يجبروه على التوقيع.

· والله أي حاجة بتحصل.

· الجماعة ديل ما مضمونين – ممكن يطلعوا ليه (امر قبض) بمنتهي الباسطة.

· أي حاجة ممكن تحصل.

· ما في حاجة بعيدة منهم.

· امسكوا ولدكم عليكم.

· انتظروا (السيستم) يفتح زي ما عملتوا.

· ووداد ام جضوم الليلة ما بتنوم.

· السيستم فتح.

· بعد ما شفنا احد افراد القوات النظامية وهو (ينطط) في مقصورة استاد الخرطوم بعد هدف السماني الصاوي وهو بزي الرسمي ما بنثق في زول.

· ألعب في المضمون.

· خليك (شفت).

· وانتظر (السيستم).

· الجماعة ديل اتعاملوا معاهم بنفس الطريقة.

· السماني الصاوي بواسطة احمد هارون خطفوه من معسكر هلال الابيض الساعة 2 صباحا وهلال الابيض عندو مباراة في نفس اليوم مع المريخ في كاس السودان.

· نوع ديل ممكن تثق فيهم.

· المضحك ان ادم سوداكال الذي لم يعترفوا به في المريخ حتى بعد قرار المحكمة الادارية والمفوضية طلع ليه بيان وهدد بسحب لاعبي المريخ من معسكر المنتخب.

· سوداكال (الصور) الكتيرة عملت ليه (لخبطة) في الطوحال.

· الناس ديل بقوا يتكلموا برة رأسهم بعد ضربة ابوعشرين.

· أي حارس لقوه قدمهم جبوه المريخ عشان يسجلوه.

· جابوا محمد عبدالعظيم حارس هلال الابيض.

· ديل جمعة جينارو لقوه قدامهم جابوه ..وقالوا عاوزين يسجلوه في المريخ.

· لو عملتوا ليكم شركة حراسة زي شركة (الهدف) ما بحلكم.

· ابوعشرين ولدنا وعندنا.

· منتظرين بيه الخمسين.

· أي حاجة خمسين.

· الدو.

· التريس.

· اربعة الشيرية.

· اربعة الهارتي.

· أي خمسة.

· سبعة الاسود.

· أي كرت خمسين.

· السيستم فتح.

· انتوا ما قلتوا نحن بتاعين الفيفا – الجرسة ليكم شنو؟

· مالكم بقيتوا ما بترضوا يجيبوا ليكم سيرة (السيستم).

· أي حاجة نحن عندنا بالقانون.

· بالسيستم.

· باللائحة.

· بي نظام.

· نحن ما عندنا أي حاجة.

· مرة نحن كنا قاعدين لينا في فراش – جانا شافع جاري متل (المفتاح الانجليزي) الفاكوني من السطوح.

· قلنا ليه يا جنا مالك ؟ في شنو قاطع نفسك كدا.

· الشافع قال لينا (السيستم) فتح.

· يا زول الناس الفي الفراش سمعوا بالكلام دا – كلهم قاموا جاريين.

· نحن ذاتو جرينا معاهم.

· في شنو ما عارفين؟

· الشيء الغريب وقت فكينا صاح – لقينا (المرحوم) جاري قدامنا.

· ما عرفنا نعمل شنو؟

· السيستم دا يوم يفتح في فضائح بتظهر.

· زي يوم النتائج.

· في الحلة في نسوان نتخصصة بس في السؤال في اليوم داك عن النتيجة.

· أي ولد يلقوه ليك في الشارع يقولوا ليه : جيت الكم؟

· مرات السؤال بكون محرج.

· ما بتحب زول يعرفك جيت الكم.

· الاسئلة الزي دي ما حلوة.

· الليلة السيستم بفتح.

· ووداد ام جضوم الليلة ما بتنوم.

· والله وداد عيشتها تطير …دخلها شنو بالسيستم؟

· وداد ذنبها شنو؟

· الفيها مكفيها.

· مرة تانية – غير المرة التى حدثتكم عنها.

· مرة مشينا المستشفى…شايلين لينا زول بين الحياة والموت.

· مشينا بيه على الدكتور طوالي.

· الدكتور قال لينا في شنو؟

· قلنا ليه يا دكتور الزول لا بياكل ولا بيشرب ولا بتكلم ولا بحرك كراعي.

· الدكتور عاين ليه سمح وقال لينا الزول دا (بوتسب).

· قلنا ليه هو العمل فيه كدا شنو غير (الوتساب).

· الدكتور قال لينا وقت (بوتسب) ما عندو عوجة …شربوه (موية ملح) كتيرة.

· زولكم العيان رفع رأسو من النقالة وقال للدكتور موية الملح ما بتنفعني ..قول ليهم بس يغيروا لي (بطارية) الموبايل …ورجع دخل تاني في (غيبوبة).

· هسع الكلام دا خلوا شنو بالسيستم؟

· كيف دخلوا شنو بالسيستم.

· الكلام البقول ليكم فيه دا هو (السيستم) ذاتو.

· يا ناس الهلال قبل ما تدخلوا ابوعشرين في السيستم عاوز اقول ليكم حاجة.

· امشوا افحصوا لي ابوعشرين.

· اعملوا ليه فحص الكورونا.

· عشان ح يسافر مع الهلال كتير.

· ناس المريخ 3 سنوات بطلعوا من التمهيدي.

· وبعد فحص الكرونا افحصوا لي ابوعشرين الدم.

· لو دمو طلع (احمر) السيستم ما بقبلوا ليكم.

· رجعوه طوالي لاهلو.

· قالوا ليك ناس الهلال لمن ادخلوا بيانات ابوعشرين في (السيستم)…السيتسم قال ليهم الزول دا بيلعب شنو؟

· قالوا ليه حارس مرمى.

· السيستم لمن عاوز يتشق من (الضحك).

· السيستم قال لي ناس الهلال حرام عليكم …انتوا كل مرة تضربوا المريخ في حارس المرمى.

· مرة جمال سالم.

· ومرة ابوعشرين.

· عليكم الله يا ناس الهلال جمال سالم ما تفكوه.

· عشان الحارس الاول يكون من المريخ.

· والحارس التاني من المريخ.

· والمريخ يلعب بالحارس الثالث.

· غايتو يا ناس المريخ عاوز اوصيكم …امسكوا في محمد عبدالعظيم كويس.

· الزول دا لو طلع ممتاز بنجيبو الهلال.

· نشوفوا اول حاجة ونحكم عليه.

· …………..

متاريس

· الهلال جاب ليه (اطراف)…الطيارة في شماها بجهجهوها ليك.

· استفين زوي باليمين.

· وادم مهدي الدالي بالشمال.

· وهناك فارس وسمؤال.

· والله تاني إلّا تشوفوا ليكم بلد.

· اول مرة اشوف لي طرف شمال بسجل من برة بتلك الطريقة التى يسجل بها الدالي.

· الدالي ممكن يكون هداف الدوري مع الهلال.

· اكبر المكاسب التى يتكلم عنها كل من شاهدوهم تتمثل في مدافع هلال بورتسودان ارنق ومهاجم ودي نوباوي منير.

· منير دا قالوا حكاية.

· وارنق اسكتوا خلوه ساي.

· تسجيلات مية المية.

· ولسه في الانتظار.

· بنرجع نكتب عن صلاح ادريس.

· السيستم قالوا ليك قعد يضحك براه.

· من غير مناسبة.

· السيستم شرطو الضحك.

· هلال الابيض مع انه فقد عدد كبير من لاعبيه إلّا انه اضاف عناصر موهوبة وصغيرة في السن.

· الجقر الذي كسبه هلال الابيض ممكن يكون نجم التسجيلات في العام القادم.

· وابراهيم كولينا لاعب (خرافي).

· وماهر عباس مهاجم ما فيه كلمة.

· بالتوفيق لهلال التبلدي ان شاءالله.

· ووداد ام جضوم الليلة ما بتنوم.

· هي وداد براها.

· برقو اصدر تصريح سكت فيه المريخاب.

· قال ليهم في لاعبين عندهم اذن.

· تاني في شنو؟

· لو ابوعشرين انضم للمعسكر قبل السيستم ما يفتح كان ممكن يحصل ضرب ويحصل دم.

· وكان ممكن نشوف قوات امنية تانية في المعسكر.

· لذلك الاسلم كان عدم انضمامه للمعسكر قبل اكمال قيده في الهلال.

· بالتوفيق لعلي ابوعشرين.

· ولسه عندنا (سيستم) تاني.

· …..

· ترس اخير : انتوا السيستم دا فيه (عقارب)!!..طيب مالو بلدغ كدا؟