يا العجب بعد تفسخ إتمسح لأنو الشتاء جا !!
بالعربي الكسيح
محمد الطيب الأمين
يا العجب بعد تفسخ إتمسح لأنو الشتاء جا !!
* كثير من الناس عندما يشتري أحدهم (عربة) أو (منزل) أو (ركشة) بيضبح خروف (كرامة) .
* وبعد (يضبح) بشيل (حبة دم) بسمحو في (العربة) أو (المنزل) .
* والكلام ده من ناحية (دين) حوله كلام كثير .
* يُقال أن (مسح دم الكرامة في العربة) لا يجوز والله أعلم.
* ما في مشكلة .. تعمل (كرامة) من باب شكر الله لكن ما في داعي لحكاية الدم دي .
* وطبعا أنتو عارفين (لون الدم أحمر) .
* ولا ما عارفين ؟
* أنت يا الدم لونك أحمر.
* والله يا جماعة أمبارح واقف لي في (صف رغيف) ساعتين وربع وزهجت جداً لكن لما أتذكرت (تغريدة) أبو عشرين (أنت يا الدم لونك أحمر) والله من الضحك الجماعة المعاي في الصف قالوا الزول ده مجنون.
* ولمن فاتهم موضوع (التغريدة) إليكم التفاصيل : (الأخ غير الشقيق أبو عشرين مشى وقع عقد مع الهلال قبل مباراة القمة بعشرة أيام واستلم قروشو كاش ومشى إشترى ليهو عربية جديدة وجا راجع البيت شغل المُكيف ورقد في السرير ودخل الفيسبوك) .
* في الفيسبوك كتب : (أنت يا الدم لونك أحمر) .
* الجماعة التمهيداب شالوا كلام أبو عشرين ده وبقوا حايمين بيهو من قروب لقروب زي (رسائل يوم الجمعة بتاعت الواتساب ديك) .
* مالكم ؟
* قالوا : زول بيقول أنت يا الدم لونك أحمر معناها بيحب المريخ شديد .
* هاك الحب ده .
* وأكثر حاجة (أثرتني) في الموضوع ده إنو (التش) دخل لأبو عشرين وكتب تعليق : (وهو في لون غيرو) .
* الله يسألك يوم الموقف العظيم حصل لقيت ليك (دم لونو بنفسجي) ؟
* حصل شفت ليك (دم كارلوهات) ؟
* قوم على حيلك .
* أنت لو ما تمهيدابي ساكت (وداقي ليك سستم) زول كتب لون الدم أحمر البخليك تفرح شنو ؟
* البفرحك شنو ؟
* المهم .
* إتصل علي واحد وقال لي رمضان عجب طلب يفسخ .
* قلت ليهو : يفسخ وشُو؟
* قال لي : لا يفسخ عقدو مع الهلال .
* قلت ليهو : مالو ؟
* قال لي : كيف مالو.
* قلت ليهو : لا بالجد هو مالو ؟
* قال لي : تقصد مالو داير يفسخ ، قلت ليهو : لا أنا بفكر هو مالو ؟
* يفسخ قلت لي .
* وهو الفسخ ده ساااي كده.
* ياخ الفنانة (محاسن لقيمات) عشان تفسخ وشها قعدت ستة شهور و١٢ يوم .
* بعد الستة شهور دي حتى ياداب بقت (سمراء) .
* قال يفسخ قال.
* أنت يا كافي البلا لا بتعرف كورة ولا بتعرف قانون ؟
* أسباب الفسخ شنو ؟
* تفسخ ليه ؟ هل الهلال رفض يديك مرتب شهرين ؟
* هل الهلال رفض يلعبك في المباريات؟
* لو الإجابة (لا) أحسن تقوم وتشوف شغلتك .
* قوم على حيلك .
* نحن سعداء لأن الأخ رمضان عجب (إنتهى من كرامة المريخ) وقبض (٣٠) مليار.
* ٣٠ مليار يا التش اسمع كويس .
* رمضان عجب مرمط كرامة المريخ وعرض نفسو للهلال وساوم وجا تاني وقبض ٣٠ مليار من (الإصيفر) ، وبعد ده يا تجي الهلال ويا تقيف.
* الفسخ العملتو ده تشوف ليك تمهيداب تونسهم بيهو .
* هو بين بينكم زول فرحتو (تغريدة) أبو عشرين اكيد بفرح بفسخ العجب.
* العجب ومحمد الرشيد .. ٦٣ مليار من المريخ.
* بعد ده تفسخ ولا تتمسح دي حاجة بتخصك.
* والله يا جماعة نحن في الهلال قلوبنا بقت قاسية .
* أتخيل رمضان عجب سعرو ٦ مليار نقوم نخلي المريخ يدفع ليهو ٣٠ مليار ، ومحمد الرشيد سعرو ٥ مليار نقوم نخلي المريخ يدفع ليهو ٣٣ مليار .
* قسوة ولا ما قسوة ؟
* وبعد ده يا ريتو لو بيلعب.
* بالقانون يا مولانا .
* ديل كانوا لعيبتك ورمضان ده الكابتن بتاعك وبعد ده بنشف ريقك وبنوقفو ليك .
* بعد ال ٦٣ مليار دي برضو بنشف ريقك .
* حقنا ما بنخلي .. مش لو رسلتوا لينا برقو ؟ لو رسلتوا لينا سمية الخشاب حقنا ما بنخلي .
* بمناسبة سمية الخشاب .
* هل تصدق إنو عصام الحضري قبل كده قال :(جمال الوالي ما كان بيحلم يسلم على في يدي) ؟
* هل تصدق بعد قال كلامو ده جماهير المريخ حملته على الأعناق!!!؟؟؟
* أنا دايرك تعرف إنو موضوع (عدم الكرامة) ده ما جديد .
* الشي ده وراثة .
* وغايتو الله يكفينا شر (المُصدي) اللمعتو الأيام.
* و..و..
هذا زمانك يا مهازل فامرحي
والله انت صحفي بتاع شمارات ياخي اكتب مواضيع مفيدة او اترك الكتابة دشنة كلام لو جاكم العجب ومحمد رشيد وابو 20برضوا المريخ يهزمكم حتي لو كان عندكم الفريق القومي كامل روح نوم وتفرش صفرك ولا نديكم سيما الشطب القطيع
لو لا الهلال رمضا عجب ومحمد الرشيد ما كانو بحلمو بى مبلغ ذى ده ناس المريخ لمو القروش القدامهم والوراهم وادوها ليهم . باقى اللاعبين العندو باقى تسجيل ولا مرتبات قول ليهو انسى . المدرب طفش قال مرتبات بح وحوافز المباريات تخجل . قال فسخ العقد هههههه تفسخ تجلخ ما بحلك لانو دخول السوباط ما ذى خروجو اقصد دخول الحمام ما ذى خروجو . انتو والمريخ دخلتو فى مشكله كبييييره وشكلهم اداره المريخ ما عارفين معنى فسخ العقد نتيجتو شنو . اتحاد اللقيمات ذمنو فاات والاجاويد ذمنهم فاات هسه مع السوباط مش حتقدر تغمض عينيك. .. قال ده مالو
عدم الموضوع مصيبة
المسمار بتاع سيما حأاااأااااار خلاك تكتب كلامكريم وما عارف
هيييي دا مالو؟ العربي الفسيخ ابوبرنيطة مثل قلنسوة عجوز الافغان دي لو رفعوها يلقوا ورم نتيجة الرعب الأبدي من حاجة اسمها المريخ ..أما حكاية الثراء الفاحش دي عارفنها تمام وصابون الدولار ما ينظف درن الوحل والطين المترسب على ضفاف النهر مهما عملتو برضو كيزان وكلكم مشاركين في المرابحات والمضاربات ومستندات الصفقات تنتظر لجنة وجدي وجدي…المهم دا ما اختصاصنا نحن ناس رياضة والخبيث الذي قام باغراء لعيبة المريخ في معسكر المنتخب عرفناه وجماهير المريخ تعرف كيف تاخد حقها منه ومن اب شعيرات منكوشة الذي يعذبنا كل يوم وييالغ في التنكيل بالمريخاب… افضل للعربي المسيخ يلملم باقي كلامه الركبك ويشوف ليهو ركشة.. وحياة ابتسامتك كل يوم شايف سواق ركشة ومشغل اغنية زيدان: ليه رشيدي ما جيتا دعموك ولا قسيت… رمضان يا خير الشهور …وداعا شهر الخير يا رمضان … نفسي تشاهد الدوري في بوعريريج وتستمتع بالغربال بعد تشبع وصقل موهبته في المريخ…
اتسأل بالله انت صحفي ولا لغتك دي لغة صحفي سبحاااان الله
ولايهمك ياود الطيب. جننت الدلاقين بعمودك الحارق لذلك ردموك ولسه حيردموك واظن ابو المستعار في الطريق. خطيييير ياود الطيب. قلت ليك اعمدتك دي زي نار القصب😥🤣🤣😅