يااااااا للنحس..

افياء

أيمن كبوش

يااااااا للنحس..

# صحيح أن عرفنا السوداني.. يقول ان “السترة والفضيحة متباريات”.. زي ما عرفنا الكروي كذلك بقول “النصر والهزيمة جد واردات”.. لذلك لن نحزن على خسارة الهلال أمس أمام الخرطوم الوطني.. وهي الهزيمة التي حدثت لأول مرة طوال تاريخ المنافسة، لن نحزن لأن الخرطوم كان يستحق الانتصار.. بقدرما كان الهلال هو الخسارة كلها.. لا أداء ولا حضور ولا حتى غيرة على الشعار الذي كان لوحده، في زمن مضى، مبرر كاف لهزيمة الخصوم.
# يااااا اخي الشغيل.. انت مستواك المتواضع ده اصلا كان بلعبك اساسي في الهلال لما الفريق كان “يتلتل” وفيهو عضم من الخبرات والمهارات.. إلا كان صدقت قصة “الشغيل جمل الشيل” دي، هنا الحكاية بتجوط عليك اكتر ويكون الهلال لا مشيول ولا حاجة.. بل يمكن نقول بكل صراحة “مشلول” عديل.. الفيك كملت.. وكلامك داخل الملعب كتر.. نعلم أن مشاركتك اصلا واحد من أسبابا انو الكنبة فاضية في المركز الحساس ده، لكن ننصحك تعتذر من المشاركة لما الفريق يكون مسجم ومرمد لانو مافي زول في اللعيبة الموجودين ديل بيقدر يشيلك.
# ويااااا اخانا أطهر الطاهر آن لك ان تستريح وتسترخي وتأخذ نفس عميق عشان تتخلص من نفختك الكدابة دي.. اجلس مع نفسو وحدثا بانك مجرد لاعب محلي لا يملك الحد الأدنى من مؤهلات الاحتراف الخارجي، الا اذا كانت الأندية الخارجية البنسمع انها متابعاك دي عندها حول أو عندها ضعف نظر وفلوس محرقاها ساكت، لانو سموحة ولا غيرو لو شاف مستوياتك البتقدما منذ استئناف النشاط بعد كورونا، ده بخليها تشك في مفهومية نادي الهلال الممكن يشرك لاعب بهذا المستوى المتدهور كأساسي في كل المباريات.. ارحمونا ياخ.
# اها نقول شنو كمان للشفع البلعبو الان في الهلال.. ناس عبد الرؤوف وبشة الصغير.. ما عارف كيف زول في أواخر العشرينات يسموهو الصغير.. أظنو زي سعد الصغير ونجاة الصغيرة.. ما بكبرو ابدا.. الشفع ديل انا شايف ليهم حق.. وهم معذورون.. لانو عايزين زول يعينهم ويشيلهم ويمسكهم الدرب.. لكن نعمل شنو لو كابتنهم الشغيل ونايبو أطهر الطاهر..
# على سيرة الطاهر.. ودي سيرة طبعا جات براااااها ناطة… عليك الله يا الطاهر يونس اخوي تاني ما تجي الكورة.. ما ممكن مع ظهورك في الاستاد الخرطوم يجيب في الهلال قوون.. القوون الما بزيد داك ولا بدرن حتى.. والطلب ده بقدمو ليك عشان مصلحة الهلال والله.. خليك مركز مع السوباط.. ومع مديونية المجلس السابق.. والملفات العالقة وحقوق الهلال.. بس فريق الكورة ده نهى يا الطاهر.. اليوم الظهرت في الاستاد، ظهرت الخيبات وشربنا ما روينا.. خليك في التخطيط والدراسات.. لكن شغل الكورة ده ابعد منو.. اهو اليوم الجيتنا شفنا فيك ملامح الهزيمة والأداء الخائب.
# ماذا نقول لطرف الهلال الأيسر فارس عبد الله الذي أطلقت عليه جماهير اهلي شندي لقب “حدباي” دلالة على البص السريع “حدب وأدب” لكن حدباي بتاع الهلال طبعا معذور لا قادر يجري لا قادر يعكس لا قادر يدافع لانو البلد ما فيها جاز.. والحال واقف.
# عليك الله يا وليد الشعلة انت جادي في موضوع العروض الاحترافية ده ولا بس لقيت لجنة التطبيع دي جديدة قلت تسوقا وتسوقنا بالخلاء.. الدوري الجزائري ده انت قايلو لعب ولا زي كورتنا الما عارفين ليها رأس ولا قعر.. اهجس واجلس مع نفسك وراجع مستواك.. كورتك دي ما بتلعبك في اتحاد المحس واتحاد مدني، خليهو اتحاد العاصمة الجزائري.
# اما انت يا سمؤال ما معاتب ابدا.. ما معروف خانتك الأصلية شنو.. يختوك شمال ويختوك وسط دفاع ومرة يمين.. اكيد امورك جايطة.. والنقر يجوطا ليك زيادة وكندورة يديك احساس بالإحباط.. والدمازين ده ما عندو اي حل الا يرجع الروصيرص.. الخرطوم دي ما نفعت معاهو.. ومحمد موسى الضي شكلو بقى يكتر في العضة عشان كده كتر وزنو وقلل مستواهو..
# من الاخر يا اخوانا لعبكم ده ما بشيل الهلال الدوري.. ولا حتى بيشبه فريق متصدر الدوري من بداية المنافسة وليهو حق نائب الرئيس ورئيس القطاع الرياضي الطاهر يونس يهرب قبل نهاية الشوط الأول.. اكيد شافنا قاعدين قال لي نفسو الجماعة ديل بقولو انا “كج”.. كج بالكاف..
# صراحة السمبك حار. واعذرونا لو طلعنا من طورنا.. وشعورنا.. ومبروك للخرطوم.