بالعربي الكسيح
محمد الطيب الأمين
(يلد) المحن ويرفض أن (يلولي) صغارن !!
* عندما يركب ثلاثة أطفال على ظهر حمار في إحدي ضواحي مدينة الجنينة حاضرة ولاية غرب دافور ..
* عندما يركب هؤلاء الصغار على ظهر الحمار وتكون سيرة الكاردينال حديثهم فهذا يعني أن ما قدمه الهلال للكاردينال لا يقدر بثمن ..
* الكاردينال قبل الهلال كان معروفاً داخل نطاق (رجال الأعمال) ..
* شهرتو كانت في نطاق ناس صلاح أدريس وود الجبل والنفيدي وكده ..
* ما أكتر من الإطار ده ..
* وجا الهلال وأصبح معروفاً في الضواحي وطرف المدائن ، بل تُفتح له حتى الأبواب المغلقة ويقابل بفضل الهلال الوزراء والسفراء وحتى رئيس الجمهورية ..
* نترك كل شئ قدمه الهلال للكاردينال ونكتفي فقط بـ(الشهرة) ..
* شهرة الكاردينال بفضل الهلال بلغت مرحلة أن (يتونس) باسمه أطفال في ضواحي بعيدة لم تألف عيونهم (نور الكهرباء) ..
* يبقي .. الهلال صنع إسم الكاردينال ..
* ولولاء الهلال لظل الكاردينال إسماً محبوساً في إطار شلته من ميسوري الحال والأحوال …(نسأل الله أن يزيدهم) ..
* أقول هذا لأن بعض الذين يدافعون عن الكاردينال (في كل الأحوال) دائما يرددون مقولة : (الكاردينال دفع وانت لو هلالابي تعال أدفع زيو) ..
* دي مقولة يجب أن لا (تسكت) الحق ..
* الكاردينال دفع ما في زول بينكر الحاجة دي ..
* دفع بسخاء وشيد جوهرة تسر الناظرين وتشبه الهلال العظيم ..
* وقدم للإعلام السوداني (قناة) أعتقد إنها إضافة كبيرة للإعلام (لو بس تم حجب صورته من أعلى الشاشة) ..
* دفع وما قصر ..
* ودفع في زمن صعب ..
* دفع في زمن تعاني فيه البلد إقتصادياً ..
* ولكن هل عشان دفع معناها نسكت أو نجي ندفع زي ما هو دفع ؟؟
* لا طبعا ..
* هو دفع كده لانو إستفاد ولأنو مستفيد على الأقل ناس (سنار ، الفاشر ، الرهد ، الضعين ، الدمازين ، سنجة ، تلس ، خشم القربة ، شلعوها الخوالدة ، الفولة ، المناقل ، كنانة ، النهود) .. على الأقل الناس ديل بقوا يعرفوهو ..
* دفع ما قلنا حاجة لكن من حق أى هلالابي أن يقول رأيه دون أن يراعي لحكاية دفع ولا ما دفع ..
* ما في هلالابي بتكسر عينو قروش ..
* كافالي جابو الكاردينال وأقالو الكاردينال ويدفع قروشو الكاردينال دون أن يتضرر الهلال لأنو هو رئيس الهلال ولأنو الأندية في السودان تدار من جيبوب الروؤساء ..
* ده وضعنا كده ..
* من قمنا الرئيس بدفع من جيبو ..
* الكاردينال يحمدالله جا لقى في دكاكين ..
* ده الوضع في الأندية تدفع من جيبك .. مليار ، خمسين مليون ، عشرة قروش .. المهم ده الوضع المتعارف عليهو من قمنا ..
* انت رئيس تدفع ..
* ما عندك تمشي ويجي رئيس تاني ما عندو يمشي وهكذا ..
* دي الكورة السودانية كده ..
* عشان يا جماعة الناس البيحاولوا يسكتكم ويقولوا ليكم (الكاردينال دفع إنتو لو رجال تعالوا أدفع) ..
* ده كلام ميت ..
* الكاردينال خسر الأقطاب ونفر الناس وعليه أن يتحمل ..
* وأنا والله العظيم على الصعيد الشخصي زعلان جدا لرجل شيد جوهرة ووجد من محبة الناس ما وجد ورغم ذلك يفشل بدرجة مثيرة فيما يتعلق بفريق الكرة (شطب ، تسجيل ، تعاقد ، فهم وإقالة) ..
* والله زعلان ..
* زعلان لأنني أرى أن رئيس بهذا الوضع المالي يفترض أن يكون (مرتاح في الهلال والهلال مرتاح معاهو) ..
* لكن للأسف (يلد) الكاردينال في (المحن) يوميا ويرفض أن (يلولي صغارن) ..
* الذي يلد المحن لابد أن يلولي صغارن ، وقضية كافالي والست نقاط ما هي إلا (محنة) ولها أخوات من المحن ربما بنفس الملامح وربما لأ ..
* البقت بقت ومجلس الهلال يتحمل البقت ..
* والآن يجب أن يستلم هذا الكافالي قروشه حتى لا يهبط بنا للدرجة الأدني ..
* كما يجب التوصل لإتفاق ومخالصات مع كل الجيش الجرار الذي تمت إقالته وشطبه قبل أن نتفاجأ بكارثة جديدة ..
* شكاوى الأجانب للإتحاد الدولى ما فيها هظار ولا فيها عنتريات ..
* الفيفا هي ليس (معارضة هلالية) ولذلك يجب التعامل معها بالجدية الكاملة ..
* المهم ..
* بالأمس أضاف نجوم الهلال ثلاثة نقاط في بنك الهلال (المنهوب) ..
* بنك الهلال (منهوب) من قبل كافالي بمساعدة مباشرة من المجلس الهلالي ..
* فوز الهلال على حي العرب مهم لان الهلال يجب أن يقاتل ويحقق الإنتصار في جيمع المباريات القادمة ..
* في إستاد الخرطوم واصل (مُنبرش شندي) إنكساره أمام المريخ وخسر كالعادة ..
* الأهلي شندي كلما واجه المريخ تجده ينحني بينما يستأسد أمام الهلال ..
* لا أعرف فرح صلاح أدريس لفوز الهلال أمام العرب أم فرح لخسارة الأهلى أمام المريخ ؟؟
* (مُنبرش شندي) يخسر أمام (مدفور ام درمان) وضربة الجزاء حاضرة ..
* (مُنبرش ولاقي مدفور) ..
* فوز المدفور على المُنبرش لا يحتاج لمساعدة من حكم كما أنه لا يحتاج لضربة جزاء ودعم بواسطة الصفارة ..
* ديل منبرشين بدون تحكيم ..
* والله صحي ..
* وغايتو جنس غايتو ..
* ونركب صافنات ونجيبة (بورتسودانية) وأصلو الزول بيموت والذكرى تفضل حية ..
* و..و..
* والله في ..
