يوم الهلال

سوبر هاتريك
طارق محمد عبد الله
يوم الهلال…!!!

& في كل الَمعارك الضارية والمحكات الصعبة فان هلال الشموخ والعز والكبرياء كان كبيرا كان اميرا وعلي قدر الرهان ودائما وابدا مايحقق المراد ويسعد البلاد والعباد.. ولاجل كل المذكور اعلاه وكثير غيره نثق تماما بان هلال الجمال والجمال الهلال علي قدر الطموح والامال ويكمل المهمة ويسعد الامة وشخصيا لم اجد ابلغ من القصيدة ادناه تعبيرا عن واقع الحال اليوم.
& فما اروعك شاعرنا الجميل حميد وما اروع قصيدتك…
سلام الهلال السوداني
محمد الحسن سالم حميد
——————————
الليلة دا يوم السودان
البلد الليلة هلالابى
النيل الأزرق نشوان
والأبيض أبيض ياأحبابى
يامشرّف كل الأتيام
فى يوم السعد الافريقى
؛ يا مفرّح كبد الأيتام
باللعب البعد الموسيقى
يا هلال فى جبيرة سودانك
فى جبين الشعب الحبّوب
أبشر لاباشر وأقوانك
ياعريس السمر المحبوب
؛ تعجبنى الرمية الزنجية
لى رأس الحربة النوبية
بى خفة لمسة بجاوية
؛ تتسامى الهامة العربية
وتتناول نسمة صعيديّة
تسكن بى كلّ أريحيّة
؛ ما بين الخصل البنيّة
وزغريدة تبق سودانية
؛ لى أروع دخلة على النية
لى أروع دخلة هلالية
البحر الليلة هلالابى
؛ المطر..
الحجر..
الترّابى
؛ الشدر الشايل متكابى
الساقى عروقو الحطّابى
الشوقو عنقريب هبّابى
؛ الشاقّى مروقو هلالابى
الوسّار ذوقو هلالابى
القمر البيتو قصاد بابى
؛ حبيتو لانو هلالابى
وين تمشى الراضى على المابى
؛ بالشمش الفوقو هلالابى
يا ليم يا الكورة وكت تبقى
أخلاق موروثة مع الخلقة
؛ الغالب حاضنو المغلوب بمودة
وحنية ورقة
؛ وجمهور بيشجع مصحوب
بالنغم الطيب والصفقة
الله ياشعب ياحبوب
ما أحلى الدخلة على المرقة
يا فريق بيطلع كم فرقة
يامارق بينا من الزنقة
وحدنا شبعنا من الفرقة
جددنا عشان نبقى وتبقى
ياريت الطالقة المنطلقة
وعلى بعض طلقة
ياريت يا أبونا يا ابو الحرقة
لو تقرا بياضك والزرقة….
اهداف سريعة.. اهداف سريعة
& من يراهن علي العكس ويخسر شباك الشباب التنزاني اليوم لا ولن تسلم.
& ولا اعتقد ان الرباعي مانو فارس زمانو، جارجو الحزن مفارقو، الغربال الجمال ومكابي الخطير يمكن ان يخرجوا خالين الوفاض.
& الشباب لازم ياخد المعلوم في مقبرة الخصوم ويورينا عرض اكتافو التنافسي كم…؟؟؟
& وكما جرت العادة نتوقع ان تكون كل القوة َمن عصرا بدري في المقبرة جوه.
& اصعب مافي المباراة الهدف الاول واذا قدر للازرق احرازه مبكرا فان الرباعية محمده رفاق كالالا والثار لفريق زعلان سيصبح واقع معاش.
& قلبي يحدثني بان جون مانو فارس زمانو سيصل لشباك الشباب حتي ولو شارك لخمسة دقائق فقط لاغير.
& فهل يصدق حدسي معك ايها الفتي الابنوسي الجميل…؟؟
& نتطلع لهلال قيافة فايت العرب والافارقة مسافة.
& علي فلوران وكتيبته باذن الكريم لا ولن يخيب الرهان.
& ازرق وابيض لون الفل هلال القمة حبيب الكل
& الليلة يوم الرجال اذن هو يوم الهلال وكفي.
& الليلة ياناس الشباب باذن الله نوريَكم الطفا النور َمنو…؟؟؟
& واخيرا احمد الله كثيرا انني حي ازرق.