َكلام المصريين مستفز لكن ما كلو غلط!!

قزاز ورذاذ
محمد الطيب الأمين
َكلام المصريين مستفز لكن ما كلو غلط!!

* كلمة المعلق عصام الشوالي التي قالها لحكم مباراة الأهلي المصري والمريخ لخصت كل الحكاية.
* الشوالي قال للحكم : (انهي المباراة خلاص حتى المريخ راضي بالثلاثة).
* ما ذكره الشوالي لا غبار عليه لأن خسارة المريخ بثلاثية أمام الأهلي تعتبر مكسب للمريخ.
* الشوالي قال المريخ راضي بالثلاثة والصحيح أن المريخ (فرحان بالثلاثة).
* صراحة لا أنكر أنني قد حزنت لحال القنوات المصرية وهي تتحدث عن المريخ بتلك الطريقة.
* لن أكون منافقا .. ما تعرض له المريخ قد أعجبني في بادي الأمر.
* ولكن صراحة المصريين كتروها .
* أكثر ما احزنني قول أحدهم أن لعيبة المريخ كانوا فرحانين بإستاد القاهرة.
* قال مبسوطين انهم في استاد القاهرة وأمام الاهلي.
* وانا ما بقول الراجل ده كلامو صاح لكن كمان يجب الإعتراف بأن المريخ فعلاً زمن طويل ما لعب في استادات مثل استاد القاهرة.
* جيل المريخ الموجود الآن كلو جيل (تمهيدي) .
* ما فيهو زول أتجاوز التمهيدي قبل كده عدا بكري المدينة وأمير كمال.
* أما الباقين كلهم ناس تمهيدي ساكت.
* ما وصلوا مرحلة يدخلوا فيها إستاد زي استاد القاهرة.
* أضف لهذا أن المريخ لا يتمرن ولا يلعب في إستاده لأكثر من موسمين .
* عشان كده فعلا لما شافوا نجيلة إستاد القاهرة اتخلعوا.
* وقعدوا يتغالطوا في النجيل (صناعي ولا طبيعي).
* صناعي ولا طبيعي.
* لا صناعي ولا طبيعي.. (قيصري).
* الكل يرى أن الحملة التي تعرض لها المريخ من القنوات المصرية تستجوب وقوفنا في خندق واحد.
* وذلك على إعتبار أن الموضوع يمس الوطن.
* وهذا كلام عقل معقول ولكن في النهاية ليس كل ما ذكره الإعلام المصري خطأ.
* في كلام صاح.
* قد تكون الطريقة مستفزة ولكن كلامهم في الإطار العام صحيح.
* المريخ كان خايف من الأهلي خوف ما حصل.
* كان برجف.
* رفض المريخ أن يخرج من ملعبه وظل يدافع حتى بعد الهدف الثالث.
* أضف لذلك لم يقدم المريخ ولو (لمحة ساكت) يؤكد بها أنه فريق كرة.
* كانوا بيجروا محل الكرة بس.
* عشان ما نكون منافقين يا جماعة .
* أنا عندي الوطن هو حلايب والمنتخب.
* معليش يعني.
* وبعدين بصراحة كده داير أشوف تأثير إعلام المريخ.
* داير أشوف دورهم في الرد على المصريين.
* إعلام المريخ السنة كلها ينتقد سوداكال وشداد ، يلا دايرين نشوف شطارتكم مع أبناء النيل.
* وين قناة المريخ؟
* وين (البحث عن هدف) بتاع ميرفت.
* ورونا حاجة.
* مش قلتوا (ديربي وادي النيل) و(الزعيم وفريق القرن)؟
* مش قلتو الوطن العربي يترقب قمة وادي النيل؟
* لو تعرض الهلال لما تعرض له المريخ على بالقسم نخلي ليك السيسي يتململ في كرسيهو.
* لكن معليش جات في المريخ.
* وافتكر المريخ عندو إعلام وعندو قناة يجب أن ترد على كل متطاول.
* أما نحن سندخر الحرب ضد المصريين إذا تطاولوا على منتخبنا.
* لو هبشوا المنتخب سنرد عليهم لأن المنتخب ما عندو إعلام.
* لكن المريخ باعلامو.
* يلا ورونا كيف بتردوا على الشفوت ديل؟
* عندما تعرض التش للإصابة كتبنا من القلب لنطيب خاطرو لكن الجماعة قالوا نحن منافقين.
* عشان كده في موضوع القنوات المصرية دي ما دايرين نكون منافقين.
* في الموضوع ده بالذات أنا ما داير أكون منافق.
* وأنا حر أفتكر.
* والرد على الإعلام المصري لا يأتي بالزعل والتعاطف والكواريك.
* داير ترد للإعلام المصري اتعلم الكورة واركز.
* ده الحل.
* ما عندك كورة اهو النتيجة ح تكون خسارة جوة الملعب وبره.
* بكرة ح تمشي تنزانيا برضو ح يضحكوا فيك.
* تمشي الكنغو برضو يضحكوا.
* القنوات المصرية انتقدتك في حدود ما ظهرت به في ٩٠ دقيقة.
* قالوا أنت ما بتعرف تلعب.
* لا جابوا سيرة الثورة السودانية ولا سخروا من الأهرامات البجراوية ولا تناولوا صفوف الرغيف.
* قالوا أنت ما بتعرف كورة.
* دايرنا نرد بالإنابة عنك نقول شنو يعني؟
* نحن عمرنا ده كلو بنلعب في المجموعات حصل شفت ليك قناة قالت الهلال مبهور باستاد القاهرة ولا بنجيلة تشاد؟
* انت البتجيب الاحترام لنفسك.
* تركز وتلعب كورة صاح ما في زول بسألك.
* تلعب كورة عشوائية يجب أن تتحمل الإنتقاد.
* انا قبل سنة لعبت مع الاهلي.
* لا سألني ولا سألتو.
* عادي والله.
* المهم.
* مواقف المريخ تجاه الأمور الوطنية غير مشرفة.
* لن أنسى المريخ وهو يفتح استاده للأهلي المصري حتى يتدرب استعدادا لمواجهة الهلال.
* وياريت لو وقفت على كده.
* جابوا ليهم أناناس وتفاح.
* لن أنسى بعض جماهير المريخ وهي تستقبل مازيمبي في المطار عندما حضر لمواجهة الهلال.
* لن ننسى كثير من قصص الخيانة التي مارسها أهل المريخ في زمن جمال الوالى وهم يدعمون خصوم الهلال.
* لما المصريين يهبشوا صقور الجديان ساعتها سنكتب دفاعا عن الوطن.
* أما الآن فهذه معركة يجب أن يتصدى لها إعلام المريخ الذي ما زال يلوك خماسية مازيمبي.
* ما تقول لي في البطولة المحلية نتناكف ولما نطلع بره نكون وحدة متماسكة.
* انت لما دعمت مازيمبي نحن كنا لاعبين معاهو في كأس السودان؟
* مش كانت بطولة أفريقية؟
* عموما .. كلام المصريين حار وشين ومستفز لكن لو ركزتو فيهو ما كلو غلط.
* ملحوظة .. أشكر كل الذين تفاعلوا وسجلوا اشتراكهم في قناتي على اليوتيوب (دقايق) وننتظر مزيد من الدعم.
* لمن يرغب عليه أن يدخل اليوتيوب ويكتب (قناة دقايق) ويسجل اشتراكه وسيكون واحداً من أسرة القناة ومؤكد أنني أتشرف به.
* و.. و..
* وهكذا يعني.