أسبوع طويل محتاج الصبر والدعوات والماعندو صبر يقفل النت والبيانات

1
655

تغريدة واتساب
بقلم : معاذ ابومؤيد
أسبوع طويل محتاج الصبر والدعوات
والماعندو صبر يقفل النت والبيانات

تبقي من الايام للتسجيلات ستة ايام
وتبقي من الايام لرحيلكم اثني عشر يوما
ومتبقى من معركة اللاعبين الافريقية ثلاثة ايام
ونحن منتظرين ونراقب المشهد
عشان فلم ذي دا عمروا ماشفناهو
الايام والاسبوع مع علمنا انه بسيط لكن سيمر علينا كالسنين!!!
غايتو عدم الاحساس دا الله لاعادانا بيهو !!
بس نحمد الله انو ربنا موجود وحق الشفوت ماحيموت ،،،،
جابت ليها هتاف بعد التمرين
الخوف تلحقوا مجلس اتحاد جده ناس عادل جمجموم!!!

••••••••••••••••••••••••••
المدرب ايميال ماعارف البيقوله ويسويه ويشتكى لطوب الارض من الظروف!!
قرب يتكلم عربي ،،
بس سؤالنا البترجم للمدرب اسه منو!!!
وصلنا مرحلة متاخرة من التدهور في كل النواحي!!
اسه حتعالجو كابتن الفريق ولامنتظرين رابطة او قروب تتكفل بالعلاج!!
ولاحتخلوا في بيتهم كده!!
وبالنسبة للتسجيلات لو ماعندكم قروش احسن تصارحوا المدرج وتقولوا ليهم مافي تسجيلات للشطب او الاضافة
الموضوع عادي الناس كلها عارفاكم مفلسين !!
لكن الصراحة للجماهيرمفيدة
تعرفوا تصارحوا اللاعبين وماتصارحونا!!!

••••••••••••••••••••••••••
غايتو لو فكرتو في اعارة اللاعبين
قبليها فكروا في اعارة لمجلسكم لاي فريق !!
اعارتكم ممكن تفرح المدرج برضوا
اعارة لي اعارة اولى بيها انتو
المريخ البطل والمريخ الكيان يضيع بسبب المال !!
بالله دا كلام دا!!
انتو لو صعبة صعدوا من فريق الشباب علي الاقل نقول دخلنا التسجيلات!!
فريق الشباب دا مافيه لاعب طرف يمين وصانع العاب ومهاجم،،
دي ياها الخانات المحتاجنها
اطلعوا وقولوا نحن نشجع الصناعه الوطنيه ومحتاجين نعطي فرصة للشباب ماعيب!!
الكحة ولاصمة الخشم
ولا ننتظر رجعتكم من المغرب ؟؟

••••••••••••••••••••••••••
دا كلو كوم ورجالات المريخ وكبارها المربعين يدينهم كوم براهو!!
السر في صمتهم شنو؟؟
والسر في ابتعاد الجلابة شنو ؟؟
يعني حال المريخ دا ماشايفنوا!!
والم الجماهير دا ما حاسين بيه؟؟
منتظرين شنو!!
يعني امة المريخ مافيها غير جمال !!
طيب انتو شنو مشجعين فقط !!
قلنا مافي رجال اعمال طيب مافي رجال دولة يغيروا اللجنة بكفاءت ادارية !!
حننتظر كتير شكلنا كدة !!
ياسعادة الوزير لو عندكم رغبة تهبطونا دوري الدرجة الاولي ورونا عشان الواحد يكون مقتنع !!
بدل تعيشونا علي امل !!
لكن برضوا لو نزلتونا الاولي اتركوا لينا المريخ عشان نحن اهله
مامحتاجين تعيين من طرفكم !!
معقولة ياسيادة الوزير تعين لامال ولاخبرة ادارة !!
قولوا لينا نهبطكم الاولى عديل بيكون خبر عادي!!
المريخ يعاني من لجنتكم المؤقرة المكونة من طرفكم والجمهور مضايق من حضراتهم
تاني الباقي شنو
منتظرين الناس تثور!!!
ولا نهئ نفسنا للدرجة الاولي
الخريف يبان من البرق بتاعوا
والتشليح بداية الموسم
وعدم التسجيل الان
كافي جدا نفهم الوضع برانا
بس خليكم واضحين عشان الماقادر يفهم ويستنتج يفهم من كلامكم
الصراحةً راحة
منتظرين اجابتكم ؟؟

••••••••••••••••••••••••••
مسك الختام
علي الجميع ربط الاحزمة لاسبوع ملئ بالمفاجات
حيكون اسبوع محتاج الصبر وطول البال !!!
الماعندو صبر ماينشط النت !!
••••••••••••••••••••••••••
ونحن علي المدرج نشجع وندعم ونتفرج
شكلوا مدرجنا حيكون في دار الرياضة امدرمان
والتراسنا يشجع من بيت المال !!
الشغلة جايطة والكل مربع يدينو
والاحداث كل يوم من سئ لي اسواء!!
محتاجين الصبر ياشفوت المدرجات ومقسوم ليكم تعيشوا في الم كده ،،
ربنا معاكم ومعانا وربنا يصبرنا باقي الايام،،،،،
••••••••••••••••••••••••••
همسة اخيرة
ملف التسجيلات حيكون كباقي الملفات لاتنتظرون جديد
وانشاء الله يجددوا للموجودين!!
رزق اليوم باليوم
الخوف نكمل باقي الموسم بنصف الفريق !!!
الشايفوا انا مابعيد يوم ندخل مباراة من غير احتياطي واحتمال الميدان يكون ناقص لاعب او اتنين !!
مع لجنة التدمير مش حتقدر تغمض عينك ،،
افلام ساااااكت
فلم في ضهر فيلم
والجميع علي المدرج ويتفرج!!
••••••••••••••••••••••••••
خارج النص
الاخوة القانونين المريخاب بدل استشارتكم تكون للقروبات اتضامنوا وشكلوا خط دفاع للمريخ واتبرعوا بالاتعاب لنفرة المريخ عشان ماتصرحوا للاعلام والاذاعات الفيفا موجودة وانتوموجودين يعني الجماهير محتاجه عمل مش معرفة الثغرات ،،،،
اخر الذمن اديتوا فرصة لبعض الاقلام للتطاول علي الزعيم !!
عشنا وشفنا ،،،
بالمناسبة انشاء الله المدرب موفرين ليه رسيفر وتلفزيون وحضر مباراة المراكشي!!
الاسبوع دا حيكون اطول اسبوع ياشفوت نسأل الله السلامة والعافية وربنا يدينا الصبر ،،
ونساعد نفسنا وفريقنا بي الدعاء واي نصر حنهدية للاعبين فقط لانو حيكون باجتهاد شخصي منهم!!
اول مرة اشوف لي مجلس يقول لو انتصرنا !!
انتو ماساعين للنصر ولا شنو!!
الوك ونحن وكل المدرج منتظر النصر وانتو ماعارفين في نصر ولامافي!!
طيب سؤال بوسوسه كده في تسجيلات ولامافي !!
حترحلوا ولاقاعدين؟؟
محتاجين منك صورة جماعية قبل الرحيل عشان نعملها بروفايل للقروبات!!!!
••••••••••••••••••••••••••
اخي قائد المركبة
اصل واتصل
الموبايل ملحوق بس العمر ماملحوق
واتصالك مهم لكن حياتك اهم
ربنا يوصلكم لعيالكم سالمين
••••••••••••••••••••••••••

 

تغريدة واتساب

المشاركة

1 تعليق

  1. حبيبنا الأخ منذر بالرغم من لوني الأزرق ولكني انتظر زاويتكم بكل الشوق لأنها مفعمة بالصدق وتحكي نبض المشجع البسيط الذي لم يتبقى له سوى كرة القدم يلجأ لها كاستراحة محارب ينسى من خلالها شظف العيش والهم اليومي المؤلم
    ولكن اسمح لي أن أوجه صوت عتاب
    انتم من وصل المريخ لهذه المرحلة والتي لا نقبلها لأحد قطبي الكرة وذلك لأن القطار لا يسير في خط حديدي واحد لا بد من خطين متوازيان
    انتم السبب عندما سمحتم بتنظيم القوافل والمسيرات التي تنادي بعودة الوالي كلما ابتعد
    أين كان عقلاء المريخ وهم يكتفون بالفرجة على شلة من النفعيين وهم ينهشون في جسد المريخ بانانية بغيضة
    والله والله لا يرضينا ما يحدث للمريخ لأنه لا هلال بدون مريخ ولا مريخ بدون هلال
    لذلك بدل إضاعة الوقت في نقد التسيير ارجو ان يلتف الكل ومن خلال الجمعية العمومية باختيار من يقود المريخ في هذا المنعطف الخطير حتى ولو على حساب الموسم
    موسم يروح ولا يروح المريخ

أكتب رد

أدخل تعليقك من فضلك!
أدخل إسمك هنا من فضلك