أطهر الطاهر وعشة الجبلية .. ضربهما الهوا !!
بالعربي الكسيح
محمد الطيب الأمين
أطهر الطاهر وعشة الجبلية .. ضربهما الهوا !!
* أحيانا يضع الإنسان لنفسه (قيمة) تبدو أكبر من (قيمته الحقيقية) .
* في ناس كده بزيدوها (كوز موية) .
* جميل أن (تقيم) نفسك ولكن الواقعية مهمة جدا في التقييم.
* لازم تكون واقعي .
* وسائل التواصل الإجتماعي ضجت خلال الأيام القليلة الماضية بخبرين أتنين.
* خبر أطهر الطاهر والمغنية (عشة الجبلية) .
* أطهر وبحسب الكاردينال قال داير (٣٥٠) ألف دولار في الموسم الواحد .
* يعني أكتر من (٥٠) مليار في الموسم الواحد .
* أما عشة الجبلية فهي (قونة) بارعة في غنا (المغارز) و(المطاعنة) .
* عشة الجبلية اشترت عربة نسيان باترول.
* من حق أطهر أن يقيم نفسه ب(٣٥٠) ألف دولار ومن حق الجبلية أن تشتري لنفسها نيسان باترول.
* ومن حقنا نحن وبعيدا عن الحسد أن نقف عند الحالتين .
* عشة الجبلية كل رأس مالها أغنية إسمها : (هيي دي مالا) .
* بالاغنية دي ركبت نيسان باترول .
* يعني لو كانت أغنية (ربيع الدنيا) حقتها كان عادي بتشتري طيارة .
* لو غنت (قصر الشوق) أو (غضبك جميل زي بسمتك) كان بتمشي الحفلات بالهلكوبتر.
* زي الكاردينال .
* قصة الكاردينال مع الهلكوبتر فيها (فيلم هندي عديل) .
* قال ليك : العميد جابني أم درمان ووقف الطيارة فوق للجوهرة .
* ورسل لي (المضيف) .
* المضيف جاني قال لي الكابتن دايرك .
* مشيت للكابتن قال لي يا ريس دي الجوهرة ونحن بنقول ليك شكرا ليك .
* قال قلت للزول المعاي : معقولة دي عملتها أنا؟ معقولة أنا بنيت الصرح ده كلو ؟
* الكابتن قال لي ننزل ؟ قلت ليهو لأ.
* الكاردينال قرب يقول لينا : ووقعت من الهلكوبتر وكسرت سني.
* المهم .. لو الفنان بيركب عربية حسب أغنياته فإن عشة الجبلية يفترض تركب (تكتوك) .
* أو (عجلة دبل).
* لكن نيسان باترول ؟
* الصراحة ما منطقي .
* نقول اللهم لا حسد لكن الموضوع فيهو مفارقة .
* والله يا عشة ما حاسدنك وربنا يزيدك لكن كمان الموضوع ما منطقي.
* ما ممكن بي (هيي دي مالا) تركبي نسيان ، وابوعبيدة حسن بي (والله ما رضيناها ليك تغمر الدمعات عينيك) بفتش في حق (قطرة العيون) .
* يعني يا عشوشة ناس عثمان حسين وإبراهيم عوض وود اللمين ضيعوا زمنهم ساكت في (قصتنا ولو داير تسيبنا وزاد الشجون) .
* نحن يا عشوشة لسه في أذهاننا (القونة) البتجي الحفلة راكبة (الهايس قدام والساوند ورا) .
* الصورة مقلوبة .
* اللهم لا حسد .
* نجي للاخ أطهر الطاهر .
* قناعتي أن أطهر الطاهر أكثر لاعب سوداني متطور .
* متطور وصاحب شخصية في الملعب ومستواه ثابت .
* أضف لذلك أطهر لاعب (كورتو واضحة وصريحة ومنضبط بصورة كبيرة) .
* صغير في السن وله حساسية عالية تجاه الشباك .
* أطهر أنقذ الهلال في أكثر من مناسبة.
* وبالذات المناسبات الكبيرة .
* زول (حلال مضيق) .
* يملك أطهر ميزة أخرى غير متوفرة في اي لاعب هلالي .
* أطهر هو اللاعب الوحيد الذي لم يلعب لأي نادي في السودان خلاف الهلال .
* من البيت وإلي الهلال.
* (ولد النادي شديد) الزول ده .
* لكن كمان الحق حق .
* هذا المبلغ الذي وضعه أطهر لنفسه فيه خيال واسع جدا .
* مستحيل طبعا .
* ما في لاعب سوداني قيمته المالية تساوي الرقم الذي طرحه أطهر.
* وإذا كان ود الطاهر ينظر لتجربة (صديقه) محمد عبد الرحمن فيجب أن يعلم أن هذه الدولارات تدفعها أندية الخليج .
* لكن في السودان قيمة أطهر لا تتجاوز الستة مليار .
* أكتر من كده ما بينفع .
* لو عندك نادي بديك ال(٣٥٠) ألف دولار طوالي تمشي ونحن بنقدمك لحدي المطار .
* ونتمنى ليك كل السمح .
* ولو المريخ برضو بديك الرقم ده مبروووووك عليك ، والورنيك حق التسجيل مننا .
* ما في مشكلة .
* لكن كنا بنتمني تحفظ جميل الهلال .
* ما بنقول ليك سجل لينا بالمجان أو سجل لينا بمليار.
* لا .
* سجل بقروش زي قروش اخوانك وامشي احترف بره ب(٣٥٠) ألف دولار لكن عن طريق الهلال .
* الهلال الرعاك وقدمك للناس .
* جدد عقدك مع الهلال وما تلعب لكن خلي النادي الدايرك يتفاوض مع الهلال.
* ما تسمع كلام وكلاء اللاعبين والسماسرة .
* بضيعوك ..
* ما تخسر الهلال وجمهور الهلال .
* الكرة الآن في ملعبك .
* وآخر كلامنا : نحن مش ما دافعين من جيوبنا حاجة ؟ برضو ما بنقبل لاعب محلي يتسجل بالرقم ده .
* افرض ادوك القروش دي ناس عمار الدمازين يلعبوا معاك كيف ؟
* ال(٣٥٠) ألف دولار دي بتجيب صانع ألعاب بلاتنيوم (جنسي) أبو شعر ومعاهو امبومبو ومؤيد عابدين ووضاح وكابتن بشير و(٧) زي صلاح نمر .
* ما تكتر المحلبية وتشطح .
* كورتك ما بتستاهل الرقم ده يا ولدنا .
* ونركب صافنات ونجيبة (سنارية) واصلو الزول بيموت والذكرى تفضل حية .
* و..و..
* خت الكورة واطة .
بنصح صاحب عمود بالعربى الكسيح أن يترك الكتابه ……
كتاباتو غير موضوعيه وعديمة فايده يعنى زول ماعندو موضوع …..
كتابتو مضيعة زمن ليو وللقارئ