أعملوا ليكم (مقصورة) وقت ما قادرين تجيبوا ليكم (بطولة)

1
1039

وان طال السفر

محمد عبد الماجد

• الولد وقت يكون قاعد (يبني)، أهلو بيشعرو ان ولدهم بحقق في استقلاليته.. وبكوّن في نفسه، عشان كدا بقوموا يعفوه من أي شيء.
• الولد ذاتو من يعمل ليه (دريبات)، والقروش تجري في ايدو، بقول ليك عاوز يبني.
• البيغترب ويطلع برة البلد دي …اول هدف عندو بتمثل في (البنيان).
• يعمل ليه (بيت)..ويجي راجع.
• البدخل ليه في صندوق..والبدخل السوق…هدفو الاول (البنيان).
• وللأمانة البنيان صعب.
• يمين الواحد لو عاوز يبني ليه (حيطة) ، حيلو يتهد.
• نفسك يقوم.
• ورقبتك تتسل متل العمود الفيهو (7) طاسات.
• لو عاوز تعمل ليك (غرفة)، إلّا تكون ايدك واصلة، وبتكسر تلج.
• عشان كدا الزول القاعد يبني الناس بتقيف معاه، وعلى الأقل بيعلنوا عن تعاطفهم معه.
• يقولوا ليك فلان بيبني.
• وهو في الأسرة وفي الحلة بيعفى من كل الرسوم والالتزامات.. كشف البكاء ما بخت فيه.
• ما في زول بيسأله.
• ناس المريخ تعاملوا مع جمال الوالي على امتداد (14) سنة على نظام ان الوالي قاعد يبني.
• لذلك كان جمال الوالي معفياً من أي محاسبة او نقد عندما يفقد المريخ بطولة، لأن جمال الوالي شغال في الاستاد.
• وشيء طابق شاخور.
• وشيء سور الدقير.
• وناس عالم الرياضة في التلفزيون القومي كانوا كل جمعة بيطلعوا بالكاميرا عشان يجيبوا لينا استاد المريخ.
• والاذاعات.
• والصحف شغالة (مكاواة) في الهلال.
• نحن ساكتين ساكت.
• عارفين الايام بتلف وتدور.
• والهلال هلال الملايين.
• الهلال سيد البلد.
• 14 سنة – المريخ بيفقد في الممتاز، بقولوا جمال الوالي بيبني في الاستاد.
• يطلعوا من التمهيدي في البطولة الافريقية يقولوا جمال الوالي بيبني في الاستاد.
• يطيروا من البطولة العربية ..جمال الوالي بيبني في الاستاد.
• ينظموا سيكافا ويطيروا منها ..جمال الوالي بيبني في الاستاد.
• يتغلبوا 7 من الوحدات يقولوا ليك قاعدين يبنوا.
• ينسحبوا أمام الهلال يقولوا ليك قاعدين يبنوا.
• يفقدوا سيكافا أمام اتراكو يقولوا ليك قاعدين يبنوا.
• يلعبوا (تمهيدي) يقولوا قاعدين يبنوا.
• 14 سنة قضاها جمال الوالي رئيساً لنادي المريخ ، كان جمال الوالي كلما أخفق في مباراة او فقد بطولة او خرج منها، قال إعلام المريخ ان جمال الوالي بيبني في (استاد المريخ) وان المجلس منصرف نحو تشييد (القلعة الحمراء) لذلك ليس هناك أسف او حسرة على ضياع (بطولة) على المريخ، طالما هناك (صرح) يشرف المريخ والسودان كله.
• 14 سنة شغالين بالطريقة دي.
• لمن نحن ذاتو عذرناهم.
• هسع وقت الكاردينال انصرف نحو (الجوهرة الزرقاء) لقينا موضوع (البنيان) ما عذر.
• يعني شنو لو قاعد يبني.
• الكاردينال بيبني وشال الدوري والكأس.
• جمع بين البطولتين.
• والسنة دي مع (البنيان) و(الجوهرة الزرقاء) فاز ببطولة الدوري الممتاز بدون خسارة.
• تاني ما في زول يقول لينا الزول دا قاعد يبني.
• اوعكم تعملوا لينا (البنيان) عذر.
• تنططوا في عيونكم متل (الشرط) في العراقي الجديد.
• جمال الوالي كان بعد الخروج من أي بطولة يطالب بقفل ملفها ، والاتجاه نحو بطولة أخرى.
• وغالباً فان البطولة الأخرى تكون بطولة سيكافا.
• جمال الوالي يطلع من البطولة ، وناس مزمل ابوالقاسم يطالبوا بقفل الملف.
• المريخ يطلع …وهم يقفلوا.
• ما خلوا ليهم ملف ما قفلوه.
• ود الياس رئيس نادي المريخ السابق في آخر ثلاث سنوات له رئيساً للمريخ حقق الممتاز (3) مرات على التوالي، جمال الوالي في (14) سنة حقق بطولة الممتاز (3) مرات، في الوقت الذي حقق فيه (سمير فضل) و(اسامة عطا المنان) بطولة للمريخ في عهد أسامة ونسي.
• يعني في 15 سنة، المريخ حقق بطولة الممتاز (4) مرات بما في ذلك البطولة غير الشرعية التى تحققت عن طريق اسامة وسمير، في الوقت الذي حقق فيه الهلال في تلك الفترة بطولة الممتاز (11) مرة.
• أشرف الكاردينال في (4) سنوات حقق بطولة الممتاز (3) مرات وهي نفس عدد بطولات الممتاز التي حققها جمال الوالي في (14) سنة.
• قال بناية قال…طيب (الجوهرة الزرقاء) دي معمولة من (كرتون).
• الهلال في فترة أشرف الكاردينال لم يحدث ان خرج من الموسم بدون بطولة وهذا الأمر حدث في فترة صلاح ادريس وفي فترة الأمين البرير، وأظن ان الأمر ينطبق على كل رؤساء الهلال السابقين.
• المريخ في الموسم الأخير والموسم الذي سبقه لم يحقق أي بطولة، لا دوري ولا كأس.
• في عهد صلاح ادريس جمع الهلال بين الدوري والكأس.
• وفي عهد الأمين البرير جمع الهلال بين الدوري والكأس.
• وفي عهد الكاردينال جمع الهلال بين الدوري والكأس.
• والكاردينال قاعد يبني.
• الجوهرة من 3 طوابق.
• والمقصورة من 4 طوابق.
• والدوري الممتاز بدون خسارة.
• ومعاه كمان كأس دوري الشباب بولاية الخرطوم.
• جمال الوالي في المقصورة الطائرة ..ضيع ليه 7 بطولات.
• في السور ضيع ليه 3 بطولات.
• في ارضية الملعب ضيعوا ليهم بطولتين.
• طابق شاخور طاروا بسببه من 5 بطولات.
• ولا في زول بقدر يقول حاجة.
• ولا في زول بيسأل جمال الوالي.
• تنططوا في عيونكم متل قراية الطب البيطري.
• هسع ناس سوداكال ديل.
• ناس طارق المعتصم لو عاوزين ليهم (عذر).
• لو عاوزين ليهم (شماعة) …يقوموا يشرعوا في بناء (مقصورة).
• ان شاءالله مقصورة وهمية.
• عشان المجلس يلقى ليه عذر.
• يفقد الممتاز يقولوا مجلس المريخ بيبني.
• يتغلبوا 3 من الأهلي شندي ويفقدوا كأس السودان ..يقولوا المجلس قاعد يبني.
• يطيروا من التمهيدي …(البنيان) عذر.
• من البطولة العربية.
• من سيكافا.
• ما عندكم مشكلة.
• سوداكال قاعد يبني.
• سوداكال عليه 9 طعون ..وغير معتمد رئيس لنادي المريخ مع ذلك ما عذروه.
• قالوا ليه تدفع 20 مليار.
• يا سوداكال ابدأ أعمل ليهم (غرفة) في الاستاد ،ما في زول بيسألك.
• ما في زول بقول ليك حاجة.
• مالكم ومال النقة الكتيرة.
• شوفوا ليكم مخرج.
• جمال الوالي (14) سنة كل ما يخرج من بطولة بقول قاعد ابني.
• انتوا في شهرين عاوزين يقطعوا لحمكم.
• أعملوا ليكم (مقصورة) وارتاحوا من النقة الكتيرة.
• الناس ديل ما بيسكتوا إلّا بالمقصورة.
• وقت تبدأوا في المقصورة ما في زول بيسألكم.
• ما في زول بقول ليكم حاجة تاني.
• متعودين هم على الموضوع دا.
• 14 سنة ساكتين.
• يعني عاوزة تبقى على (مقصورتكم).
• الحمدلله – نحن بي جوهرتنا الزرقاء.
• بي قناة الهلال.
• حققنا الممتاز.
• وبدون خسارة كمان.
• …………….
• ملحوظة : انفخوا بطنكم.
هوامش
• اليوم يعود رئيس الهلال للبلاد.
• أي حاجة توقفت في سفر الكاردينال.
• قبل المحترفين يجب حسم أمر الثلاثي.
• وليد علاءالدين يمكن اعادة تسجيله واعارته.
• وليد اذا وجد الفرصة سوف يعود للتألق.
• في الساحة لا يوجد أفضل من وليد علاءالدين.
• اما بشة فهو الأفضل على مدى كل المواسم الأخيرة.
• وكذلك يتميز بويا بالقوة والخبرات الكبيرة.
• في ملف المحترفين مازلنا نتتظر الأخطر من ساماتا.
• لو لقينا (ساماتا) ذاتو يبقى ما عاوزين شيء.
• الكاردينال تصريحاته في ملف المحترفين (ميسية) وتسجيلاته (تيتيه).
• نسمع بي (ميسي) ونشوف (تيتيه).
• السنة دي ان شاءالله الكاردينال يعكس الصورة.
• الكاردينال يحتاج للنجاح في هذا الملف الذي اخفق فيه كثيراً.
• أي اخفاقات للكاردينال في هذا الجانب تحسب عليه.
• اعتقد ان الأمر أصبح (شخصي) للكاردينال.
• ما كل سنة تقول لينا الاخطر من ساماتا ..وما نشوف شيء.
• بما ان انطلاقة الهلال في البطولة الافريقية سوف تكون يوم 10 فبراير ..يعني بعد 50 يوم …يبقى من الافضل ان تأتي بمحترف معروف.
• محترف جاهز.
• التجريب ما معانا.
• معسكر الهلال نفسه يفترض ان يبدأ مبكراً.
• لا بد من معسكر خارجي.
• المعسكر الداخلي سوف يقودنا الى موسم كارثي.
• هل يمكن ان يتجه مجلس الهلال الى معسكر داخلي من أجل افتتاح الجوهرة الزرقاء.
• افتتاح الجوهرة الزرقاء الآن أنسوه.
• شوفوا ما هو أهم من ذلك.
• الجوهرة ملحوقة.
• الأهلي المصري سوف يلعب يوم 30 ديسمبر أمام اتلتيكو مدريد.
• هل نتوقع فريقاً في حجم اتلتيكو مدريد في افتتاح الجوهرة.
• ام ان الافتتاح سوف يكون دون الطموح.
• التاريخ الذي حدد لافتتاح الجوهرة سوف يجعل الافتتاح (تمرين أوفر).
• ما أكتر من كدا.
• التجديد للثلاثي اضافة الى تسجيل محترفين اثنين يعني ان الهلال يحتاج لخمس خانات في الكشف.
• وجود خانة خالية في الكشف يعني ان الهلال يحتاج الى أربع خانات.
• تسجيل وليد علاءالدين واعارته يعني ان خانات الهلال تقلصت الى 3 خانات فقط.
• محمد النور ابوجا حارس شباب الهلال حارس جيد ولا يقل أية حال من الأحوال عن جمعة ويونس الطيب.
• الابقاء على مكسيم الى جانب الاستفادة من ابوجا حارس الشباب يمكن ان يتيح للهلال اعارة يونس الطيب حتى يستفيد الهلال من خانته.
• أبوجا هو الحارس الأفضل في الساحة في جانب الحراس الوطنيين.
• ويمكن ان يفيد أبوجا الهلال في المباريات المحلية وفي المباريات الافريقية كذلك.
• لذلك اتاحة الفرصة لابوجا أمر لا بد منه.
• كما ان اتاحة الفرصة لابوجا سوف يمنح الهلال خانة يمكن الاستفادة منها في التسجيلات.
• 4 حراس مرمى في كشف محدود ..عدد كبير.
• وابقوا على سفر.
• …………………
• عاجل: الحل في الاعارة.

 

 

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق

المشاركة

1 تعليق

  1. يا زول انت ما براك ولا شنو يونس احسن من حراس الهلال كلهم ولا ابالغ ان قلت احسن حارس ف السودان اعارة شنو بويا واطهر والصينى ووليد علاء الدين وشيبوب وابراهومة والطاهر الحاج اشطب من طرف يا كردنة واوعى تمس شعرة من بشة

أكتب رد

أدخل تعليقك من فضلك!
أدخل إسمك هنا من فضلك