أفطر حدانا وانفر معانا ومن النفرة لبروفة القمة

0
547

تغريدة واتساب
بقلم : معاذ ابومؤيد
أفطر حدانا وانفر معانا
ومن النفرة لبروفة القمة

اليوم النفرة الكبرى
بتاريخ ٢٠١٦/٦/١٨
المكان نادي المريخ
الزمان يوم مفتوح للجميع
بمعني وشعار
الفطور معانا في النادي
ونفرتنا لخزينة النادي
اليوم فرحتنا تكتمل ونزف النفرة لخزينة النادي
احساس جميل
اليوم حنعرف قيمة الجنية
عشان حندعم نادينا البيه
ابواب النفرة حتفتح من الساعة الثانية ظهرا وحتي العاشرة مساء
واحتفالنا حيكون في قمة الجمال والبهاء مساء
تعال بالموجود كان مية ولامليون ولاخمسة مليون
اصلا شعارنا كان جنية وجنية تعمل مية
المهم المشاركة ويكون كلامنا قول وفعل،،،،
لن ندعك تدفع وحدك
جيت النهار حبابك
وجيت وقت الفطور حبابك تحلل صيامك وتحلل نفرتك
وجيتنا بالليل كمان تعيش معنا الروحانيات بالمديح والزكر
وجيت نهاية النفرة تنفر وللتمرين عدل
شفت العظمة دي كيف
عظمة يامريخ
••••••••••••••••••••••••••
تاريخ النفرة يصادف مناورة القمة
يعني اختيار بدقة
والمجلس احتوى الجميع بقرار حكمة
الكل ابن النادي
والكل بيدعم النادي
هيبة يالمريخ هيبة يالنجمةاليوم تجينا قروبات الولايات تفطر حدانا وتنفر معانا
وناس الخرطوم عليهم حق الضيافة،،،
ساعات تفصلنا عن الفرحة الكبرى
وايام تفصلنا عن مباراة القمة
احساس جميل انك تطمن علي خزينة ناديك وتطمن علي اللاعبين،،
متاكد كل زول ساهم ودفع حيكون نايم مرتاح انو لنادية كان سند
وسند القبض حينور كل القروبات
وصورة جماعية تكون زكريات،،،
الجانا حبابو والماجانا عذروامعاهو،،،
الهم واحد والكيان واحد
والسعادة للجميع
فرحتنا بالنفرة تعادل فرحتنا في قون في جيرانا في العرضة،،،
كل من فهم مقصزنا بطريقة مختلفة له العتبى حتى يرضى
تنافسنا من اجل الكيان فقط والمستفيد هو الزعيم
اختلفنا في الراي لكن يظل الاحترام قائم بين الجميع،،،؟
•••••••••••••••••••••••••
مسك الختام
ماقي زول بوصوه علي جناهو
وقروباتنا ماحتاجت توصية كثيره
عشان تنفر معانا،،،
يوم نفرتنا بنفس احساس يوم الوقفة،،،،
جري وتعب والنهاية صباح عيد جميل للكل ،،،
••••••••••••••••••••••••••
ونحن علي المدرج ندعم ونشجع ونتفرج
الليلة حنقفل بند الدعم
وبعديها نلتفت للتشجيع
وتشجيعنا وفرجتنا حتكون من التمرين،،،
دعمنا متواصل
وتشجيعنا متواصل
وفرجتنا تكون مع الاداء والنتيجة
كدى نكون شفوت مدرجات
ونجوم قروبات
حنلمها كفر ووتر
كفر في الميدان
ووتر نعزف اروع الالحان في المدرجات والقروبات
الدعوة موجهه لكل اطياف المريخ للمشاركة
•••••••••••••••••••••••••
همسة اخيرة
حضورك اليوم يعني فرحتك غدا ورفع التمام لمجلسنا الهمام
لاتنظر لحجم دعمك ولكن انظر لمشاركتك،،،
يعني مهما كان دعمك قليل ولا كثير تكون مبسوط لمجتمع المريخ
تعال عشان تتعرف علي القروبات من قريب
تعال عشان تكون صداقات وتعمل قروب جديد
تعال عشان نادينا يسع من الحبايب الف
تعال عشان قروباتنا تكون هي السند والدعم
تعال بالعندك المهم قروبك ينور اللستة ويكون في قائمة الشرف
وكلو حيكون زكرى
••••••••••••••••••••••••••
خارج النص
ملف شيبوب في الحفظ والصون
وملف الدعم في الحفظ والصون
لكن البمحنك
انو ناس العرضة شمال بطالبوا بكشف منشطات
ومعدل اعمار هجومهم فات السبعينات،،،
يكشفو علي الصبي
ولا علي الرجل الكبير الخفى!!!!
مع فحص المنشطات طالبو بفحص الدي ان اي(DNA)،،
امكن تلاقو ليكم محترفين مسجلين وطنين برقم جديد من ابيي!!!!
قالوا منشطات قال
والارسالية بتاعة المكملات الغذائية الجاية من المانيا
تكون دي لمبات الكشافات ومكمله ليها!!!!
اخر سطر
مباراة الخرطوم الوطني جهجهت الجماعه!!!!
••••••••••••••••••••••••••
اخي المشرف حضورك اليوم دافع للجميع للمشاركة
اخي المشرف لن ننظر بحجم دعمك لكن سنشيد بمشاركتك
مشاركتك وتواجدك يبعث الاطمئنان للادارة
مشاركتك رسالة واضحة للجميع ان وراء كل عاشق للزعيم قروب داعم لو بمليم،،،،
••••••••••••••••••••••••••

••••••••••••••••••••••••••
# تغريدة طبية:
لا تنسوا أن تشربوا كمية وافرة من الماء خلال شهر رمضان المبارك، أي على الأقل 8 أكواب من الماء يومياً. قوموا بشرب كميات قليلة منها في فترات متقطعة من أجل تفادي أي انزعاج أو نفخة.
وربنا ينعم علي الجميع بالصحة والعافية
•••••••••••••••••••••••••
# تغريدة مرورية:
وراء كل حادث مخالفة مرورية
والموبايل يشكل نسبة كبيرة من الحوادث المرورية
اصل واتصل
اتصالك مهم لكن حياتك اهم
لاتسرع فالموت اسرع
الصيام يحتاج الي التركيز في الطريق
لاتجعل صيامك يؤثر علي قرارتك اثناء القيادة
قيادتك بامان والتذامك بالتوجيهات المرورية حزام امان لك ولغيرك
لاتسرع فالموت اسرع،،،،،،،،
لاتسجل اسمك في قائمة الوفيات بتهور واستعجال وعدم ثبات
كل السرعة توصلك الي دارك الي السرعة القاتلة،،،،،
••••••••••••••••••••••••••
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
نقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطاءنا في يوم من الايام،،،،،،،،
====================

 

تغريدة واتساب

المشاركة

أكتب رد

أدخل تعليقك من فضلك!
أدخل إسمك هنا من فضلك