ابا سلطان كبير

0
735

في السلك

بابكر سلك

* قلوبنا اليوم مع مريخ السلاطين قلبا وقالبا
* لا نريد للسلاطين ان يبارحوا الممتاز لانهم فاكهته
* نريد للسلاطين البقاء بالممتاز لانه المكان الذي يليق بهم دوما
* فمريخ الفاشر بليلة مباشر تحط حولها جميع المخلوقات في كرم كبير
* ودور الميرمات تشهد بكرم السلطان واريحية الفاشر
* واسم السلطان يحدث عن تأريخية المدينة وقوة السلطان وفراسه وافراسه الذين لايضاهيهم فارس ولا فرس في هذا الكون
* ايها الناس
* لابد لمريخ السلاطين ان ينتصر
* لابد لقيد يخطئ ولايظلم الذي يقيد به ابداعات الناس ان ينكسر
* لابد ان يقف اولاد السلطان علي حقيقة ان نقاط اليوم اسمها الممتاز
* ان نالوها بفضل الله مكثوا بالممتاز
* وان خسروها لا قدر الله ودعوا الممتاز
* انها مباراة بالنسبة للسلاطين هامه
* لا تتحمل التراخي ولا التآخي ولا التحيز ولا التباطوء ولا التواطوء لا سمح الله
* امنياتنا كمريخاب بنصر كبير في مباراة اليوم
* بالذات والخصم ضعيف جدا يا ولدي
* تركيز علي كابو والدمازين وضغط علي ابو عاقلة هي وسائل كسب النقاط
* ديل بدخلوها في روحهم براهم
* ابا سلطان كبييير
* بركاتك الليله ونحاسك دايرنو في السما
* اها
* نجي للتحلية
* نجي لي مزيكة امس
* الامس ده ماكورة
* الامس ده مزيكه
* دي موش كورة دي مزيكا
* دخلنا بي عشرة جنيه
* وعلي الطلاق الشفناهوا ده مية جنيه شوية عليهو
* وتحت تحت قالوا شداد قال
* طالما كورة المريخ بي عشرة
* باقي كور الممتاز تكون مجاني
* وكورة الهلال الاتحاد يدفع عشرة لي اي زول يدخل
* ناس كابو ديل مافي زول بتحملهم
* ياخ بشه قبل الكورة تبدأ نفسو بقوم وكتافينو تتلصق في اضنينو
* ناس كابو ديل يرفعوا الضغط خليها الكتافين
* اها
* نرجع للتحلية
* نرجع لمزيكة امس
* الزجاجي اهدافو وصلن عشرين قزازه
* اقصد زجاجة
* اقصد هدف
* يعني ضرب الرقم اللابسو في اتنين
* ومن هنا لحدي نهاية الدوري حايصل رقم رمضان عجب (29 )
* مابنقبل منو رقم التكت (24 )
* ولا رقم امير كمال (21 )
* حتي رقم مامادو (28 ) مابنقبل بيهو
* لايرضينا الا رقم عجب (29 )
* 29 كورة في الشبكة ماتنقص زجاجه
* عشان الموسم القادم ان الله احيانا دايرين ستة وتلتين زجاجة عطر فواح
* ايها الناس
* بارك الله في كردنه الذي اهدانا الزجاجي
* وبكري
* والسماني
* والتش
* وبيبو
* شكرا كردنه
* وبدل تسجل ليك تلتين لاعب يا اخوي
* تعال انت بي جاي
* اختصر المشوار يا اخوي
* برا وجع قلب وكابو واب سته
* انت يا اب كسكته
* ويييييين اب سته
* زماااااان قلتوا كسر صغير في اصبعو الصغير
* لي اسي ما التأم ?
* رطوبه ياربي
* ولا هشاشة عظام لعامل السن يا كردنه ???
* يا اخوي تعال بي جاي اخير ليك
* جوهرة شنو وكضب شنو
* الجوهرة بي جاي
* كورة ومقصورة وكاسات جوية يا حبيب
* ايها الناس
* الشفناهوا امس ده هو المريخ
* و عشان نحافظ عليهو لازم ندعمو ماديا بالذات في هذه المرحلة
* من يدعم الكيان مرحب به شفت زي الشفت
* ومن يدعم الناس فليلزم بيتو لما يجوا ناسو
* لان الدعم لايمكن ان يرتبط بمن يدير النادي
* ولكنه يرتبط بانتمائنا للنادي
* و قولوا بسم الله وتعالوا نبدأ
* المهم
* المفوضية لاعلاقة لها بموقف دولة او مشكلات شخصية تخص اي زول
* يفترض انها تقوم بواجبها القانوني كاملا بدون الانصياع لاي توجيهات او موجهات او سياسات
* فالواقع يقول ان السيد آدم فاز بمقعد رئيس المريخ بالتزكية
* وان الطعون لا تسلبه تلك الصفه طالما لم يصدر قرار بقبولها
* وحسب علمنا ان الطعون غير مرتكزه علي اي مستندات تثبت ما تحويه
* فكان علي المفوضية شطبها عصر يوم تقديمها
* لكن اصرار المفوضية علي استعمال الماده 130 علي ما اعتقد التي تعطيها حق البحث والتحري في شأن اي معلومة تصل لعلمها
* هذا الاصرار لايسنده منطق
* لان نفس المفوضية قد شطبت الطعن المقدم ضد كردنه والمصحوب بمستند رسمي مختوم وموقع في زمن وجيز
* والناس ما عندها قنابير يا هؤلاء
* الله من علي الناس بصلع قدر السراويس تعبيرا عن نعمة الفهم وابعاد لاحتمال نمو اي قنبور علي واسطة الرأس
* طلعوا لينا قرارنا وخلونا ناكل نارنا
* المهم
* نرجع للتحلية والمزيكة
* امس بعد الحفله
* اقصد بعد الكورة
* المريخاب كانوا بتغالطوا
* واحدين قالوا احلي قون قون بكري
* قلت ليهم ياتو قون
* بكري جاب تلاته
* واحد خطفه
* وواحد علي الطائر
* وواحد ماعدوهوا
* نطه واحد قال قون الغربال احلي
* قلت ليهو الغربال جاب عشرين قون
* الزجاجي ابو اقوان
* الزجاجي بتاع دجاجي والفول فولي
* آخرهم وليس بآخرهم قونين في اهلي عطبرة
* واحد بلنت
* وواحد محل برك الطير
* واحدين قالوا البلنت عشان في القلب
* وواحدين قالوا القون التاني احلي عشان طير الطير
* لانو جا محل برك الطير
* الطير تاني لو شاف الغربال بطير براهو
* نطة زول قال قون مامادو هو احلي الاقوان
* لانو سحبها (جب) ولعبها (لوب )
* ايها الناس
* احلي الاقوان هي التي لم تأت بعد
* فيهن واحد الليله العصر
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* قالوا (28 ) وصلت البولينه
* ده ما الفشل ظاتووووو يا والينا
* الفشل الكلوي الحايودينا
سلك كهربا
ننساك كيف والكلب قال متوقع ان تصل البولينه لي مية… ابقوا ناس غسيل ساااااي.… غسيل في الشتا ده ? وهز ضنبو وجري
والي لقاء
سلك

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق

المشاركة

أكتب رد

أدخل تعليقك من فضلك!
أدخل إسمك هنا من فضلك