ابكوا بس ..

0
131

وكفى

اسماعيل حسن
ابكوا بس ..

 

 

 

 

 

* منذ أن أعلنت “كأس” صحة شكوى المريخ، وترتبت على ذلك أحقيته ببطولة الدوري الممتاز ٢٠١٨م، والصحافة الهلالية ومعظم القروبات الزرقاء تشيل وتبكي…
* لا خلت عياط…. لا خلت نواح… لا خلت وراروب…
* ثكلي من أمو..
* قالت شنو؟؟..
* قالت الاتحاد تواطأ مع المريخ في هذه الشكوى!!
* وقالت ليه؟؟
* قالت لأن محاميه في نفس الوقت هو المدير التنفيذي للمريخ…
* يعني الخصم والحكم..
* ده كلام ده يا عوض دكام؟؟!!
* كيف يكون الاتحاد متواطئاً مع المريخ والشكوى اصلاً كانت في يده و(رفضها)..
* رفضها لسبب أوهى من خيط العنكبوت..
* إحتج بأن كاتب الشكوى ليس مفوضاً من قبل المجلس… مع إنه أصلاً، مدير الكرة المعروف لديهم، والذي كان في يوم من الأيام بالمكتب التنفيذي للاتحاد..
* يعني بفهم في القوانين واللوائح أحسن منهم..
* وليس بالسذاجة التي تدفعه لأن يتقدم بشكوى تترفض شكلاُ..
* عموماً إخوتي في العرضة شمال؛ ضحكتوا فينا “كاس” الله لا كسبكم..
* نحن ناقصين فضائح..؟؟!!
* ثم ثانياً:
* الاتحاد ياتو البتواطأ مع المريخ..؟؟
* اتحادنا ده ولا واحد تاني؟؟!!
* هو لو ما هذا الاتحاد، كان شلتوا (بطولات ممتاز) قدر ده؟؟
* حرام عليكم والله….. الاتحاد عمرو ما قصر معاكم..
* في قابيتو (قبل ما يرجع بيتو) ، عمل ليكم رايح….
* في الصلوي (المغص الكلوي)، عمل ليكم رايح..
* في والي قطر (شكاوي مطر)، عمل ليكم رايح ..
* في (٢ البقت ١٢) عمل ليكم رايح..
* ومن جهة تانية؛ فاروق جبره، أعدم ليكم موهبته….
* سفاري أعدم ليكم موهبته..
* والآن في الطريق إلى أن يعدم موهبة بكري المدينة!!
* يسوي ليكم شنو تاني أكتر من كده؟؟
* يستاهل….
* لأن من يصنع المعروف في غير أهله ، يلاقي الذي لاقاه مجيرُ أم عامر..
* عموماً ستبقى الحقيقة المؤكدة؛ لولا الاتحاد الذي تفترون عليه الآن، ولجانه المختلفة.. ما كان لكم أن تنالوا بطولات الدوري الممتاز أكثر من المريخ…
* لجنة التحكيم شغالة معاكم..
* وكذلك لجنة الانضباط…
* وكذلك لجنة المسابقات..
* وكذلك لجنة الاستئنافات..
* كرهتونا كذلك ذاتا…..
* فهل يعقل بعد هذا كله أن تأتوا وتزعموا أن الاتحاد متواطئ معنا؟؟..
* كدي خلونا من الاتحاد ….
* هل تنكروا في العهد البائد – الله لا عادو – حتى المخلوع كان شغال معاكم.. ؟؟
* وهل تنكروا خدمات شقيق المخلوع في الجهر وفي العلن..؟؟
* وخدمات المفوضية..؟؟
* وخدمات وزراء الرياضة الولائيين؟؟
* إنتوا الما كان شغال معاكم منو في العهد البائد؟؟؟
* يا أخ حتى مجلس الصحافة كان شغال معاكم..
* تكتبوا زي ما عايزين زول بسألكم مافي!!
* تشتمونا… وتنبذونا… وتتفنوا في استفزازنا بالأخبار والمانشيتات الساخرة..
* وإذا فكرنا مجرد تفكير في أن نرد عليكم بالمثل؛ الله قال بي قولنا..
* ظلمٌ وراء ظلم طوال السنوات الثلاثين الماضية، ونحن صابرون عليكم وعلى النظام صبر أيوب..
* ولأن الله مع الصابرين.. إندلعت الثورة، وعم العدل ربوع رياضتنا.. وتغير حتى أداء الحكام..
* وفي أول مباراة قمة.. بقى ليكم الحكم غريب غريب.. لأنه كان عادلا في صافراته.. وشجاعاً في قراراته..
* وكان من الطبيعي أن نفوز عليكم بهدفين زي السم…. وأن تفرتكوا الكورة كعادتكم كل ما يكون التحكيم نزيهاً.. !!
* ختاماً…
* خلوا كلامكم الفارغ ده كلووووو، وأدونا (كاس مزمل) لو سمحتوا…
* أخجلوا من نفسكم وبطلوا الجعير.. وختوا في بالكم ما يلي:
* من هنا ورايح، حا تبكوا بس..
* مع حرية سلام وعدالة.. تاني كاسات الاتحاد ولجان الاتحاد، إلا تشموها قدحة.. وأعود بإذن الله غداً..
* وكفى.

المشاركة

أكتب رد

أدخل تعليقك من فضلك!
أدخل إسمك هنا من فضلك