احسن ليكم المصارعة دي من الكورة ..!!

0
83

في الصمت كلام
محمد عثمان بلل
احسن ليكم المصارعة دي من الكورة ..!!

• أمس انا ما غلطان.
• ما قاعدين نضرب الكف ولا نقلب الفنجان.
• في الزاوية دي ذكرت الوصيف عالم مخيف.
• الأوضاع في النادي طاردة.
• وحذرنا الناس ما تمشي العرضة جنوب
• الجماعة أكدوا الحاجة دي بيان بالعمل.
• مصارعة في (WWE) ما حصلت قبل كدا.
• الجماعة أمس طلعوا من طورهم.
• المشاكل بتعمل أكتر من كدا.
• الناس شافت مصارعة رهيبة.
• كان في مباراة بين الكبار والصغار.
• واحد من الصغار لعاب شديد.
• عمل ليهو حركة حركتين عذب ليك واحد من الكبار.
• الكبير دا اتعقد من الحركة دي.
• قام ضرب ليك الود الصغير.
• عينك ما تشوف إلا النور.
• عشان كدا قلنا ليكم اللعب مع الصغار (بخربش).
• طبعا المباراة ما اكتملت.
• تكتمل وين مع المصارعة دي.
• جون سينا لمن شاف المصارعة دي.
• قال عمك مكمان مدير شركة المصارعة عمل ليهو فرع تاني.
• ضرب بالطريقة الصاح.
• زي ما بقولوا لولا تدخل العقلاء لحدث ما لا يحمد عقباه.
• والمصارعة كانت شغالة للصباح.
• دي قبل كدا ما حصلت.
• ولا حتي في الدافوري.
• يا حليل الدافوري.
• ويا حليل ايامنا.
• يا الوداد أرجى الراجيك.
• يا ناس انا مالي ومالهم.
• انا زاتي معذب روحي في شنو.
• بي طريقتكم.
• غادي غادي.
• هسي قال ليك الود الصغير عنده حالة نفسية.
• انت تاني رجعت مش قلت مالك ومالهم.
• اي صحي وكلامك صاااح.
• خلاص سكت.
• بس اخر كلمة.
• طيب قول.
• انا اصلا في الكورة ما نافعين.
• وبتطلعوا من التمهيدي قبل ما تلعبوا.
• اعملوا النادي للمصارعة وخلاص.
• يمكن تفلحوا.
• انا خايف زاتو في المصارعة تفشلوا.
• يا زول خلاص اتخارج.

(صمت اخير) ..
• الوصيف بالجد عالم مخيف.

المشاركة

أكتب رد

أدخل تعليقك من فضلك!
أدخل إسمك هنا من فضلك