اكتموا نفسو !!

0
813

بالعربي الكسيح
محمد الطيب الأمين
اكتموا نفسو !!

* في العسكرية أيام كنا في المعسكر حفظنا فسلفة تقول : (المستجد لو ريحتو بيتعبك) ..
* هذه نظرية عسكرية حققت نتائج طيبة في المجتمع العسكري، ولذلك كانوا (التعلمجية) في المعسكر يتعبونا بـ(الإدارة الداخلية والتمام) ..
* وفي الغالب (تمام تسعة) ببدأ الساعة تسعة لكن بيستمر لحدي الثالثة صباحاً وقبل أن ترتاح قليلاً تأتي صافرة (تمام ستة صباحاً) ..
* و(تمام ستة صباحاً) يعقبه (التدريب) ثم الفطور ثم (تمام تسعة أو تمام 12) ..
* ثم يتواصل التدريب الشاق أثناء ساعات النهار ثم الغداء ثم (تمام ستة مساء) ..
* وهكذا ..
* من (تدريب وإلي تمام ، ومن تمام وإلي تدريب) ..
* والأصعب من ده كلو (الإدارة الداخلية) التي في كثير من الأحيان تستمر زهاء الخمس ساعات ..
* خمس ساعات بتشوف المستجدين بيتساقطوا زي أوراق الخريف ..
* تقع على وشك (وقعة عسكرية) يشيلوك يدخلوك (الضل) وتشرب موية وتجي تواصل مع أخوانك ..
* ويقول ليك : (تدريب الجيش فيهو خسائر) ..
* أول يوم لينا في المعسكر العساكر قالوا لينا (التدريب فيهو خسائر) وفهمنا فيما بعد أن الموت في التدريبات العسكرية ساهل وممكن ووارد بنسبة كبيرة ..
* العسكرية حياة فيها كثير من القصص المثيرة والجميلة ..
* ويبقي القول الأشهر هو : (العسكرية ضبط وربط) ..
* و(المستجد لو ريحتو بيتعبك) ..
* وبما أن ذلك كذلك فان المريخ الشهير بـ(المدفور) لما تريحو بيفرفر ..
* تاريخيا معروف المريخ بنهار مع الضغط ..
* فريق الوحدات الأردني الشقيق عندما فاز على المريخ بسباعية في البطولة العربية كان ذلك لسببين اتنين ..
* سبب أولي وسبب ثانوي ..
* سبب منطقي وسبب ما منطقي ..
* السبب الأول هو : (ضعف المريخ فنياً ونفسياً وبدنياً) ..
* ضغط الوحدات الأردني على جبهة المريخ هو سبب إنهيار المدفور في تلك المباراة ..
* أما السبب الثانوي هو (البرد) ..
* وعليه فان المريخ هو أول فريق كرة قدم في العالم يخسر بسبب البرد ..
* الفكرة .. المريخ لا يحتمل الضغط ..
* أو بمعنى آخر : المدفور إذا ريحتو بتعبك ..
* وهذه رسالة للجهاز الفني ونجوم الهلال ..
* ما تدوا المريخ نفس ..
* أكتمو نفسو ..
* من الدقيقة الأولى تبدأ مهاجم وضاغط ..
* حتى لو كان في دفاع الهلال مشاكل فانها لن تظهر حال إستغل الفريق (العيب التاريخي الموجود في شخصية المريخ والمتمثل في الإنهيار عند الضغط) ..
* صحيح ان الإنهيار عند الضغط عيب تتشارك فيه كل الفرق السودانية والمنتخبات ولكن هذا العيب ظاهر بشكل أكبر في فريق المريخ ..
* والعيب ده بيظهر في المريخ أكتر لما يكون لاعب ضد الهلال ..
* أصلاً هم عندهم إحساس بأنهم أقل من الهلال ..
* الإحساس ده عندهم ..
* فلما تقابل زول عندو إحساس إنو هو أقل منك وتقوم تضغطو قطع شك بينهار سريع جداً ..
* أنا أفتكر أكبر ثغرة يتجاهلها الهلال دوما عندما يواجه المريخ هي (إحساسهم بأنهم أقل من الهلال) ..
* الثغرة دي لو إستغلها الهلال بالشكل المطلوب فان المريخ سينهار سريعاً ..
* لازم تعرف من وين تدخل عليهم ..
* دي أهم حاجة ..
* ما تريحهم ..
* تعصرهم في مناطقهم وتشغلهم بـ(الإدارة الداخلية وتمام تسعة) ..
* تخليهم يفكروا كيف يحافظوا على شباكهم ..
* لازم يصلوا للقناعة دي ..
* قناعة إنو يحافظوا على شباكهم وما يفكروا تفكير أبعد من كده ..
* زي إحنا في المعسكر تفكيرنا كلو كان (متين الطابور ينتهي عشان نمشي ننوم) ..
* ما كان عندنا تفكير أبعد من النوم والراحة ..
* ده كل همنا كان في المعسكر ..
* بل والله العظيم كان عندنا بعض الزملاء حتى إجازة الخميس والجمعة ما بمشوا لأهلهم ..
* طبعا التلاتة أسابيع الأولى في المعسكر كانت مقفولة ..
* ممنوع الخروج ..
* بعد داك كل خميس بنطلع ..
* حتى طلعة الخميس دي في مستجدين بيرفضوها من شدة التعب ..
* نفس الفكرة .. تعصر المريخ وتخليهو يفكر في المحافظة على شبكتو ..
* تخليهو يتمنى المباراة تنتهي سريع ..
* وعشان نعمل كده لازم تكون في شجاعة من الجهاز الفني ..
* شجاعة وقوة في اللعب ولياقة عالية ..
* وإذا توفرت هذه الأشياء سيخسر المدفور إن شاء الله ..
*ويظل خوفنا من التحكيم قائم إلا أن يثبت العكس ..
* ونركب صافنات ونجيبة (جعفرية) واصلو الزول بيموت والذكرى تفضل حية ..
* و..و..
* والزول أبو عيون كحيلة جاء ….. من المعسكر شارد ..

المشاركة

أكتب رد

أدخل تعليقك من فضلك!
أدخل إسمك هنا من فضلك