التمهيدي وتعلم سواقة العجلة في الكُبر

1
1301

وان طال السفر

محمد عبد الماجد

 

• جوز الحمام في تركيا وقت يشوهو بجيبوا ليك معاه (سلطة طحينة).
• حاجة جانبية.
• هنا في بلدنا دي …جوز الحمام وقت يشوهو ما بتشوف منو شيء غير (سلطة الطحينة).
• جوز الحمام ييمشي وين؟.
• ما تسألوني.
• ما بتكلم.
• ولا بقول ليكم حاجة.
• ولا بلمح ليكم.
• عشان لو قطعتوا لي رقبتي ما بقول ليكم بتشيلوا (المحلية).
• عاوزني أقول ليكم (المحلية).
• بتحلموا لو منتظرين أقول ليكم (المحلية).
• في أم درمان (البطيخة) بفتحوها بالسكين.
• في انجلترا بفتوحوا البطيخة بي مربع 4 نجمة.
• العالم تتطور.
• والتكنلوجيا اتقدمت.
• وبقى ما في مساحة للسكين.
• في الهند أي واحد عاوز يبقى (البطل).
• أي هندي عاوز يبقى (ممثل) ونجم في السينما.
• في السودان أي زول عاوز يلعب في الهلال.
• بما في ذلك احمد عبدالله ضفر.
• ندخل على (الجد).
• الحمام ما بحلكم.
• وسلطة الطحينة ما بتخلينا نطلع من الموضوع.
• التمهيدي دا اصلو ما فايتنو.
• يلعب فيه الهلال.
• يعفى منو الهلال.
• برضو بنقول كلامنا فيه.
• للأمانة اذا تم إعفاء الهلال من (التمهيدي) وشارك المريخ في هذه المرحلة ،فان المريخ ما كان سوف يخرج مننا سالماً، كان عملنا ليه (سيرة).
• كانوا ح يتعبوا معانا.
• يشربوا ما يرووا.
• كنا ح نقطع لحمهم.
• ومشاركة الهلال في مرحلة (التمهيدي)، لا يعني ذلك ان نغير نظرتنا في (التمهيدي).
• التمهيدي يبقى تمهيدي.
• في كل الأحوال لا لا للتمهيدي.
• الله يقطع سنين التمهيدي.
• وناس التمهيدي.
• ومرحلة التمهيدي.
• نحن (التمهيدي) عندنا زي أكل البصل بالشاي.
• زي الموبايل وقت يكون خط واحد.
• متل البيبسي الما بارد.
• والتمهيدي مع الهلال متل تعلم سواقة العجلة مع الكبر.
• حاجة ما خايلة مع الهلال.
• وموضوع ما بتبلع لينا.
• وهذه مناسبة لأن ننتقد الهلال نفسه والذي لعب في مرحلة (التمهيدي) هذا العام.
• لا بد من محاسبة الهلال عشان لعب في التمهيدي.
• هناك 5 أندية تم اعفائها من (التمهيدي) ، كان يفترض ان يكون الهلال واحداً منها.
• نحن اللعب مع الصغار ما بنفع معانا.
• نحن من يومنا بنلعب مع الكبار.
• ما قاعدين نحب نلعب مع زول أصغر مننا.
• شكلنا بيبقى ما خايل.
• وموقفنا بيبقى محرج شديد.
• اللعب في (التمهيدي) يعتبر تراجعاً كبيراً من الهلال والذي ظل يلعب بعد مرحلة (التمهيدي) وقد أعفي من (التمهيدي) في العام السابق.
• الهلال عليه ان يراجع حساباته فقد شهدت مشاركات الهلال الأخيرة في البطولة الافريقية (تراجعاً) كبيراً بعد ان كان الهلال يحقق أفضل النتائج في البطولة الافريقية وكان دائما ما يظهر بصورة مشرفة في مرحلة المجموعات.
• الآن مرحلة المجموعات لم تعد طموحا للهلال، كما انها فقدت قيمتها، بعد التعديل الذي حدث في البطولات الافريقية.
• الفيصل الآن في التأهل من مرحلة المجموعات اذ يعتبر التأهل من هذه المرحلة معادلاً للتأهل لمرحلة المجموعات في السنوات السابقة.
• مع ذلك ومع هذا التراجع الذي حدث للمجموعات في البطولات الافريقية فان الهلال أصبح لا يتأهل من مرحلة المجموعات.
• رغم ان المجموعات بتلمنا مع ناس المريخ وفيروفيارو.
• من هسع بنقول ليكم – الهلال مفروض مرحلة (التمهيدي) ما يلبعها في الجوهرة الزرقاء.
• ما بنجرب جوهرتنا بالتمهيدي.
• جوهرتنا (التمهيدي) حرمان عليها.
• نحن عملنا الجوهرة 3 طوابق عشان نلعب فيها (تمهيدي).
• نحن لو قبلنا بالكلام دا – نجيلتنا ما بتقبل بيه.
• عشان كدا بقترح نلعب مرحلة (التمهيدي) في استاد المريخ.
• ونقفل جوهرتنا.
• ما بنجرب جوهرتنا بالتمهيدي.
• استاد المريخ متعود على (التمهيدي).
• مرة عربي.
• ومرة افريقي.
• ما معقول نلعب في دور الـ 64.
• ليه؟.
• مالنا.
• جنينا نحن.
• المهم نقوم نشوف لينا مخرج.
• نشوف لينا حاجة نتصبر بيها.
• اللعب في التمهيدي سوف يجعل الهلال يلعب يوم 10 فبراير او 11 او 12 فبراير.
• يعني بداية التنافس الافريقي سوف يبدأ بعد 55 يوماً.
• يعني بعد أقل من شهرين.
• وهذا أمر يفرض على الهلال ان يكون أكثر جدية في الاستعدادات.
• ولا بد من معسكر مبكر ومنضبط.
• الهلال سوف يتجمع لاعبيه يوم 5 يناير.
• لماذا لا يكون التجمع من يوم 1 يناير ..عشان الهلال يستفيد أكثر من المعسكر.
• الهلال يحتاج لـ 40 يوماً على الأقل من أجل الوصول الى المستوى البدني المطلوب.
• اما المستوى الفني فانه يحتاج للمزيد من الوقت.
• ومحتاج الهلال يلعب عدداً من المباريات الودية.
• وهذا يعني كذلك ان افتتاح الجوهرة يفترض ان يكون في بداية شهر اثنين.
• قبل انطلاقة المنافسات الافريقية.
• البداية المبكرة للهلال في البطولة الافريقية سوف تتيح للمدرب البرازيلي الفرصة لمشاهدة الهلال على الطبيعة في مباريات تنافسية.
• وأفضل لفارياس ان يبدأ من دور الـ 64 ..عشان يفهم الهلال جيد…من ان يبدأ من دور الـ 32 ويدخل بعد ذلك مرحلة المجموعات.
• يحتاج فارياس على الاقل لـ 4 مباريات افريقية قبل الوصول لمرحلة المجموعات.
• أحسن من ان يدخل لينا فارياس لمرحلة المجموعات من جولتين في مرحلة واحدة.
• بنحاول نجمّل ليكم (التمهيدي).
• نذوقو ليكم.
• لكن في كل الأحوال ..نحن ما ناس (تمهيدي).
• والتمهيدي ما قاعد يتبلع لينا.
• ولا قاعدين نقبل بيه.
• مطلوب من الهلال ان يصحح تلك الاوضاع في منافسات هذا العام.
• لا بد ان يعود الهلال الى طليعة الأندية الأفريقية.
• ننتظر باذن الله وتوفيقه ان يظهر الهلال بصورة راقية وجميلة وممتعة في بطولة افريقيا هذا العام.
• وننتظر قبل ذلك ان يحسم مجلس ادارة نادي الهلال أمر المحترفين بحسب تطلعات جماهير الهلال.
• القفزة الكبيرة.
• والنقلة العريضة سوف تكون من خلال التعاقد مع أسماء معروفة افريقياً.
• ننتظر محترفين على مستوى.
• لكي يمضي الهلال بعيداً في البطولة الافريقية والتي نسأل الله ان تكون من نصيب الهلال هذا العام.
• نحن أكثر تفاؤلاً بموسم 2018م.
• 2018 موسم سوف يحقق فيه الهلال باذن الله كل تطلعات الأمة الزرقاء.
• كل الاحلام ..وكل الأمنيات نتمنى ان تصبح واقعاً في موسم 2018م.
• ننتظر استقراراً فنياً في الهلال.
• ننتظر ان يتمسك الهلال ومجلس ادارته واعلامه وجماهيره بالمدير الفني في كل الأحوال.
• في كل الظروف.
• ونتمنى ان يبعد الاعلام والجمهور أيضاً من المنطقة الفنية للجهاز الفني.
• من يلعب؟.
• ومن يشارك؟.
• وكيف يلعب؟.
• كل هذه الامور تقع على مسؤولية المدرب.
• أي تدخل في هذه الحتة سوف يفسد الأمر.
• الخلل يبقى فينا نحن، وليس في الأجهزة الفنية.
• لذا وجب التصحيح منذ الآن.
• ويجب ان نبدأ بداية صحيحة، قبل ان نصدّر (انطباعات) سالبة عن الجهاز الفني.
• ناس مواقع التواصل الاجتماعي ابعدوا من هذه الحتة.
• التغبيش لم يعد يصدر من الصحافة الورقية وحدها.
• التغبيش يمكن ان يصدر من مواقع التواصل الاجتماعي.
• امنحوا المدرب كل الثقة.
• وادعموا الجميع.
• وان شاءالله موسم ناجح ومتميز للهلال.
• …………..
• ملحوظة : يلا صفقوا كلكم.
هوامش
• سوف يكون أمام لاعبي الهلال فرصة جيدة ومتميزة من خلال معسكر المنتخب الوطني ومباريات بطولة المحليين.
• لا بد من تكثيف العناية والرعاية للمصابين في الهلال.
• وارتفع عدد لاعبي الهلال في المنتخب لـ 13 لاعباً.
• قولوا ماشاءالله.
• وربنا يكمل الخطوات بالنجاح التام.
• التسجيلات تبقى لها اسبوعين وشوية.
• وملف المحترفين.
• وملف اعادة قيد ركائز الهلال.
• احسموا.
• محمد داوود مهاجم المريخ قال استهدفوني.
• وانت البعرفك منو عشان يستهدفوك.
• بعرفوا ليك شنو؟.
• في زول بيستهدف ليه مهاجم (مجاني).
• في وجود كمال شداد نتوقع موسماً ناجحاً في 2018م.
• ننتظر الابتعاد عن التأجيل.
• والخرمجة في البرمجة.
• وننتظر تحكيماً جيداً.
• في موسم 2017م سوف تظهر مروي وسوف تظهر سنار …وهذا يعني ان الموسم سوف يكون أكثر ارهاقا.
• وهو بالطبع سوف يكون أكثر قوة واثارة.
• لذلك لا بد من وضع برمجة مريحة لأندية الممتاز.
• الأمل عطبرة وزع لاعبيه بين المريخ وهلال الأبيض والخرطوم الوطني.
• ذهب ضياء الدين وربما قصاري للمريخ.
• وذهب مؤيد عابدين لهلال الابيض.
• وغادر موسى قديم والتكت الصغير للخرطوم الوطني.
• وسوف يعود نادر الطيب والحارس صداح للأهلي شندي.
• ماذا تبقى للأمل؟.
• لم يتبق للأمل مجرد أمل.
• كل العناصر المتميزة فقدها الأمل.
• ادارة نادي الأمل عليها استدراك الموقف.
• نخشى على الأمل من الهبوط في الموسم الجديد.
• والأمل من علامات الممتاز.
• لذلك لا بد من تسجيلات قوية للأمل في الفترة الحالية.
• حي العرب سجل صاح.
• ولا خوف على العرب.
• الأهلي الخرطوم أيضاً فقد اسماء لامعة من قوامه.
• ومريخ كوستي مازال بعيداً عن الساحة.
• أتمنى من قناة الهلال ان تستضيف لنا نجوم تسجيلات الهلال في سهرة جماعية.
• والأكيد ان القناة تنتظر انتهاء الهلال من ملفاته المحلية في التسجيلات.
• والتاج يعقوب لعاب.
• يكفي انه وجد اشادة ناس عطبرة.
• ومحمود أم بدة تمنى التاج يعقوب في الهلال.
• احسموا.
• ونجضوا الشغل.
• وخلوا ناس المريخ ينططوا في عيونهم متل سواق اللوري الما عندو (مرايات).
• وابقوا على سفر.
• ……….
• عاجل : الغريبة ما في أي مطرة..طيب مالها بتنقط في المريخ؟.

 

 

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق

المشاركة

1 تعليق

  1. مجموعات شنو البتحلم بيها خخخخخ بطل ليبريا بطيركم من التمهيدي باذن الله وانفض سامر دعم باني ورمزي القضارف وانتظر الدعم الراتب وجينارو يصد كورة بر الخط واوتارا يلكم وبشه يسب وسادمبا كرت احمر ولكمة خطافية وبرضو بطل الدوري وعبدالعزيز تعاونية قتل روح المريخ بدعمه الهلال في قضية باسكال وحاقد عزالدين لعب دور المدمرة مع اليلولة الله يكفينا شره كان اجزتولو هههه احسن تشوف الجوهرة من التمهيدي لانك لن تحلم بمجموعات بناس المعتصم ودراج وافول ههه قايلين روحكم سجلتو هههه انتظر العفرت والعقرب وخلاص الدفاع بقى يتلتل مع كيتا وضياء وكمان التاج يعقوب دخل القلعة خلاص وباقي عندنا مفاجات كثيرة في باقي فترة التسجيلات وافرحوا بغثاء السيل وانتظروا ابداع السحابة الراحلة في جوف الشتاء عشانه تحلم بالخريف هههههه هذا غيض من فيض والعفرت شال تبعوا الامطار ناس اخلو سويق سكنو الجحار ههه صراخهم شدا مع الاسحار انا نومي قليل دموعي انهار .

أكتب رد

أدخل تعليقك من فضلك!
أدخل إسمك هنا من فضلك