صحيفة كورة سودانية الإلكترونية

الثلاثة المبشرين بالفيفا !!

1٬418

قزاز ورذاذ

محمد الطيب الأمين

الثلاثة المبشرين بالفيفا !!

 

* أكثر شئ أضر حكومة الإنقاذ الساقطة هو (تحليل الحرام) و(تحريم الحلال) .
* أو قل (تجريم البرئ) و(حماية الفاسد) .
* ولذلك القانون في سنوات البشير الأخيرة كان في إجازة مفتوحة وبدون مرتب .
* استقوى الضعيف (زولهم) وضعف القوي (الما زولهم) .
* وأصبح السودان بلد (الألف مظلوم) ووطن (المليون فاسد) .
* وبما أن ذلك كذلك فإن المنظومة الرياضية لم تكن بعيدة من فساد الكيزان لأن كيزان الرياضية هم أخطر من كيزان السياسة .
* ولكن العجيب أن يستمر الظلم والفساد في زمن القانون .
* وما صدر أمس بحق (الثلاثة المبشرين بالفيفا) هو أمر مؤسف بالفعل .
* اعتمدت اللجنة عجب والرشيد وبخيت للمريخ وانتقلت بالقضية من المحلية للعالمية .
* وهذا ما كنا نود أن نصل له .
* الرشيد وعجب وبخيت ليس لهم خانة في الهلال ولكنهم لن يلعبوا للمريخ في الوقت الراهن.
* الهلال سيوقف قرار (الأمس) وسيبدأ التصعيد اعتباراً من صباح اليوم .
* قضية زي دي ما بتستغرق مع الفيفا ربع ساعة .
* وناس المريخ بيعرفوا الفيفا كويس .
* ولا ما بتعرفوها؟
* الفيفا كل ١٥ يوم عندها قرار ضد المريخ .
* والمرة دي الهلال ح يجيبها ليكم و(ضقلها يكركب) .
* لجنة مكونة من (نفرين) اجتمعت وقررت .
* نفرين بس !!
* نفرين قعدو جمب بعض وقررو في قضية بتاعت رأي عام .
* والنفرين ديل فيهو واحد مريخابي أكتر من أبو العائلة … عفواً أبو عائلة هلالابي .
* مريخابي أكتر من جمال الوالي … عفواً جمال الوالي ذاتو هلالابي .
* المهم .. المريخابي الفي اللجنة ده بخلاف إنو مريخي فهو (كوز ليهو ضل) .
* قوم على حيلك .
* كوز ومريخابي .
* يعني نقدم شكوى للفيفا وشكوى للجنة إزالة التمكين .
* بنوصلها الحد .
* عندنا محامي اوروبي دي شغلتو في الدنيا .
* المحامي استلم ورق القضية قبل شهرين .
* منتظر إشارة.
* وكلمة تدينا البشارة .
* عموماً .. لابد أن يعرف جمهور المريخ حاجتين اتنين.
* الحاجة الأولي أن الصراع الدائر الآن هو ليس في (أبو عاقلة ونزار حامد ومحمد عبد الرحمن) .
* يعني ما صراع في لاعبين كانوا بكشف الهلال .
* هو صراع حول أتنين من كباتن المريخ وثالثهم بخيت .
* يعني دي (قوة عين مننا) .
* اكملنا تسجيلاتنا على أعلى مستوى وحرمنا المريخ من جهود أتنين من لاعبيه وثالثهم بخيت .
* اتنين من كباتن المريخ وقعوا للهلال وقبضوا المعلوم .
* والمريخ وبدون كرامة سكاهم وبكى بالدمع السخين والثخين .
* ناس قالوا ما دايرنك ووقعوا للهلال وين كرامتك وعزة نفسك ؟
* اللجنة اعتمدت الثلاثي للمريخ وحرمت المريخ من فترة تسجيلات واحدة .
* و الفيفا ح تعتمد الثلاثي للهلال وستحرم المريخ من فترة تسجيل أو فترتين مع الغرامة .
* والهلال بعد هذا كله سيشطب عجب والرشيد وثالثهما .
* ما ح يدقوها معانا .
* لكن كمان بنوصل القضية حدها .
* وموضوع زي ده لا فيهو منتخب ولا فيهو برقو .
* الفيفا بس .
* والفيفا طبعا ما فيها كيزان .
* بالقانون بس .
* وكلو بالقانون .
* والهلال بهذا التصعيد يريد أن يضع ثوابت حتى يعيد الهيبة للرياضة .
* نحن والله ما فارقة معانا .
* ولا محتاجين ليهم لكن برضو (بنشف ريقكم) .
* جيسي بكل إمكانياته لم يجد مقعدا في التشكيلة .
* مجاهد فاروق بكل فنونه لم يجد خانة حتى الآن.
* في الهلال في زحمة وعشان كده نحن بنعمل بهذه الثلاثي زحمة في الفيفا.
* وتصعيد هذه القضية هو قرار جماهيري.
* ما فيهو لعب ولا هظار .
* لحم الهلال مر .
* وحق الهلال ما بضيع .
* إذا كان القانون في بلدنا أعرج فإن القانون في الفيفا مستقيم.
* إذا الفيفا حكمت لصالح المريخ سنبارك لهم (قانون).
* سنكتفي بهذا الفترة التي توقفوا فيها عن اللعب .
* وإذا حكمت لصالح الهلال وهذا هو المتوقع سنقوم بشطب هذا الثلاثي .
* القضية دي بالذات خط أحمر يا السوباط .
* دي قضية شعب ما فيها لعب ولا مجاملة.
* ده تحدي عديل.
* وطبعاً اعتباراً من الأسبوع القادم سنفتح ملف سيف تيري .
* وتعال أناقشك.
* الهدف الأول من مفاوضة سيف تيري إنو نرفعو سعرو عشان المريخ يدفع فيهو ٧٥ مليار .
* أفتكر ٧٥ مليار مناسبة .
* لو المريخ دفعها طوالي بنبارك لتيري .
* ما دفعها بنجيبو يوقع وبنكيسو زي كيس رمضان ومحمد.
* ونحن ما خسرانين حاجة .
* لكن ضر كده بس .
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والنشوف اخرتا.

قد يعجبك أيضا
5 تعليقات
  1. صالح يقول

    وهذا ما كنا نود أن نصل له .
    * الرشيد وعجب وبخيت ليس لهم خانة في الهلال ولكنهم لن يلعبوا للمريخ في الوقت الراهن.
    * الهلال سيوقف قرار (الأمس) وسيبدأ التصعيد اعتباراً من صباح اليوم .
    اصحى يا نايم، قوانين الفيفا مع اللاعب، حيث ينم تخيير اللاعب وبعدها معاقبته بالايقاف لتوقيعه عقدين، واللاعبون محور القضية تم تخييرهم واختاروا المريخ، يعني انت عايز الفيفا تحنسهم ليك ولا شنو

  2. محمد الوسيلة يقول

    الصحفين الهلالاب ديل بضجكوا على مين؟ بضحكوا على انفسهم لوائح الفيفا واضحة تخيير اللاعب واللاعبين اختاروا المريخ
    المريخ لم يحرض اللاعبين حتى تتم توقيع عقوبة عليه فاللاعبين اساسا لاعبي المريخ وتم تجديد عقوداتهم ، واذا كانت في عقوبة الآولى توقع على الهلال لانه وقع مع لاعبين ولهم مباراة مصيرية ضدهم مما يعتبر نوع من التواطوء الذي يحرمه مبدأ اللعب النظيف .
    اما السوباط فهو من بقايا النظام البائد هو والطاهر بونس والسر احمد على ، فكان على نادي الحركة الوطنية رفض تعيين مثل هؤلاء

  3. زين حلفا يقول

    متصوحف ساي ومحسوب على الصحافة

  4. ابو عمار يقول

    معللللم يا.استاذ محمد الطيب بتعرف ترفع ضغط.الجماعه صاح ههههه والفيفا وبل ري.البل

  5. عبد المنعم البشير يقول

    اولا انت لا تعلم بقوانين الفيفا وعلمك بها كعلمك باختيار عنوان لعمودك عربي كسيح حيث ان جهلك باللغة اوقعك في المحظور ان تقول علي لغة القران ولسان خاتم النبيين ولغة أهل الجنة (عربي كسيح ) والان اخترت لعمودك الذي ( رزاز وقزاز ) عنوان اشبه بلغة ولو ما عهد الكيزان الفاسد انت اصلا لا يمكن تتحرج اعلامي الفيفا يا عزيزي عندها اللاعب مصان ومحفوظ الحقوق لانه ركن اساسي قامت عليه اللعبة ( كرة القدم ) وحمايته عندها مقدسم الا ان يأتي بجرم جنائي مخدرات وايذاء وقتل وغيرها ولكن في موضوع العقودات تخير اللاعب فيما هو افضل له صحيح اللاعبين اخطأوا بتوقع عقدين وهذا اخلال بالعقد لكن عندما تم احضار اللاعبين للجنة وخيرتهم بين البقاء بناديهم الاول والنادي الثاني اللذي وقعوا له هم بمحض ارادتهم اختاروا الرجوع لناديهم الاصل هنا يكون القانون مع احترام واختيار رغبة اللاعب وقطعا هنالك جوانب مخفية ربما لم يصرح بها اللاعبون الثلاثة الا للجنة وهذا ما سوف يتضح لا حقا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد