الحب (الميتة) !!

0
129

 

بالعربي الكسيح
محمد الطيب الأمين
الحب (الميتة) !!

* في كل مدينة وبلد هنالك من يحب (الميتة) .
* في ناس تخصص (ميتة) .
* بحبوا (الميتات) .
* عندهم موهبة في الحاجة دي .
* لا بتعبوا ولا بجتهدوا .
* الساهلة بس .
* والبياكل (الميتة) من الصعب يأكل (الحية) .
* طبعا القاعدة دي لا تشمل (الأسود) .
* زمان كنا بنقول (الأسد ما بياكل الميتة) .
* وجات (أسود حديقة القرشي) وحطمت هذه القاعدة .
* أسود الحديقة أكلت الميتة وشبعت فيها كمان .
* أول مرة في حياتي أشوف لي أسد (بيسلخوا ليهو الخروف) .
* يضبحوا ويسلخوا ويقطعوا ويجيبوه ليهو جاااااهز .
* ولو ما بخاف الكضب مع اللحمة دي بيحيبوا ليهو (بصل وسلطة وشطة خضرا) .
* اللبوة ظهرت ليها (وجنات) عديل .
* فعلا صدق من قال أن (أسود حديقة القرشي) هي وحدها التي جنت ثمار الثورة .
* نحن واقفين في الصفوف والأسد يضرب في (المرارة) و(الفخدة) .
* نحن نساهر مع خطابات حمدوك والأسد في الحديقة بينوم من المغرب .
* نحن البمبان يخلي عيونا زي (شاي الكركدي التقيل) والأسود في الحديقة تضرب (كبدة الضأن وشوربة الضنب) .
* أنا حزين لأن الأسد أصبح يقبل (الميتة) بهذا الشكل الغريب .
* المهم .
* المريخ هو من الأندية القليلة في العالم التي تأكل الميتة .
* المريخ اتعود يشيل النقاط من المكاتب وليس الملاعب .
* من المكتب وليس الملعب .
* تخصص في الحاجة دي .
* أكثر نادي بقدم (شكاوى) هو المريخ .
* وأكثر نادي بيطير من التمهيدي هو المريخ .
* يعيش المريخ ب(الميتات) .
* هو وصيف ب(الميتة) .
* حنك ساي .
* هسه في زول بيصدق إنو المريخ من العام (2008) ولحدي اليوم بيشارك في الأبطال (صحبة راكب) ؟
* 12 سنة صحبة راكب .
* في (ميتة) أكتر من كده عليك الله ؟
* أنا والله عندي شك في كأس (89) .
* عندي شك .
* وأي زول طبعا حر في (شكوكو) .
* وبمناسبة الشكوك .
* امبارح يونس الطيب شككنا في أنفسنا .
* يونس الطيب فشل في صد كرة شايتنها من تجاني الماحي .
* نقدر غياب يونس وافتقاده لحساسية المباريات لكن كمان ما للدرجة دي .
* دي ما كورة بتدخل .
* يونس الطيب في مباراة أهلي عطبرة الماضية وقع في أخطاء كبيرة وبالأمس وقع في خطأ لا يغتفر .
* مباراة الأمس مارس من خلالها الفاتح النقر نظريات ما كان في ليها داعي .
* بدون سابق إنذار أبعد النقر العراقي عماد محسن في ظل غياب الشعلة العائد من رحلة إصابة .
* دفع باللاعب الشاب إسكندر في مباراة الكل كان يعرف أنها مباراة حارة .
* التنظير في المباريات المهمة ثمنه غالي .
* إسكندر يجب أن يشارك تدريجيا وليس أساسيا .
* الجميل أن التوفيق قد حالف وليد الشعلة ونجح في خطف هدف التعادل .
* الدوري يدخل الآن مراحل صعبة لا ينفع معها التنظير والتركيب .
* هؤلاء الشباب يمكن أن تتاح لهم الفرصة في المباريات الباردة نوعا ما .
* المشاركة الاساسية في المباريات الصعبة سلاح ذو حدين بالنسبة لاسكندر وغيره من الشباب .
* ندعم مشاركة الشباب ولكن في الحدود التي لا تضر بالهلال .
* خسرنا أمام الأمل بملعبه وأمس خسرنا أمامه بالتعادل في ملعبنا .
* و..و..
* والله في.

المشاركة

أكتب رد

أدخل تعليقك من فضلك!
أدخل إسمك هنا من فضلك