صحيفة كورة سودانية الإلكترونية

السنة دي رمضان ورمي الكيزان

27

 في السلك

بابكر سلك

*ياحليل رمضان
*مافضل فوقو شئ
*الاتنين الجاي ده ماتعدو
*والاتنين البعدو خليهو
*والاتنين البعد البعدو ماتشتغل بيهو
*الاتنين البعدو وقفة العيد
*تاني فضل فوقو شنو؟
*ياحليلو
*ورمضان عند شعب السودان احلي ومحبوب جدا
*لانو الشهر الوحيد البياكل فيهو الشعب السوداني
*تلتين سنة اتعودنا نصوم حداشر شهر وناكل في رمضان بس
*والله يجازي الكان السبب
*رمضان عند اهل السودان احلي
*والسنة دي احلي وانضر
*شراب بي ادب وذوق واوتوكيت مافوقو خمج كيزان
*ولاموائد بهلوان يطلع منها المنظم كسبان
*وحباب رمضان
*ايها الناس
*مظاهر ثورة الضد بدت تظهر
*خلافات واختلافات علي مستوي المداولات
*غلاء فاحش
*وتكدس الناس في الطرقات
*وشح مواد بترولية
*الدور الجاي مشهد الجمل يبرطع داخل ارض الاعتصام
*والمشهد البعدو طوالي جرح كم كنداكة وطعن كم ثوري واصوات رصاص وبمبان
*اصلو ثورات الضد بتتشابه في كل العالم
*وحميدتي يحدثنا عن تحملهم من مواردهم كلفة البنزين والجاز
*وتتكدس الصفوف امام الطلمبات التي تدلي خراطيمها كالفيلة الجائعة
*وكأنها تقول حال الخرطوم زي خرطومي ده
*وده كلو مابهمنا شديد
*كل البهمنا الدنيا رمضان وحر شديد
*ولو اشتغلنا بفضل الظهر وضد ثورة الضد
*يمكننا ان نصبها لاطول مدة ممكنة
*لو بتاع اي عربية في طريقو شال اربعه انفار
*ان شاء الله لمسافة اربعه كيلو بكون حل مشكلة
*مية عربية في اربعة انفار باربعمية شخص
*في شارع فيهو اكتر من اربعمية شخص واقفين؟
*يبقي ارضينا الله ورسوله
*وطبقنا اخلاق الثورة في الاحساس بالناس
*وحلينا ازمة المواصلات
*وفشلنا ثورة الضد
*ايها الناس
*لاننكر دور القوات المسلحة الايجابي وبصمتها الناصعة علي دفاتر الوطن
*فهي كذلك منذ سودنة الجيش السوداني وتسميته بالجيش
*وستظل كذلك طالما تضم في حناياها اخوان حامد الجامد والملازم صديق واخوانهم
*بس كمان جيشنا مفروض يبقي مرن شوية في المناقشة يابرهان
*وان يضع صالح الوطن مقدما علي كل الاجندة بارا بقسم التخرج من الكلية
*وبارا بوطنه
*وبارا باهله المواطنين
*الاولو شرط آخرو نور
*لذا يجب ترجمة شروط الطرف التاني في التفاوض بقفل جميع دروب سرقة الاستقرار المنشود وسحب البساط من تحت اقدام الملك الشعب مستقبلا كما حدث من قبل تلاته مرات
*عشان كده طاوعونا مرة
*فعظمة النشيد الذي يقول
*الثورة انطلقت شعارات ترددها الالوف
*يجب ان لاتتغير لحسرة نسمع معها صدي نشيد جديد يقول
*الثورة انسرقت شعاراتها اكلها الغول
*والثورة يابرهان هي الحرية
*ولن نقبل بالتكبيل من جديد
*الآن عصافير الوطن تفرد جناحاتها في فضاءات الوطن الواسعة
*وتقدل علي ارض البلد الشاسعه
*تشرب بمزاجها من نيلها
*تأكل كما شاءت من تمر نخيلها
*حرية تعيشها الآن عصافير الوطن الحره
*وما حاترجع لقفص الاسر ابدا
*فعصافير الوطن ليست كالعصفور الاحوص الذي وضعه صاحبه الاحوص خارج القفص
*طار براهو دخل القفص
*الثورة ما حوصاء يابرهان
*تاني العصفور مابدخل القفص
*لذا وافقوا علي ضمانات حرية عصفور الوطن الحر
*فما ترونه في اعين الثورة ليس بالحوص ولكنه الحور الذي يجعلها اكثر جازبيه واثارة
*عاين لي ثورتنا شديد يابرهان
*اكيد حاتلفت نظرك وتأخد عقلك وقلبك
*فانت في الآخر المواطن عبدالفتاح برهان من السودان
*ايها الناس
*تاني ياحليل رمضان
*مافضل فوقو شئ
*ورمضان احلي مع الناس الصابنها
*مع الناس الحارسنها
*مع الناس الراسمنها
*واحلي في كل السودان
*طالما الشراب بالكبابي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت ياوالينا
*رمضان زاتو صابيها
*شهر كامل معانا في القياده
*شهر كامل يشاركنا العبادة
*شهر كامل يشاركنا الريادة
*شهر كامل يشاركنا السجادة
*والضحية قالوا قدم طلب من اسي داير يضبح في القيادة
سلك كهربا
ننساك كيف والكلب قال قلتوا لي دايرين طيارتكم بعد قامت طيارتكم ؟؟؟
والي لقاء
سلك

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد