الشعب يريد وصيف جديد ….!!

سوبر هاتريك
طارق محمد عبد الله
الشعب يريد وصيف جديد ….!!
& ضحكت حتى الاستلقاء على القفا ومزمل يتحدث بدون وازع من خجل عن تلاشي الندية مابين الهلال والمريخ مع ان الهلال بطل الممتاز عامين متتاليين في وجود المريخ وصيف ترى أين يجد مزمل حبوب منع الخجل بالمجان قبل أن يبدأ في كتابة هذه الهرطقات قال تلاشي الندية قال انتوا الندية دي غيروها ولا شنو …؟؟؟
& لكن قبل ما استرسل واتعمق في موضوع التلاشي ده خلوني اعترف وهو سيد الادلة بان الندية فعلا تلاشت مابين الهلال على صعيد الاثنين الانسان والعمران اول حاجة الازرق عندو مجلس منتخب والاحمر غير الوهاج مامعروف ليهو مجلس حتى الآن والرئيسين (سودكال وحازم ) غرقا مركب المريخ في بحر وصافة متلاطم الأمواج لاقادر يطلع منو يمشي لي قدام ولا يقعد فيهو بارتياح في ظل تهديدات مشروع وصيف جديد هو هلال الساحل الغير ساهل خاصة في ظل الأنباء التي ترددت بأن( العليقي) يفكر في مثل هكذا اقتراح تقدم به أحد الهلالاب الشفوت والقصة في شكل حصة فحواها توني وتوماس وطيفور ومعاهم كم إعارة كده لهلال بورتسودان تحت شعار الوصافة القيافة أمانة ما جاك زول ….!!
& والمذكور أعلاه ده جانب ومن آخر فإن للهلال استاد فخيم وتحفة عمرانية تسر الناظرين تمثلها الجوهرة الرائعة التي تبدو كالسماء الصافية وفي المقابل المريخ ماعندو استاد بل حفرة كاعماق الكهوف الواجمة تحتاج لزمن طويييبيل حتى تصبح ملعبا صالح لممارسة كرة القدم طيب ممتاز نهي وإستاد نهي طيب المريخ ده عندو شنو يامزمل ملاريا واللاحمى عليقية نزفية …؟؟
&& وكررنا اسم العليقي كتير لانه قائد حملة شلعوها العليقاب هسه في زول جاب سيرة توني او التش او طيفور او الصيني او (….) …هنا…؟؟؟ وبطريقة صديقي الصحفي الضخم الفاضلابي نسأل انتوا العليقي ده مالو …؟؟
& وننصح ميزو والفاضلابي وسلك وكل العليقاب وحفاظا على صحتهم بعدم الاقتراب من أخبار تسجيلات الهلال وبصفة خاصة ملف المحترفين دي جلطات جاهزة خليكم في وهم صدق عصرية مباراة ال( ٨٠) دقيقة بالجنينة وعيشوا الدور قبل ماموسم( العياط) يبدأ …تبكوا بس ….!!
اهداف سريعة ..اهداف سريعة
& قلناها زماااااان ونكررها اليوم الهلال ينظر للامام والمريخ ينظر للهلال.
& وبصراحة العولمة الكروية التي يخطط لها الهلال بعناية شديدة نتمنى أن تمتد لتشمل جميع الأندية.
& بما فيها(المريخ الوصيف المؤقت الماندنا ) والدليل مزمل لا اقصد مزمل قال ….!!
& في جل مواسم الممتاز كنا نغني لجمهور المريخ الفضل ياوصيف دنيانا ياوصيفنا.
& وكيف لا وهو ضلنا المرسوم على رمل الوصافة وشاكي من طول جلوسه عليها.
& ولكن حملة العليقي التشليعية لانستبعد أن تفرز واقع جديد وبالتالي وصيف كرت كما ذكرنا آنفا.
& وبمناسبة تلاشي الندية بحسب هضربة وهرطقت مزمل نسأل الهلالاب .
& وبلكنة أهلنا هناك العليقي ده نان ما وليد صغير…؟؟؟
& لاهو( نديد لي سودكال ولا عندو ندية لي حازم ) مو كدي ..؟؟؟ & طيب الزول ده مالو وده شنو البيسويهو في الناس ديل..؟؟؟
& انتوا ياهلالاب ما عندكم زول يهرش الزول ده يقول ليهو يا ولد خليك عندك (ندية ) …؟؟؟
& قال تلاشي ندية قال حنوريكم التلاشي على أصولو و الهروب الكبير محمدكم محمدكم.
& اصلا هو وراثة عندكم وبمناسبة( الندية والتلاشي ) انتوا زيكو رجع الكورة الزمان ديك ولا لسه…؟؟؟
& عزيزي الهلالابي اذا اي مريخابي اتكلم معاك الايام دي خليهو الوصافة بتوريهو.
& وقبل التلاشي احسن يامريخاب اقفلوا عليكم باب الوصافة بالضبة والمفتاح .
& غايتو خياراتكم محدودة والوصافة ولا صمة الخشم خاصة مع هلال بورتسودان المحدر ليكم في الضلام ده .
& وفي ظل المطالبات الزرقاء تحت شعار الشعب يريد وصيف جديد .
& نتوقع صراع ثلاثي محتدم على الوصافة مابين المريخ وهلال بورتسودان وحيدوب النهود .
& عليه فان وصافة الممتاز في الموسم القادم باذن الكريم على مسؤولية صاحبها .
& وكاستقرا مبكر أتوقع أن يظفر بها اي الوصافة في نهاية المطاف المريخ عارفين ليه …؟؟
& جراء الاستعانة برابطة مشجعيه أعضاء اتحاد المريخ العام وابنه الوفي اسامة عطا المنان .
& الصيني( الندية) فإت حدها وكتب على علاقته مع المريخ بالتلاشي .
& والشاب قال مادايرا عديل هو الكورة كمان بيلعبوها غصب …؟؟
& اكيد مافي حد بيشعر بالسعادة يمكن يمشي منها ويختار البعاد .
& انتوا عارفين الفترة القضاها ولدنا الصيني في مخزن العرضة جنوب جابت ليهو شنو ..؟؟ وجع طموح ..!!
& ودائما وابدا نتطلع لهلال قيافة فايت العرب والافارقة مسافة .
& ازرق وابيض لون الفل هلال القمة حبيب الكل .
& واخيرا احمد الله كثيرا انني حي ازرق .